Kangana Ranaut Tweet: హిందూ మగాళ్లూ.. మీ రక్తాన్ని కాస్త మరిగించండి: బాలీవుడ్ నటి, ఎంపీ మరో వివాదాస్పద ట్వీట్

Kangana Ranaut Tweet: వివాదాలకు కేరాఫ్ అయిన బాలీవుడ్ నటి, బీజేపీ ఎంపీ కంగనా రనౌత్ సోమవారం (జులై 29) చేసిన ట్వీట్ తీవ్ర దుమారం రేపుతోంది. మొహర్రం సెలబ్రేషన్స్ లో భాగంగా కొందరు ముస్లింలు కత్తులతో తమ శరీరాన్ని కోసుకుంటూ రక్తం చిందిస్తున్న వీడియోను ఆమె షేర్ చేస్తూ.. ఇది చాలా వింతగా ఉందని కామెంట్ చేసింది. అదే సమయంలో హిందువులకు కూడా ఓ వార్నింగ్ ఇచ్చింది.

హిందూ మగాళ్లూ.. రక్తం మరిగించుకోండి

మొహర్రం సందర్భంగా ముస్లిం యువకులు రక్తం చిందిస్తూ చేసే విన్యాసాలు చాలా వింతగా, భయానకంగా ఉన్నాయంటూ కంగనా రనౌత్ కామెంట్ చేసింది. సోషల్ మీడియాలో వైరల్ అయిన ఓ వీడియోను సునందా రాయ్ అనే వ్యక్తి ఎక్స్ అకౌంట్లో షేర్ చేశారు. "ఇదేం సెలబ్రేషన్స్? లిబరల్స్ అండ్ ఇస్లామిస్ట్స్: ప్రపంచంలో అత్యంత శాంతియుత సెలబ్రేషన్ కదా" అనే క్యాప్షన్ తో ఈ వీడియో పోస్ట్ చేశారు.

ఈ ట్వీట్ ను కంగనా రీట్వీట్ చేస్తూ చేసిన కామెంట్ సంచలనం రేపుతోంది. "ఇది చాలా వింతగా, భయానకంగా ఉంది. కానీ ఇలాంటి ప్రపంచంలో మనుగడ సాగించాలంటే హిందూ మగాళ్లు కూడా ఏదో ఒక రకమైన యుద్ధ విద్యలో శిక్షణ తీసుకోవాల్సిన అవసరం ఉంది కదూ? ఇలాంటి పరిస్థితులు చూస్తుంటే.. మీ రక్తాన్ని కూడా కాస్త మరగించుకోవడంలో తప్పేం లేదు.. కాదంటారా?" అని కంగనా ట్వీట్ చేసింది.

ఈ ట్వీట్ వెంటనే వైరల్ గా మారింది. హిందువులను రెచ్చగొట్టేలా ఇలాంటి ట్వీట్ చేయడమేంటని కొందరు కంగనాను నిలదీశారు. ఓ ఎంపీ స్థాయి వ్యక్తి ఇలాంటి ట్వీట్ చేయడాన్ని తప్పుబడుతున్నారు.

ఎంపీగా తొలి స్పీచ్

కంగనా రనౌత్ ఇప్పుడు బాలీవుడ్ నటి మాత్రమే కాదు.. లోక్‌సభ ఎంపీ కూడా. రెండు నెలల కిందట జరిగిన ఎన్నికల్లో ఆమె మండి నియోజకవర్గం నుంచి ఎంపీగా విజయం సాధించింది. ఆ తర్వాత ఈ మధ్యే పార్లమెంట్ లో ఎంపీగా తొలిసారి మాట్లాడింది. తన సొంత రాష్ట్రం హిమాచల్ ప్రదేశ్ కళలు, భవన సాంప్రదాయాలను సంరక్షించాలని ఆమె గళమెత్తింది. పార్లమెంట్ లో జీరో హవర్ సందర్భంగా ఆమె మాట్లాడింది.

కంగనా రనౌత్ ఎంపీగా ఉండటంతోపాటు సినిమాల్లోనూ కొనసాగుతోంది. ఆమె నటించి, డైరెక్ట్ చేసిన ఎమర్జెన్సీ మూవీ త్వరలోనే రిలీజ్ కాబోతోంది. ఈ సినిమాలో ఆమె మాజీ ప్రధాని ఇందిరా గాంధి పాత్రలో నటిస్తోంది. ఈ సినిమా ఇప్పటికే పలుమార్లు వాయిదా పడింది.