Animal vs Salaar in Netflix: సలార్‌ను మించిన యానిమల్.. వారంలోనే నెట్‌ఫ్లిక్స్‌లో రికార్డులు

Animal vs Salaar in Netflix: రణ్‌బీర్ కపూర్, రష్మిక మందన్నా నటించిన యానిమల్ మూవీ థియేటర్లలోనే కాదు ఓటీటీలోనూ అదే దూకుడు ప్రదర్శిస్తోంది. ఈ ఎ సర్టిఫికెట్ మూవీ.. అంతకుముందే నెట్‌ఫ్లిక్స్ లోకి వచ్చిన మరో ఎ సర్టిఫికెట్ ప్రభాస్ మూవీ సలార్ ను మించిపోయింది.

టాప్ ట్రెండింగ్ మూవీస్ లోనే కాదు.. వ్యూస్ విషయంలోనూ సలార్ కు అందనంత ఎత్తుకు దూసుకెళ్లింది. ప్రస్తుతం యానిమల్ మూవీ నెట్‌ఫ్లిక్స్ ఇండియా టాప్ ట్రెండింగ్ మూవీస్ లో టాప్ ప్లేస్ లో ఉండటం విశేషం.

యానిమల్ దూకుడు

సలార్ మూవీ థియేటర్లలో రిలీజైనప్పుడు షారుక్ ఖాన్ డంకీ నుంచి గట్టి పోటీ ఎదురైంది. అది మూవీ వసూళ్లపై ప్రభావం చూపింది. ఇక ఇప్పుడు సలార్ కు నెట్‌ఫ్లిక్స్ ఓటీటీలో రణ్‌బీర్ కపూర్ యానిమల్ కూడా అంతకుమించి పోటీ ఇస్తోంది. సందీప్ రెడ్డి వంగా డైరెక్షన్ లో వచ్చిన యానిమల్ మూవీ బాక్సాఫీస్ దగ్గర రూ.900 కోట్లకుపైగా గ్రాస్ వసూళ్లు సాధించిన విషయం తెలిసిందే.

ఇక ఇప్పుడు నెట్‌ఫ్లిక్స్ టాప్ ట్రెండింగ్ మూవీస్ లోనూ యానిమల్ టాప్ లో ఉంది. ఇంగ్లిషేతర భాషల సినిమాలు తీసుకున్నా యానిమల్ టాప్ 5లో ఉంది. జనవరి 26న రిపబ్లిక్ డే సందర్భంగా ఓటీటీలో అడుగుపెట్టింది యానిమల్ మూవీ. ఈ సినిమా వారం రోజుల్లోనే 62 లక్షల వ్యూస్ సొంతం చేసుకుంది. అంతేకాదు 20.8 మిలియన్ గంటల వ్యూయర్షిప్ నమోదైంది.

సలార్ కంటే చాలా ఎక్కువే..

అదే సలార్ విషయానికి వస్తే అంతకు వారం ముందే అంటే జనవరి 20న నెట్‌ఫ్లిక్స్ లోకి వచ్చింది. తొలి వారంలో ఈ సినిమాకు 16 లక్షల వ్యూస్ మాత్రమే వచ్చాయి. అంటే సలార్ తో పోలిస్తే యానిమల్ రికార్డు వ్యూస్ సొంతం చేసుకుంది. ప్రస్తుతం సలార్ కు రెండో వారంలో 19 లక్షల వ్యూస్ వచ్చాయి. తొలి వారం కంటే రెండో వారంలో 19 శాతం ఎక్కువ వ్యూస్ రావడం విశేషం.

నెట్‌ఫ్లిక్స్ లో సలార్ కంటే యానిమల్ మూవీ వ్యూస్ 226 శాతం ఎక్కువ. ప్రస్తుతం యానిమల్ టాప్ లో ఉండగా.. సలార్ తెలుగు వెర్షన్ మూడో స్థానంలో ఉంది. ఇక సలార్ తమిళ వెర్షన్ 10వ స్థానంలో కొనసాగుతోంది. ఇవి రెండే కాదు.. మరో తెలుగు సినిమా హాయ్ నాన్న ఇప్పటికీ 9వ స్థానంలో ఉండగా.. మూవీ హిందీ వెర్షన్ హాయ్ పాపా ఐదో స్థానంలో ఉంది.

యానిమల్ మూవీ ప్రపంచవ్యాప్తంగా రూ.900 కోట్లకుపైగా వసూలు చేసింది. ఇప్పుడీ మూవీ సీక్వెల్ యానిమల్ పార్క్ కూడా రానుంది. వచ్చే ఏడాది ఈ మూవీ షూటింగ్ లో రణ్‌బీర్ పాల్గొననున్నాడు. యానిమల్ రిలీజ్ అవకముందే తాను సీక్వెల్ తీస్తున్నట్లు డైరెక్టర్ సందీప్ రెడ్డి వంగా చెప్పాడు. అటు యానిమల్ మూవీకిగాను బెస్ట్ యాక్టర్ గా రణ్‌బీర్ కపూర్ ఫిల్మ్ ఫేర్ అవార్డు కూడా అందుకున్న విషయం తెలిసిందే.