YouTube new rules : భారత్​లో యూట్యూబ్​ కొత్త రూల్స్​- ఇలా చేస్తే ఇక మీ వీడియో డౌన్​..

వీక్షకులను తప్పుదోవ పట్టించే విధంగా ఉండే ‘క్లిక్​బైట్​’ వీడియోలపై కఠినంగా వ్యవహరిస్తున్నట్టు యూట్యూబ్​ ప్రకటించంది. తప్పుదోవ పట్టించే విధంగా ఉండే హెడ్​లైన్స్​, థంబ్​నెయిల్స్​తో కూడిన వీడియోలను తొలగిస్తామని భారతీయ కంటెంట్​ క్రియేటర్స్​ని హెచ్చరించింది. ఈ మేరకు కఠినమైన నిబంధనలను అమలు చేసే ప్రణాళికలను ప్రకటించింది.

బ్రేకింగ్ న్యూస్, కరెంట్ ఈవెంట్స్​పై ప్రభావం

"విపరీతమైన క్లిక్​బైట్" కలిగి ఉన్న వీడియోలను తొలగిస్తామని ఆల్ఫాబెట్ యాజమాన్యంలోని యూట్యూబ్​ డిసెంబర్ 18న ఒక బ్లాగ్ పోస్ట్​లో పేర్కొంది. ఇటువంటి క్లిక్​బైట్ వీక్షకులను తప్పుదోవ పట్టిస్తుందని, వారు మోసపోతారని, నిరాశ చెందుతారని యూట్యూబ్​ ఒక బ్లాగ్ పోస్ట్​లో వివరించింది. బ్రేకింగ్ న్యూస్, కరెంట్ ఈవెంట్​కి సంబంధించిన కంటెంట్​ని నిశితంగా పరిశీలిస్తామని యూట్యూబ్ పేర్కొంది.

ఉదాహరణకు, "ది ప్రెసిడెంట్ రాజీనామా" లేదా "బ్రేకింగ్ పొలిటికల్ న్యూస్" వంటి శీర్షికలతో ఆకర్షణీయమైన థంబ్​నెయిల్స్​తో జతచేసిన వీడియోలు ఇప్పుడు ఆ వాగ్దానాలను నెరవేర్చకపోతే యూట్యూబ్ లేటెస్ట్​ రూల్స్​ని ఉల్లంఘించినట్టే!

కంటెంట్ క్రియేటర్ల కోసం విద్యా కార్యక్రమాలను ప్రవేశపెట్టడం ద్వారా క్లిక్​బైట్​ని ఎదుర్కోవడానికి యూట్యూబ్ గతంలో చేసిన ప్రయత్నాలను అనుసరించి ఈ చర్య తీసుకుంది. అయితే తప్పుదోవ పట్టించే శీర్షికలు, థంబ్​నెయిల్స్ ఉన్న వీడియోలను కేవలం ఫ్లాగ్ చేయడం లేదా రద్దు చేయడం కాకుండా పూర్తిగా తొలగిస్తామని తాజా విధాన మార్పులు స్పష్టం చేస్తున్నాయి.

క్రియేటర్స్​ జాగ్రత్త.!

తొలుత యూట్యూబ్ మోసపూరిత శీర్షికలు లేదా థంబ్​నెయిల్స్ ఉన్న వీడియోలను తొలగిస్తుంది కానీ క్రియేటర్ల ఛానళ్లకు స్ట్రైక్స్ జారీ చేయదు. ఈ విధానం సృష్టికర్తలకు తక్షణ శిక్షలు లేకుండా వారి పద్ధతులను సర్దుబాటు చేయడానికి అవకాశాన్ని అందిస్తుంది. అయితే బ్రేకింగ్ న్యూస్ లేదా కరెంట్ ఈవెంట్లను ఎలా నిర్వచిస్తారో కంపెనీ ఇంకా స్పష్టం చేయలేదు. లేదా విపరీతమైన క్లిక్​బైట్​ని ఉపయోగించే వీడియోలను ఎలా గుర్తిస్తుందో పేర్కొనలేదు. అంతేకాకుండా క్రియేటర్లు తమ వీడియోలను తొలగించడంపై ఎలా అప్పీల్ చేయవచ్చనే వివరాలను యూట్యూబ్ ఇంకా చెప్పలేదు.

లేటెస్ట్​గా అప్​లోడ్ చేసిన వీడియోలపై యూట్యూబ్​ దృష్టి పెడుతుంది. అయితే కొత్త నిబంధనలను ఉల్లంఘించే పాత కంటెంట్ సైతం పరిశీలనలోకి వచ్చే అవకాశం ఉంది. క్రియేటర్లు వారి మునుపటి అప్​లోడ్​లను సమీక్షించమని, నవీకరించిన విధానాలకు అనుగుణంగా వాటిని మార్చుకోవాలని సూచిస్తున్నారు. "విపరీతమైన క్లిక్​బైట్" అంటే ఏంటి? దానిని ఎలా నివారించాలో అర్థం చేసుకోవడానికి యూట్యూబ్​ క్రియేటర్స్​కి సహాయపడటానికి వనరులను అందించాలని ప్లాట్​ఫామ్ యోచిస్తోంది.

వీక్షకులకు, ఈ మార్పు తప్పుదోవ పట్టించే కంటెంట్​తో నిరాశను తగ్గించడం ద్వారా వారి అనుభవాన్ని మెరుగుపరుస్తుంది. మోసపూరిత వ్యూహాలను ఛేదించడం ద్వారా, ఖచ్చితమైన, సంబంధిత కంటెంట్​ని అందించడానికి వీక్షకులు వారు చూసే వీడియోలపై ఆధారపడే మరింత నమ్మదగిన వాతావరణాన్ని పెంపొందించాలని యూట్యూబ్ భావిస్తోంది. కొత్త మార్గదర్శకాలు అమల్లోకి రావడంతో, భారతీయ క్రియేటర్లు ఎలా స్పందిస్తారో, ఈ ప్రమాణాలకు అనుగుణంగా వారి కంటెంట్​ని ఎలా సర్దుబాటు చేస్తారో చూడటం ఆసక్తికరంగా ఉంటుంది.