NEET-UG 2024: సుప్రీంకోర్టులో నీట్-యూజీ 2024 కేసు విచారణ వాయిదా; రీ టెస్ట్ పరిస్థితి ఏంటి?

NEET-UG 2024: నేషనల్ ఎలిజిబిలిటీ ఎంట్రన్స్ టెస్ట్-అండర్ గ్రాడ్యుయేట్ 2024 (NEET-UG 2024) లో పేపర్ లీకేజీలు, ఇతర అవకతవకలకు సంబంధించి దాఖలైన పిటిషన్లపై విచారణను సుప్రీంకోర్టు జూలై 18కి వాయిదా వేసింది. కేంద్రం, నేషనల్ టెస్టింగ్ ఏజెన్సీ (NTA) దాఖలు చేసిన అఫిడవిట్లు కొన్ని పక్షాలకు అందలేదని, అలాగే, ఈ కేసును, ఈ కేసులో వివిధ పక్షాలు సమర్పించిన అఫిడవిట్లను పూర్తి స్థాయిలో అధ్యయనం చేయాల్సి ఉందని సుప్రీంకోర్టు ప్రధాన న్యాయమూర్తి జస్టిస్ డీవై చంద్రచూడ్ నేతృత్వంలోని త్రిసభ్య ధర్మాసనం పేర్కొంది. దాంతో, ఈ కేసు విచారణ ఈ నెల 18వ తేదీకి వాయిదా పడింది. సుప్రీంకోర్టు జూలై 8న ఇచ్చిన ఆదేశాలకు అనుగుణంగా కేంద్రం, ఎన్టీఏ తమ అఫిడవిట్లను దాఖలు చేశాయని ధర్మాసనం పేర్కొంది.

కేంద్రం అఫిడవిట్

నీట్-యూజీ 2024 (NEET-UG 2024) పేపర్ లీకేజీ కేసులో దాఖలైన పిటిషన్లకు సంబంధించి కేంద్రం తమ అఫిడవిట్ ను గురువారం ధర్మాసనం ముందు ఉంచింది. నీట్ యూజీ 2024 (NEET-UG 2024) పరీక్షను మళ్లీ నిర్వహించాలన్న వాదనను కేంద్రం తీవ్రంగా వ్యతిరేకిస్తోంది. కొన్ని ఎంపిక చేసిన కేంద్రాల్లో అభ్యర్థులకు విస్తృత అవకతవకలు, అక్రమ ప్రయోజనాలు జరిగాయన్న ఆరోపణలను ఐఐటీ మద్రాస్ సమగ్ర నివేదిక తోసిపుచ్చిందని కేంద్రం తన అఫిడవిట్ లో పేర్కొంది. నీట్-యూజీ 2024లో మాస్ మాల్ ప్రాక్టీస్ జరగలేదని తెలిపింది.

47 మంది అభ్యర్థులు మాత్రమే

ఓఎంఆర్ షీట్లకు సంబంధించి ఇప్పటివరకు కేవలం 47 మంది (పాట్నాలో 17 మంది, గోద్రాలో 30 మంది) అభ్యర్థులు మాత్రమే పేపర్ లీకేజీ, అవకతవకలకు పాల్పడినట్లు అనుమానిస్తున్నామని ఎన్టీఏ సుప్రీంకోర్టుకు అఫిడవిట్ సమర్పించింది. పరీక్ష నిర్వహణ విధానాన్ని ఓఎంఆర్ (పెన్ను, పేపర్) నుంచి ఆన్లైన్ పరీక్షలకు మార్చే అంశాన్ని పరిశీలిస్తున్నట్లు తెలిపింది. మే 5న జరిగిన నీట్-యూజీ 2024 పరీక్షలో పేపర్ లీకేజీ, కొంతమంది విద్యార్థులకు గ్రేస్ మార్కులు ఇవ్వడం వంటి వివాదాలు చెలరేగిన విషయం తెలిసిందే. ఈ కేసును దర్యాప్తు చేస్తున్న సీబీఐ ఇప్పటి వరకు ఎనిమిది మందిని అరెస్టు చేసింది.

