Mahesh Babu: మహేష్ బాబు ఇంట్లో గణేష్ ఉత్సవాలు.. నిమజ్జనం చేసిన గౌతమ్, సితార.. వీడియో వైరల్

Mahesh Babu: మహేష్ బాబు ఇంట్లో గణేష్ ఉత్సవాలు, నిమజ్జనానికి సంబంధించిన వీడియో ఇప్పుడు సోషల్ మీడియాలో వైరల్ అవుతోంది. ఈ వీడియోను మహేష్ భార్య నమ్రతా షిరోద్కర్ తన ఇన్‌స్టాగ్రామ్ లో షేర్ చేసింది. ఇందులో మహేష్ తనయుడు గౌతమ్, కూతురు సితార కలిసి గణపతిని ఇంట్లోనే ఓ డ్రమ్ములో నిమజ్జనం చేయడం చూడొచ్చు.

వినాయక చవితి సందర్భంగా మహేష్ బాబు, నమ్రత అభిమానులకు శుభాకాంక్షలు చెప్పారు. తమ ఇంట్లోని గణపతి ఫొటోను షేర్ చేశారు. ఇక తాజాగా ఆ గణపతి విగ్రహాన్ని నిమజ్జనం చేశారు. అయితే ఈ వీడియోలో మహేష్ బాబుకానీ, నమ్రత కానీ కనిపించలేదు. గౌతమ్, సితారలే ఇంట్లోని పనివాళ్లతో కలిసి నిమజ్జనం చేసినట్లు వీడియో చూస్తే తెలుస్తోంది.

ఈ నిమజ్జనం ఎలా చేయాలో కూడా వాళ్లే గౌతమ్, సితారలకు చెప్పడం విశేషం. ఇంట్లోని గణపతిని గౌతమ్ ఎత్తుకొని ముందు నడవగా.. వెనుక సితార, ఇంట్లోని ఇతర పనివాళ్లు నడిచారు. ఈ వీడియోను నమ్రత షేర్ చేస్తూ.. "గణపతి బప్ప మోరయా.. వచ్చే ఏడాది మళ్లీ రా" అంటూ తన మాతృభాష మరాఠీలో రాసింది. ఈ వీడియోకు ఇన్‌స్టాలో వేల సంఖ్యలో లైక్స్, కామెంట్స్ వస్తున్నాయి.

సోషల్ మీడియాలో గౌతమ్ పెద్దగా కనిపించకపోయినా.. సితార మాత్రం యాక్టివ్ గానే ఉంటుంది. తాను చేసే డ్యాన్స్ వీడియోలు షేర్ చేస్తుంటుంది. ఈ మధ్యే ఆమె ఒక యాడ్ లోనూ నటించిన విషయం తెలిసిందే. ఇక గౌతమ్ ఈ మధ్యే తన 17వ పుట్టిన రోజు జరుపుకున్నాడు.

ఇక మహేష్ బాబు విషయానికి వస్తే ప్రస్తుతం అతడు గుంటూరు కారం మూవీలో నటిస్తున్నాడు. త్రివిక్రమ్ డైరెక్షన్ లో వస్తున్న ఈ సినిమా వచ్చే ఏడాది సంక్రాంతి సందర్భంగా ప్రేక్షకుల ముందుకు రానుంది. ఈ సినిమాలో శ్రీలీల, మీనాక్షి చౌదరి నటిస్తున్నారు. ఈ సినిమా తర్వాత మహేష్.. రాజమౌళితో కలిసి ఓ భారీ బడ్జెట్ మూవీ చేయబోతున్నాడు.