ITR Refund : ఆదాయపు పన్ను రిఫండ్ వచ్చేందుకు ఈ లింక్‌ క్లిక్ చేయండి.. ఇలాంటి మెసేజ్ వస్తే జాగ్రత్త!
18 August 2024, 19:30 IST
Share
- ITR Refund Fraud : ఇటీవలి కాలంలో ఆన్‌లైన్ మోసాలు ఎక్కువైపోయాయి. చాలా మంది తెలిసి తెలిసి కూడా తప్పులు చేస్తున్నారు. తర్వాత డబ్బులు పోయాయని నెత్తి నోరు కొట్టుకుంటున్నారు. తాజాగా ఇప్పుడు ఐటీఆర్ రిఫండ్ గురించి నేరగాళ్లు మీకు వల వేసే అవకాశం ఉంది. జాగ్రత్తగా ఉండాలని ఆదాయపు పన్నుశాఖ హెచ్చరిస్తోంది.
ఐటీఆర్ స్కామ్
టెక్నాలజీ అభివృద్ధి చెందడంతో డిజిటల్ మోసాలు కూడా పెరుగుతున్నాయి. ఈ మోసాలు ఆదాయపు పన్ను శాఖను కూడా వదలడం లేదు. ఆదాయపు పన్ను చెల్లింపు లేదా ఆదాయపు పన్ను రిఫండ్‌కు సంబంధించిన ఫేక్ మెసేజ్‌ల గురించి తెలుసుకోవాలని ఆదాయపు పన్ను శాఖ నోటిఫికేషన్ ఇచ్చింది. పన్ను చెల్లింపుదారులు తమ ఆదాయపు పన్ను రిఫండ్‌కు సంబంధించి ఫేక్ కాల్‌లు, మెసేజ్‌లను పాటించకుండా అప్రమత్తంగా ఉండాలని సూచించారు.
వివరాలు ఇవ్వొద్దు
పన్ను చెల్లింపుదారులకు ఆదాయపు పన్ను రిఫండ్ గురించి ఫేక్ మెసేజ్ వస్తే.. దాన్ని అధికారిక వెబ్‌సైట్‌లో తనిఖీ చేయాలని ఐటీ శాఖ ఎక్స్‌లో పోస్ట్ చేసింది. ఫేక్ ఇమెయిల్‌లకు స్పందించవద్దు, క్రెడిట్ కార్డ్ నంబర్‌లు, బ్యాంక్ ఖాతా వివరాలు లేదా ఏదైనా ఇతర రహస్య సమాచారాన్ని అడిగే వెబ్‌సైట్‌ల లింక్‌లపై క్లిక్ చేయవద్దు. అవసరమైతే పన్ను చెల్లింపుదారులు వారు అందించిన ఇమెయిల్ చిరునామా ద్వారా సంప్రదిస్తామని ఆదాయపు పన్ను శాఖ తెలిపింది. ఇన్‌కమ్ ట్యాక్స్‌కు సంబంధించిన ఎలాంటి కాల్‌లను అంగీకరించవద్దు. నేరగాళ్లు కోరిన వివరాలను ఇవ్వకూడదని ఆదాయపు పన్ను శాఖ తెలిపింది.
నకిలీ మెసేజ్‌లు
ఇప్పుడు చాలా మంది ఆదాయపు పన్ను చెల్లించిన తర్వాత పన్ను వాపసు పొందడానికి చూస్తున్నారు. చాలా మందికి ఇంకా వాపసు అందలేదు. స్కామర్లు ఇప్పుడు వాపసు కోసం ఎదురుచూస్తున్న వారిని టార్గెట్ చేసుకుంటున్నారు. నకిలీ సందేశాలను పంపుతున్నారు. నకిలీ సందేశాలు ఇలా రావొచ్చు.
'రూ.20,000- ఆదాయపు పన్ను వాపసు ఆమోదించబడింది. త్వరలో మొత్తం మీ ఖాతాకు జమ చేస్తారు. దాని కోసం దయచేసి మీ ఖాతా నంబర్ 5XXXX7888ను చెక్ చేయండి. ఇది సరైనది కాకపోతే, దయచేసి లింక్‌ని సందర్శించడం ద్వారా మీ బ్యాంక్ ఖాతా సమాచారాన్ని అప్‌డేట్ చేయండి.' అని రావొచ్చు.
కంప్లైంట్ ఇవ్వండి
పన్ను చెల్లింపుదారులు అటువంటి నకిలీ, మోసపూరిత ఇమెయిల్‌లను ఆదాయపు పన్ను శాఖ అధికారిక వెబ్‌సైట్‌కు మెయిల్ చేయాలి. మీరు webmanager@incometax.gov.inకి నకిలీ సందేశాల వివరాలను పంపవచ్చు. మరొక కాపీని incident@cert-in.org.in కి పంపవచ్చు. మీకు ఫిషింగ్ ఇమెయిల్ వస్తే దాన్ని incident@cert-in.org.inకి పంపండి.
ఓటీపీ చెప్పకండి
పన్ను అధికారులుగా చెప్పుకునే నకిలీ లింక్‌లను తెరవవద్దని లేదా నకిలీ సందేశాలు పంపవద్దని ఆదాయపు పన్ను శాఖ పన్ను చెల్లింపుదారులను హెచ్చరించింది. పన్ను చెల్లింపుదారులు ఎలాంటి లింక్‌లపై క్లిక్ చేయకూడదు. OTP పాస్‌వర్డ్ లేదా ఆధార్ సమాచారం వంటి గోప్యమైన సమాచారాన్ని సురక్షితంగా ఉంచమని కూడా ఐటీ శాఖ హెచ్చరించింది. తర్వాత డబ్బులు పొగొట్టుకోవాల్సి వస్తుంది. ఆ విషయం గుర్తుంచుకోవాలి.