Animal Advance Bookings: యానిమల్ అడ్వాన్స్ బుకింగ్స్‌.. హైదరాబాద్‌లో ఎగబడుతున్న ఫ్యాన్స్

Animal Advance Bookings: యానిమల్ మూవీకి ఏ రేంజ్ క్రేజ్ ఉందో అడ్వాన్స్ బుకింగ్స్ తోనే స్పష్టమవుతోంది. బాలీవుడ్ స్టార్ హీరో రణ్‌బీర్ కపూర్, నేషనల్ క్రష్ రష్మిక మందన్నా నటించిన ఈ సినిమా వచ్చే శుక్రవారం (డిసెంబర్ 1) ప్రేక్షకుల ముందుకు రానుంది. అయితే గురువారం (నవంబర్ 23) సాయంత్రం నుంచే కొన్ని చోట్ల అడ్వాన్స్ బుకింగ్స్ మొదలయ్యాయి.

యానిమల్ ట్రైలర్ రిలీజైన కాసేపటికే బుకింగ్స్ ప్రారంభం కావడంతో ఫ్యాన్స్ ఎగబడ్డారు. ఈ ట్రైలర్ సినిమాపై ఉన్న అంచనాలను మరో రేంజ్ కు తీసుకెళ్లింది. లవర్ బాయ్ రణ్‌బీర్ ను ఓ బీస్ట్ మోడ్ లో చూపించిన ఈ ట్రైలర్ ఫుల్ వయోలెన్స్ తో ముఖ్యంగా యువతను ఆకట్టుకునేలా ఉంది. అంతకుముందు రిలీజైన టీజర్, పాటల్లో రణ్‌బీర్, రష్మిక మధ్య ఉన్న హాట్ లిప్ లాక్ లు మరింత ఆకర్షించాయి.

అర్జున్ రెడ్డి ఫేమ్ సందీప్ రెడ్డి వంగా డైరెక్ట్ చేసిన సినిమా కావడంతో యానిమల్ కు రిలీజ్ కు ముందే మంచి క్రేజ్ ఏర్పడింది. ముఖ్యంగా హైదరాబాద్ లో ఈ సినిమా అడ్వాన్స్ బుకింగ్స్ కు ఊహించని రెస్పాన్స్ వస్తోంది. గురువారం సాయంత్రం 5 గంటలకు బుకింగ్స్ ప్రారంభం కాగా.. టికెట్లు హాట్ కేకుల్లా అమ్ముడయ్యాయి. కొన్ని గంటల వ్యవధిలోనే 5 వేల టికెట్లు అమ్ముడైపోవడం విశేషం.

అడ్వాన్స్ బుకింగ్స్ ప్రారంభించిన అన్ని స్క్రీన్లు దాదాపు హౌజ్ ఫుల్ అయ్యాయి. ప్రస్తుతానికి కొన్ని స్క్రీన్ల బుకింగ్సే ప్రారంభమయ్యాయి. ఈ అడ్వాన్స్ బుకింగ్స్ ఆదివారం (నవంబర్ 26) నుంచి పూర్తి స్థాయిలో ప్రారంభం కానున్నాయి. మరోవైపు ఓవర్సీస్ లోనూ ఈ సినిమా బుకింగ్స్ కు మంచి రెస్పాన్స్ వస్తోంది. అమెరికా, కెనడాల్లో ఓపెనింగ్ వీకెండ్ కోసం డిమాండ్ ఎక్కువగా ఉంది.

యానిమల్ మూవీ ట్రైలర్ ప్రేక్షకుల్లో ఉన్న ఆసక్తిని మరింత పెంచింది. ఇందులో రణ్‌బీర్, బాబీ డియోల్, అనిల్ కపూర్, రష్మిక నటన మరో లెవెల్లో ఉంది. ముఖ్యంగా రణ్‌బీర్, బాబీ డియోల్ మధ్య ఫైట్ తో ట్రైలర్ ముగించిన తీరు.. చివర్లో రక్తపు మడుగులో పడి ఉన్న రణ్‌బీర్ పై పడుకొని బాబీ డియోల్ సిగరెట్ వెలిగించే సీన్ అభిమానులను ఆకర్షించింది. ఈ సినిమాలో వయోలెన్స్ ఎక్కువగా ఉండటంతో ఎ సర్టిఫికెట్ ఇచ్చారు. ఇక మూవీ 3 గంటల 22 నిమిషాల నిడివి కావడం మరో విశేషం.