Fahadh Faasil Remuneration: పుష్ప 2 కోసం ఫాహద్ అంత రెమ్యూనరేషన్ తీసుకున్నారా? ఫస్ట్ పార్ట్ కంటే ఎంత ఎక్కువంటే..

పుష్ప 2: ది రూల్ చిత్రం కోసం సినీ ప్రేక్షకులు వేయికళ్లతో నిరీక్షిస్తున్నారు. సుకుమార్ దర్శకత్వంలో ఐకాన్ స్టార్ అల్లు అర్జున్ హీరోగా నటిస్తున్న ఈ మూవీపై హైప్ ఆకాశమంత ఉంది. మూడేళ్ల కిందట వచ్చి పాన్ ఇండియా రేంజ్‍లో సెన్సేషనల్ హిట్ అయిన పుష్పకు సీక్వెల్‍గా ఈ చిత్రం గ్రాండ్ స్కేల్‍లో రూపొందుతోంది. ఈ చిత్రంలో మలయాళ స్టార్ హీరో ఫాహద్ ఫాజిల్ విలన్ పాత్ర పోషిస్తున్నారు. ఈ మూవీ కోసం ఫాహద్ ఎంత రెమ్యూనరేషన్ తీసుకున్నారో సమాచారం తాజాగా చక్కర్లు కొడుతోంది.

పుష్పలో ఎస్‍పీ భన్వర్ సింగ్ షెకావత్‍గా పోలీస్ ఆఫీసర్ పాత్రలో ఫాహద్ ఫాజిల్ నటిస్తున్నారు. ‘పుష్ప 1’లో సెకండాఫ్‍లో వచ్చిన ఈ క్యారెక్టర్ బాగా పాపులర్ అయింది. ఈ పాత్రలోనూ ఫాహద్ తనదైన ముద్ర వేశారు. క్లైమాక్స్ కూడా అదిరిపోయింది. పుష్ప 2: ది రూల్‍లో ఫాహద్ నటించిన భన్వర్ సింగ్ షెకావత్‍దే మెయిన్ విలన్‍ రోల్.

రెమ్యూనరేషన్ ఇదే!

పుష్ప 2 సినిమా కోసం ఫాహద్ ఫాజిల్ ఏకంగా రూ.7.2 కోట్ల రెమ్యూనరేషన్ తీసుకున్నారని సమాచారం బయటికి వచ్చింది. పుష్ప 1తో పోలిస్తే ఇది దాదాపు రెట్టింపుగా ఉంది. తొలి భాగం కోసం ఫాహద్ సుమారు రూ.3.5 కోట్ల రెమ్యూనరేషన్ తీసుకున్నారు. పుష్ప 2లో ఫుల్ లెంగ్త్ రోల్ కావడం, మంచి క్రేజ్ వచ్చేయడంతో రూ.7.2 కోట్ల రెమ్యూనరేషన్ అందుకుంటున్నారని టాక్. ఈ విషయంపై మూవీ ట్రేడ్ అనలిస్ట్ మనోబాల విజయబాలన్ కూడా ట్వీట్ చేశారు.

స్పెషల్ టీజర్

పుష్ప 2 సినిమా నుంచి ఫాహద్ ఫాజిల్ పాత్రతో ఓ స్పెషల్ టీజర్ తీసుకొచ్చేందుకు దర్శకుడు సుకుమార్ ఆలోచిస్తున్నారని తెలుస్తోంది. మంచి క్రేజ్ ఉన్న ఈ పాత్రతో టీజర్ తెస్తే క్రేజ్ మరింత పెరుగుతోందని మేకర్స్ భావిస్తున్నారట. రానున్న రోజుల్లో పుష్ప 2 నుంచి ఫాహద్ టీజర్ వచ్చే అవకాశాలు ఉన్నాయి.

ఈ ఏడాది మలయాళ మూవీ ఆవేశంతో ఫాహద్ ఫాజిల్ బ్లాక్‍బస్టర్ కొట్టారు. మలయాళ ఇండస్ట్రీలో స్టార్ హీరోగా కొనసాగుతున్నారు. మరోవైపు తెలుగు, తమిళం చిత్రాలు కూడా చేస్తున్నారు. రజినీకాంత్ హీరోగా నటించిన వేట్టయన్ మూవీలో ఫాహద్ కీలకపాత్ర పోషించారు. ఈ చిత్రం అక్టోబర్ 10న విడుదల కానుంది. మలయాళంలో హీరోగా మరో రెండు చిత్రాలను ఫాహద్ చేస్తున్నారు. తెలుగులో డోంట్ ట్రబుల్ ది ట్రబుల్, ఆక్సిజన్ చిత్రాలు కూడా ఆయన లైనప్‍లో ఉన్నాయి. ఈ సినిమాలను దర్శక ధీరుడు రాజమౌళి సమర్పించనుండగా.. ఆయన కుమారుడు కార్తికేయ నిర్మించనున్నారు.

కాగా, పుష్ప 2: ది రూల్ మూవీ ఈ ఏడాది డిసెంబర్ 6వ తేదీన థియేటర్లలో రిలీజ్ కానుంది. ప్రస్తుతం షూటింగ్ జోరుగా సాగుతోంది. త్వరలోనే పూర్తిగా సాగుతోంది. చిత్రీకరణ జరుగుతుండగా.. పోస్ట్ ప్రొడక్షన్ పనులు కూడా శరవేగంగా సాగుతున్నాయి. ఈ చిత్రంలో అల్లు అర్జున్‍కు జోడీగా రష్మిక మందన్నా నటిస్తున్నారు. ఫాహద్‍తో పాటు జగదీశ్ ప్రతాప్ బండారీ, జగపతి బాబు, ప్రకాశ్ రాజ్, సునీల్ ముఖ్యమైన పాత్రలు పోషిస్తున్నారు. మైత్రీ మూవీ మేకర్స్ నిర్మిస్తున్న ఈ సినిమాకు దేవీ శ్రీప్రసాద్ సంగీతం అందిస్తున్నారు.