Rasam Vada: జ్యూసీ రసం వడలు, మీ రుచి దాహం తీర్చే అల్పాహారం

మామూలుగా చేసే మినప్పప్పు సాంబార్ వడలకు ఈ రసం వడలకు చాలా వ్యత్యాసం ఉంది. రసం వడలకు మినప్పప్పు వాడరు. అలాగే రసం తయారీ కూడా భిన్నంగా, చాలా సులువుగా ఉంటుంది. జ్యూసీగా ఉండే ఈ వడలు తింటే తృప్తిగా అనిపిస్తుంది. వీటి తయారీ చూసేయండి.

రసం వడ తయారీకి కావాల్సిన పదార్థాలు:

2 కప్పులు శనగపప్పు

1 ఉల్లిపాయ, సన్నటి ముక్కల తరుగు

4 పచ్చిమిర్చి

అరచెంచా అల్లం తరుగు

కరివేపాకు రెమ్మ

తగినంత ఉప్పు

డీప్ ఫ్రైకి సరిపడా నూనె

రసం కోసం:

నిమ్మకాయ సైజు చింతపండు

4 కప్పుల నీళ్లు

అరచెంచా జీలకర్ర పొడి

అరచెంచా కారం

టీస్పూన్ ఇంగువ

చెంచాడు వెల్లుల్లి ముద్ద

1 రెమ్మ కరివేపాకు

రసం వడ తయారీ విధానం:

1. ముందుగా రసం తయారీ చేసుకోవాలి. దానికోసం చింతపండును నానబెట్టి గుజ్జు తీసుకుని పెట్టుకోవాలి.
2. స్టవ్ వెలిగించి లోతుగా ఉన్న కడాయి పెట్టుకోవాలి.
3. చింతపండు గుజ్జును ఈ కడాయిలో వేసుకోవాలి. నాలుగు కప్పుల నీళ్లు పోసుకోవాలి. అందులోనే జీలకర్ర పొడి, కారం, ఇంగువ, ఉప్పు, వెల్లుల్లి ముద్ద వేసుకోవాలి.
4. కరివేపాకు కూడా వేసుకుని అన్నీ బాగా ఉడికిపోయేలా చూడాలి. ఒక రెండుసార్లు ఉడుకు వచ్చాక కారం, ఉప్పు చెక్ చేసుకోండి. వడకు రసం సిద్ధం అయినట్లే.
5. వడల తయారీ కోసం శనగపప్పును రెండు గంటలు నానబెట్టుకుని మిక్సీలో బరకగా పట్టుకోవాలి.
6. ఈ ముద్దలో ఉల్లిపాయ ముక్కలు, పచ్చిమిర్చి, కరివేపాకు తరుగు, ఉప్పు,అల్లం తరుగు వేసుకుని కలుపుకోవాలి.
7. వీటిని వడల్లాగా లేదా బోండాల ఆకారంలో చేసుకుని డీప్ ఫ్రై చేసుకోవాలి. రంగు బంగారు వర్ణంలోకి వస్తే సరిపోతుంది.
8. ఇప్పడు వేడిగా ఉన్న రసంలోనే ఈ వడల్ని వేసుకోవాలి. సన్నం మంట మీద కనీసం 5 నిమిషాలు ఉడికించుకోవాలి. స్టవ్ కట్టేసి మరో అరగంట పాటూ అలాగే వదిలేయాలి.
9. దీంతో వడలు రసం ఫ్లేవర్ పీల్చుకుని జ్యూసీగా తయారవుతాయి. ఒక్కసారి ప్రయత్నిస్తే ఇంటిల్లీపాదికీ నచ్చే ఫేవరైట్ అల్పాహారం అవుతుందిది.