Chiranjeevi: కైకాలతో కేక్‌ కట్‌ చేయించిన మెగాస్టార్‌.. ఫొటో వైరల్‌

టాలీవుడ్‌ వెటరన్‌ నటుడు, నవసర నటనా సార్వభౌముడు కైకాల సత్యనారాయణ సోమవారం (జులై 25) తన పుట్టిన రోజు వేడుకలు జరుపుకున్నాడు. ఈ సందర్భంగా మెగాస్టార్‌ చిరంజీవి స్పెషల్‌ అప్పియరెన్స్‌ ఫ్యాన్స్‌ను ఆకట్టుకుంది. ఈ ఇద్దరూ కలిసి ఎన్నో సినిమాల్లో కలిసి నటించారు. ఆరు దశాబ్దాలుగా తెలుగు సినీ రంగంలో తనకంటూ ఓ ప్రత్యేక గుర్తింపు తెచ్చుకున్న కైకాల తన 87వ పుట్టినరోజు జరుపుకున్నాడు.

ఈ సందర్భంగా చిరంజీవి అతని చేత కేక్‌ కట్‌ చేయించాడు. ఈ ఫొటోను అతడు తన ట్విటర్‌లో షేర్‌ చేశాడు. చిరంజీవితోపాటు కైకాల కుటుంబ సభ్యులు ఈ సెలబ్రేషన్స్‌లో పాలుపంచుకున్నారు. "కైకాల సత్యనారాయణ గారి పుట్టినరోజు నాడు ఆయనను కలవడం చాలా ఆనందంగా ఉంది. ఆయన ఆయురారోగ్యాలతో ఉండాలని ఆ భగవంతుడిని ప్రార్థిస్తున్నాను" అని చిరంజీవి ట్వీట్‌ చేశాడు.

వృద్ధాప్య సంబంధిత అనారోగ్యంతో చాలా రోజులుగా కైకాల మంచానికే పరిమితమయ్యారు. అయితే తన బర్త్‌డేనాడు ఇంటికి వచ్చిన చిరంజీవిని చూసి కైకాల ఎంతో సంతోషించారు. కాసేపు ఇద్దరూ హాయిగా నవ్వుకున్నారు. 1935లో జన్మించిన కైకాల సత్యనారాయణ ఇప్పటివరకూ 777 సినిమాల్లో నటించడం విశేషం. యముడికి మొగుడు, రుద్రవీణ, గ్యాంగ్‌లీడర్‌, రౌడీ అల్లుడు, ముగ్గురు మొనగాళ్లులాంటి మరెన్నో సినిమాల్లో చిరంజీవి, కైకాల కలిసి నటించారు.