Ind vs SL 1st ODI: శ్రీలంకతో టీమిండియా తొలి వన్డే.. తుది జట్టు, లైవ్ స్ట్రీమింగ్ వివరాలు ఇవే

Ind vs SL 1st ODI: శ్రీలంకతో జరిగిన మూడు టీ20ల సిరీస్ ను క్లీన్ స్వీప్ చేసి కాన్ఫిడెంట్ గా ఉన్న టీమిండియా ఇప్పుడు మూడు వన్డేల సిరీస్ కు సిద్ధమైంది. అందులో భాగంగా తొలి వన్డే శుక్రవారం (ఆగస్ట్ 2) జరగనుంది. రోహిత్ శర్మ, విరాట్ కోహ్లి, కేఎల్ రాహుల్, శ్రేయస్ అయ్యర్ లాంటి సీనియర్లు తిరిగి రావడంతో ఈ మ్యాచ్ కు తుది జట్టు ఎలా ఉంటుంది? లైవ్ స్ట్రీమింగ్ ఎప్పుడు, ఎక్కడ చూడాలో తెలుసుకోండి.

ఇండియా, శ్రీలంక తొలి వన్డే

ఇండియా, శ్రీలంక మధ్య తొలి వన్డే శుక్రవారం (ఆగస్ట్ 2) కొలంబోలోని ప్రేమదాస స్టేడియంలో జరగనుంది. ఓ వన్డే సిరీస్ లో శ్రీలంక.. ఇండియాను ఎప్పుడో 27 ఏళ్ల కిందట ఓడించింది. 1997లో అర్జున రణతుంగ కెప్టెన్సీలోని లంక టీమ్.. 3-0తో వన్డే సిరీస్ గెలిచిన తర్వాత ఇప్పటి వరకు మరో ద్వైపాక్షిక సిరీస్ ఆ టీమ్ గెలవలేదు. ఈ నేపథ్యంలో ఈ సిరీస్ కు కూడా ఇండియన్ టీమే ఫేవరెట్ అనడంలో సందేహం లేదు.

ఇక 2006 నుంచి స్వదేశంలోనూ ఇండియా చేతుల్లో వరుసగా 8 ద్వైపాక్షిక సిరీస్ లలో ఓడిపోయింది. అంతేకాదు తాజాగా టీ20 సిరీస్ లోనూ వైట్ వాష్ కు గురవడంతో ఆ టీమ్ తీవ్ర ఒత్తిడిలో ఉంది. ఈ నేపథ్యంలో తొలి వన్డేలో ఆ టీమ్ ఎలా ఆడుతుందన్నది ఆసక్తికరంగా మారింది. సీనియర్ల రాకతో మరింత పటిష్టంగా మారిన ఇండియన్ టీమ్.. తమ ఆధిపత్యాన్ని కొనసాగిస్తుందేమో చూడాలి.

ఇండియా, శ్రీలంక తొలి వన్డే లైవ్ స్ట్రీమింగ్

ఇండియా, శ్రీలంక మధ్య తొలి వన్డే కొలంబోలోని ప్రేమదాస స్టేడియంలో శుక్రవారం (ఆగస్ట్ 2) మధ్యాహ్నం 2.30 గంటల నుంచి ప్రారంభం అవుతుంది. సిరీస్ లోని మూడు మ్యాచ్ లూ ఇదే స్టేడియంలో జరగనున్నాయి. ఈ మ్యాచ్ లను సోనీ స్పోర్ట్స్ 1, సోనీ స్పోర్ట్స్ 5, సోనీ స్పోర్ట్స్ టెన్ 3, సోనీ స్పోర్ట్స్ టెన్ 4 ఛానెల్స్ లో చూడొచ్చు. ఇక సోనీలివ్ ఓటీటీలో లైవ్ స్ట్రీమింగ్ ఉంటుంది. ఈ ఓటీటీ యాప్, వెబ్‌సైట్ లలో మ్యాచ్ చూడొచ్చు. అయితే ఫ్రీ స్ట్రీమింగ్ అవకాశం లేదు. సోనీలివ్ కు సబ్‌స్క్రైబ్ చేసుకోవాల్సిందే.

టీమిండియా తుది జట్టు అంచనా

రోహిత్ శర్మ (కెప్టెన్), శుభ్‌మన్ గిల్, విరాట్ కోహ్లి, శ్రేయస్ అయ్యర్, రిషబ్ పంత్/కేఎల్ రాహుల్, శివమ్ దూబె, అక్షర్ పటేల్, కుల్దీప్ యాదవ్, ఖలీల్ అహ్మద్/హర్షిత్ రాణా, అర్ష్‌దీప్ సింగ్, మహ్మద్ సిరాజ్

టీమ్స్ ఫామ్ ఇలా..

ఇండియా, శ్రీలంక చివరి ఐదు వన్డేల ఫామ్ చూస్తే.. రెండు టీమ్స్ ఒకేలా ఉన్నాయి. చివరి ఐదు వన్డేల్లో టీమిండియా రెండు గెలిచి, మూడింట్లో ఓడిపోయింది. అటు శ్రీలంక కూడా చివరి ఐదు వన్డేల్లో రెండు ఓడిపోయి, మూడు గెలిచింది. ఈ నేపథ్యంలో తొలి వన్డేలో ఎవరు పైచేయి సాధిస్తారన్న ఆసక్తి నెలకొంది.