CCL Telugu Warriors: ధ‌నాధ‌న్ బ్యాటింగ్‌తో తెలుగు వారియ‌ర్స్‌ను ఫైన‌ల్ చేర్చిన త‌మ‌న్

CCL Telugu Warriors: సెల‌బ్రిటీ క్రికెట్ లీగ్‌లో (సీసీఎల్‌) తెలుగు వారియ‌ర్స్ జ‌ట్టు ఫైన‌ల్ చేరుకున్న‌ది. . శుక్ర‌వారం వైజాగ్ వేదిక‌గా జ‌రిగిన సెమీస్‌లో క‌ర్నాట‌క బుల్డోజ‌ర్స్‌పై ఆరు వికెట్ల తేడాతో తెలుగు వారియ‌ర్స్ విజ‌యాన్ని సాధించింది. తెలుగు వారియ‌ర్స్ జ‌ట్టులో బ్యాటింగ్‌లో త‌మ‌న్‌, అశ్విన్‌బాబు, బౌలింగ్‌లో సామ్రాట్‌, జోషి రాణించారు.

ఈ మ్యాచ్‌లో టాస్ గెలిచిన తెలుగు వారియ‌ర్స్ జ‌ట్టు కెప్టెన్ అఖిల్ అక్కినేని క‌ర్నాట‌క బుల్డోజ‌ర్స్‌కు బ్యాటింగ్ అప్ప‌గించాడు. క‌ర్నాట‌క బుల్డోజ‌ర్స్ ఫ‌స్ట్ ఇన్నింగ్స్‌లో 99 ప‌రుగులు చేసింది. కెప్టెన్ ప్ర‌దీప్ హాఫ్ సెంచ‌రీ చేశాడు.

తెలుగు వారియ‌ర్స్ బౌల‌ర్ సామ్రాట్ నాలుగు వికెట్లు తో ఆక‌ట్టుకున్నాడు. తెలుగు వారియ‌ర్స్ ఫ‌స్ట్ ఇన్నింగ్స్‌లో ప‌ది ఓవ‌ర్ల‌లో 95 ప‌రుగులు మాత్ర‌మే చేసింది. అశ్విన్ బాబు 36 ప‌రుగుల‌తో ఒంట‌రి పోరాటం చేశాడు.

ఆ త‌ర్వాత సెకండ్ ఇన్నింగ్స్‌లో క‌ర్నాట‌క 98 ప‌రుగులు చేయ‌గా...త‌మ‌న్ బ్యాటింగ్ మెరుపుల‌తో మ‌రో రెండు బాల్స్ మిగిలుండ‌గానే టార్గెట్ చేరుకున్న తెలుగు వారియ‌ర్స్ ఫైన‌ల్‌లో అడుగుపెట్టింది.

తెలుగు వారియ‌ర్స్ క‌ష్టాల్లో ఉన్న స‌మ‌యంలో బ్యాటింగ్ దిగిన త‌మ‌న్ 15 బాల్స్‌లో ఒక సిక్స‌ర్‌, రెండు ఫోర్ల‌తో 25 ర‌న్స్ చేశాడు. రోష‌న్ 27, ర‌ఘు 22 ర‌న్స్ చేశారు. టైటిల్ కోసం శ‌నివారం ఫైన‌ల్‌లో భోజ్‌పూరి ద‌బాంగ్స్‌తో తెలుగు వారియ‌ర్స్ పోరుకు సిద్ధ‌మైంది.