Ind vs Aus Betting odds: వరల్డ్ కప్ ఫైనల్‌పై వేల కోట్ల బెట్టింగ్.. టీమిండియానే వాళ్ల ఫేవరెట్

Ind vs Aus Betting odds: ఇండియా, ఆస్ట్రేలియా మధ్య జరగనున్న వరల్డ్ కప్ 2023 ఫైనల్లో ఫేవరెట్ ఎవరు? ప్రపంచవ్యాప్తంగా ఈ మెగా ఫైనల్ పై నడుస్తున్న బెట్టింగ్ లో మాత్రం ఇండియానే ఫేవరెట్ అని తేల్చేవారు. టోర్నీలో ఓటమెరగని జట్టుగా ఉన్న ఇండియన్ టీమ్ పై భారీగా పందెం కాస్తున్నారు. అహ్మదాబాద్ లోని నరేంద్ర మోదీ స్టేడియంలో మధ్యాహ్నం 2 గంటలకు ఈ మ్యాచ్ ప్రారంభం కానున్న విషయం తెలిసిందే.

టీమిండియానే ఫేవరెట్

ఆస్ట్రేలియాలోని బెట్టింగ్ సంస్థ స్పోర్ట్స్‌బెట్ (Sportsbet) ఇండియా గెలిస్తే ఒకటికి 1.4 రెట్లు ఆఫర్ చేస్తోంది. అదే ఆస్ట్రేలియాపై ఇది ఏకంగా 2.9 రెట్లు కావడం విశేషం. ఆ లెక్కన ఇండియానే ఫేవరెట్ అని తేల్చేశారు. గెలిచే అవకాశాలు ఎక్కువగా ఉన్న జట్టుపై తక్కువ మొత్తం ఆఫర్ చేస్తుంటారు. ఆస్ట్రేలియాలోనూ తమ జట్టు గెలుస్తుందన్న నమ్మకం లేదని ఈ బెట్టింగ్స్ తేలుస్తున్నాయి.

ఇక ఇటు యూకేకు చెందిన బెట్‌ఫెయిర్ కూడా దాదాపు ఇలాగే ఆఫర్ చేస్తున్నాయి. ఇండియా గెలిస్తే 1.49 రెట్లు ఇస్తామని, అదే ఆస్ట్రేలియా గెలిస్తే 3 రెట్లు ఇవ్వనున్నట్లు చెప్పడం విశేషం. ఇండియాలో మాత్రం బెట్టింగ్ చట్ట విరుద్ధం. కేవలం గుర్రపు పందేలు మాత్రమే మన దేశంలో లీగల్. దీంతో అధికారికంగా ఈ ఫైనల్ పై బెట్టింగ్ జరగడం లేదు. అనధికారికంగా మాత్రం ఈ ఫైనల్ సందర్భంగా వేల కోట్లు చేతులు మారనున్నాయి.

బెట్టింగ్ మార్కెట్ అనలిస్టులు కూడా ఇండియా ఫేవరెట్ అని తేల్చేశారు. ఇండియాపైనే ఎక్కువ మంది పందెం కాస్తున్నట్లు చెబుతున్నారు. అహ్మదాబాద్ లోని నరేంద్ర మోదీ స్టేడియంలో జరగనున్న ఈ మ్యాచ్ ను లక్షా 30 వేల మంది ప్రత్యక్షంగా చూస్తారని అంచనా. ఈ మ్యాచ్ కు ప్రధాని నరేంద్ర మోదీ కూడా వస్తున్నారు. మాజీ కెప్టెన్లు ధోనీ, కపిల్ దేవ్ తోపాటు మరెంతో మంది క్రీడా, సినీ, రాజకీయ ప్రముఖులు ఈ ఫైనల్ చూడనున్నారు.

ఈ ఫైనల్ మ్యాచ్ కోసం 6 వేల మందితో భద్రతా ఏర్పాట్లు చేశారు. ప్రధాని కూడా వస్తుండటంతో నరేంద్ర మోదీ స్టేడియం పూర్తిగా భద్రతా బలగాల గుప్పిట్లోకి వెళ్లిపోయింది.