Chiranjeevi: సల్మాన్‌తో స్టెప్పేయడం ఆనందంగా ఉంది.. చిరు ట్వీట్

ఆచార్య ఫ్లాప్‌తో మెగాస్టార్ చిరంజీవి తన తర్వాతి చిత్రాలపై ఫోకస్ పెట్టారు. ఈ సారి ఎలాగైన సూపర్ హిట్ కొట్టాలని బలంగా ఉన్నారు. ప్రస్తుతం ఆయన మలయాళ హిట్ చిత్రం లూసిఫర్‌కు రీమేక్‌గా తెరకెక్కుతున్న గాడ్‌ఫాదర్ చిత్రంలో నటిస్తున్నారు. ఇందులో బాలీవుడ్ స్టార్ సల్మాన్ ఖాన్‌ కూడా కీలక పాత్ర పోషిస్తున్నారు. అయితే వీరిద్దరూ కలిసి ఓ పాటకు స్టెప్పేయనున్నారనే సంగతి తెలిసిందే. తమన్ సంగీతాన్ని అందిస్తున్న ఈ పాటలో ఈ సూపర్‌స్టార్లు కాలు కదపనున్నారు. తాజాగా ఈ పాటకు సంబంధించిన అప్డేట్‌ను మన మెగాస్టార్ ట్విటర్ వేదికగా పంచుకున్నారు. సల్మాన్‌తో స్టెప్పేయడం ఆనందంగా ఉందని ఆయన అన్నారు.

"గాడ్ ఫాదర్ సినిమా కోసం ప్రభుదేవా కొరియోగ్రఫీలో సల్మాన్‌ ఖాన్‌తో కలిసి స్టెప్పేయడం ఆనందంగా ఉంది. కచ్చితంగా మీకు కన్నుల పండుగలా ఉంటుందని అనుకుంటున్నా" అంటూ మెగాస్టార్ తన ట్వీట్‌లో పేర్కొన్నారు.

ఆటం బాంబింగ్ అంటూ సాగే ఈ పాటకు ఇండియన్ మైఖేల్ జాక్సన్ ప్రభుదేవా కొరియోగ్రాఫ్ చేస్తున్నారు. చిరంజీవి-సల్మాన్ ఖాన్ కలిసి నర్తించనున్న ఈ పాట కోసం అభిమానుల ఆత్రుతగా ఎదురుచూస్తున్నారు. స్క్రీన్‌పై వారిని చూడటం కన్నుల పండుగలా మారనుంది. ప్రభుదేవా కొరియోగ్రాఫ్ చేయడంతో సినిమాపై అంచనాలు కూడా భారీగా పెరిగాయి. మోహన్ రాజా ఈ సినిమాకు దర్శకత్వం వహిస్తున్నారు.

ప్రస్తుతం గాడ్‌ఫాదర్ చిత్ర షూటింగ్ ఫైనల్ స్టేజీలో ఉంది. నయనతార ఈ సినిమాలో కీలక పాత్ర పోషిస్తోంది. సత్యదేవ్ కూడా ముఖ్యమైన క్యారెక్టర్ చేస్తున్నారు. నిరవ్ షా సినిమాటోగ్రాఫర్‌గా పనిచేస్తోన్న ఈ సినిమాలో టాప్ క్లాస్ టెక్నికల్ టీమ్ పనిచేస్తోంది. తమన్ సంగీత సారథ్యం వహిస్తుండగా.. సురేశ్ సెల్వరాజన్ ఆర్ట్ డైరెక్టర్‌గా పనిచేస్తున్నారు. ఈ చిత్రాన్ని మెగా సూపర్ గుడ్ ఫిల్మ్స్ పతాకంపై ఆర్బీ చైదురీ, ఎన్వీ ప్రసాద్, సురేఖ కొణిదెల నిర్మిస్తున్నారు. ఈ ఏడాదే ఈ చిత్రాన్ని ప్రేక్షకుల ముందుకు తీసుకొచ్చే అవకాశముంది.