Electric scooter : సింగిల్​ ఛార్జ్​తో 211 కి.మీ రేంజ్​- ఈ రెట్రో ఎలక్ట్రిక్​ స్కూటర్​ ఫ్యామిలీ కోసమే!

ఇండియాలో ఎలక్ట్రిక్​ వాహనాలకు మంచి డిమాండ్​ కనిపిస్తోంది. మరీ ముఖ్యంగా 2 వీలర్​ ఎలక్ట్రిక్​ స్కూటర్స్​ కొనేందుకు ప్రజలు ఆసక్తిగా కనిపిస్తున్నారు. వీరిలో మీరూ ఉన్నారా? అయితే ఇది మీకోసమే! రెట్రో థీమ్​తో మార్కెట్​లో అందుబాటులో ఉన్న ఈప్లూటో 7జీ మ్యాక్స్​ ఫ్యామిలీ ఎలక్ట్రిక్​ స్కూటర్​ ఫీచర్స్​, రేంజ్​, ధరతో పాటు ఇతర వివరాలను ఇక్కడ చూసేయండి..

ఇదే ది బెస్ట్​ ఫ్యామిలీ ఎలక్ట్రిక్​ స్కూటర్​..!

ప్యూర్ ఈవీ అనే సంస్థ ఈ ఈప్లూటో 7జీ మ్యాక్స్​ ఎలక్ట్రిక్​ స్కూటర్​ని మార్కెట్​లోకి తీసుకొచ్చింది. దీని ఎక్స్​షోరూం ధర రూ. 1,14,999. ఈ రెట్రో థీమ్ ఎలక్ట్రిక్ స్కూటర్​కి మంచి డిమాండ్​ కనిపిస్తోంది.

ఈ ఎలక్ట్రిక్ స్కూటర్​ని ఒక్కసారి ఛార్జ్ చేస్తే 211 కిలోమీటర్ల రేంజ్​ ఇస్తుందని సంస్థ చెబుతోంది. అలాగే, హిల్ స్టార్ట్ అసిస్ట్, డౌన్​హిల్​అసిస్ట్, కోస్టింగ్ రెజెన్, రివర్స్ మోడ్, బ్యాటరీ లాంగ్​ లైఫ్​ కోసం స్మార్ట్ ఏఐ వంటి అధునాతన ఫీచర్లు ఈ ఈవీలో ఉన్నాయి. రెట్రో థీమ్ ఎలక్ట్రిక్ స్కూటర్.. మ్యాట్ బ్లాక్, రెడ్, గ్రే, వైట్ అనే నాలుగు విభిన్న కలర్ ఆప్షన్లలో లభిస్తుంది.

ఈ ఎలక్ట్రిక్ స్కూటర్​లో 3.5 కిలోవాట్ల లిథియం-అయాన్ బ్యాటరీ ప్యాక్ ఉంది. ఇది 3.21 బిహెచ్​పీ పీక్​ పవర్​ని జనరేట్​ చేయగల ఎలక్ట్రిక్ మోటారుతో కనెక్ట్​ చేసి ఉంటుంది. ఆర్టిఫిషియల్ ఇంటెలిజెన్స్ (ఏఐ) ఆధారిత స్మార్ట్ బ్యాటరీ మేనేజ్​మెంట్ సిస్టమ్​తో ఏఐఎస్-156 సర్టిఫైడ్ బ్యాటరీ ప్యాక్ దీని సొంతం. ఈ స్కూటర్ మూడు విభిన్న రైడింగ్ మోడ్​లను పొందుతుంది. ఈ స్కూటర్ 60,000 కిలోమీటర్ల స్టాండర్డ్ బ్యాటరీ వారంటీతో వస్తుందని, 70,000 కిలోమీటర్ల ఎక్స్​టెండెడ్ వారంటీ కూడా ఉందని ప్యూర్ ఈవీ తెలిపింది.

ఈప్లూటో 7జీ మ్యాక్స్ డిజైన్ గురించి మాట్లాడితే..ఈ స్కూటర్ ఎల్​ఈడీ లైట్లు, పూర్తి డిజిటల్ ఇన్​స్ట్రుమెంట్ క్లస్టర్ వంటి ఆధునిక అంశాలతో కూడిన ఓల్డ్​-స్కూల్​ డిజైన్​ని కలిగి ఉంది. ఈ స్కూటర్ స్మార్ట్ రీజెనరేటివ్ టెక్నాలజీని కలిగి ఉందని తయారీదారు పేర్కొన్నారు. రైడర్ సౌలభ్యాన్ని పెంచే రివర్స్ మోడ్ అసిస్ట్, పార్కింగ్ అసిస్ట్ ఫీచర్లు ఇందులో ఉన్నాయి. ఆటో పుష్ ఫంక్షన్​తో, ఎలక్ట్రిక్​ స్కూటర్​ గంటకు ఐదు కిలోమీటర్ల స్థిరమైన వేగంతో ముందుకు కదులుతుంది. అంటే రైడర్ దానిని మాన్యువల్​గా నెట్టాల్సిన అవసరం లేదు.

ఈప్లూటో 7జీ మ్యాక్స్ ఎలక్ట్రిక్​ స్కూటర్​పై ప్యూర్ ఈవీ సహ వ్యవస్థాపకుడు, సీఈఓ రోహిత్ వడేరా మాట్లాడుతూ.. రోజుకు 100 కిలోమీటర్ల దూరం ప్రయాణించే వినియోగదారులను లక్ష్యంగా చేసుకుని 7జీ మోడల్ అప్​గ్రేడ్ వెర్షన్​ను రూపొందించినట్లు తెలిపారు. అంటే ఈ ఫ్యామిలీ ఎలక్ట్రిక్​ స్కూటర్​ని నగర ప్రయాణాలకు ఎక్కువగా వాడుకోవచ్చు.