అడ్వొకేట్ అందుబాటులో ఉండడం లేదని..

ఈ వివాదంలో కేంద్రం తరఫున వాదిస్తున్న సొలిసిటర్ జనరల్ తుషార్ మెహతా జూలై 15, 16 తేదీల్లో అందుబాటులో లేకపోవడంతో విచారణను జూలై 18కి వాయిదా వేసింది. జూన్ 23న ఈ కేసులో స్టేటస్ రిపోర్టును సీబీఐ కూడా సమర్పించిందని, దానిని తదుపరి తేదీన పరిశీలిస్తామని సీజేఐ వ్యాఖ్యానించారు. కాగా, పరీక్షా ప్రక్రియను బలోపేతం చేయడానికి, ఇస్రో మాజీ చైర్మన్, ఐఐటి కాన్పూర్ బోర్డ్ ఆఫ్ గవర్నర్స్ చైర్మన్ కె రాధాకృష్ణన్ నేతృత్వంలో ఉన్నత స్థాయి నిపుణుల కమిటీని ప్రభుత్వం ఏర్పాటు చేసిందని కేంద్రం తెలిపింది. ఎన్టీఏ నిర్వహించే భవిష్యత్ పరీక్షల్లో పారదర్శకత, దృఢత్వాన్ని పెంపొందించే చర్యలను ఈ కమిటీ సిఫారసు చేస్తుంది.

ఐఐటీ మద్రాస్ విశ్లేషణ

ఐఐటీ మద్రాస్ 2023, 2024 సంవత్సరాల్లో నీట్ యూజీ పరీక్షలో టాప్ 140000 ర్యాంకులను విశ్లేషించింది. ఏదైనా కేంద్రాలు లేదా నగరాలు అవకతవకల కారణంగా పెద్ద సంఖ్యలో విద్యార్థులకు అనవసరమైన ప్రయోజనం కలిగించే సంకేతాలను చూపించాయో లేదో తెలుసుకోవడం లక్ష్యంగా ఈ విశ్లేషణ జరిగింది. జూలై 10న విడుదల చేసిన ఈ నివేదికలో భారీ అవకతవకలు, స్థానికంగా ఉన్న అభ్యర్థులు అనవసరంగా లబ్దిపొందుతున్న సూచనలు కనిపించలేదు. వివిధ నగరాలు, కేంద్రాల్లో అధిక మార్కుల పంపిణీ స్థిరంగా సాగింది. భారీ అవకతవకలు జరిగిన దాఖలాలు గానీ, స్థానికంగా ఉన్న అభ్యర్థులకు లబ్ధి చేకూర్చడం గానీ అసాధారణ స్కోర్లకు దారితీసే సూచనలు కనిపించడం లేదని విశ్లేషణలో వెల్లడైంది.

550 నుంచి 720 వరకు

ముఖ్యంగా నీట్ యూజీ 2024 (NEET-UG 2024) లో విద్యార్థులు సాధించిన మార్కులు 550 నుంచి 720 (మొత్తం స్కోరు) వరకు పెరిగాయి. నగరాలు, కేంద్రాల్లో ఈ పెరుగుదల కనిపిస్తోంది. సిలబస్ లో 25 శాతం కోత విధించడమే ఇందుకు కారణమని చెబుతున్నారు. అంతేకాకుండా, ఇంత ఎక్కువ మార్కులు సాధించిన అభ్యర్థులు బహుళ నగరాలు, బహుళ కేంద్రాలలో విస్తరించి ఉన్నారు, ఇది పేపర్ లీకేజీకి చాలా తక్కువ అవకాశం ఉన్న విషయాన్ని సూచిస్తుంది" అని కేంద్రం అఫిడవిట్లో పేర్కొంది.