Vijay Sethupathi as Vibhishan: విభీషణుడిగా విజయ్ సేతుపతి.. రణ్‌బీర్ రామాయణంపై మరో ఇంట్రెస్టింగ్ అప్డేట్

Vijay Sethupathi as Vibhishan: ఆదిపురుష్ తర్వాత పాన్ ఇండియాలో లెవల్లో మరో రామాయణం మూవీ సిద్ధమవుతోంది. ఈసారి బాలీవుడ్ నటుడు రణ్‌బీర్ కపూర్ రాముడిగా నటిస్తున్న ఈ మూవీ మూడు భాగాలుగా రానుంది.

అయితే ఈ సినిమాలో తమిళ నటుడు విజయ్ సేతుపతి విభీషణుడిగా నటించబోతున్నాడన్న వార్త ఆసక్తి రేపుతోంది. ఇప్పటికే ఈ పాత్ర కోసం డైరెక్టర్ నితేష్ తివారీ అతన్ని కలిసినట్లు కూడా పింక్‌విల్లా రిపోర్ట్ వెల్లడించింది.

రణ్‌బీర్ రామాయణంలో విజయ్?

రణ్‌బీర్ కపూర్ నటిస్తున్న ఈ రామాయణం ఇండియాలో అత్యధిక బడ్జెట్ తో రూపొందిన సినిమాల్లో ఒకటిగా నిలవబోతోంది. అయితే ఈ మూవీకి సంబంధించి తరచూ ఏదో ఒక ఇంట్రెస్టింగ్ అప్డేట్ వస్తూనే ఉంది. ముఖ్యంగా ఇందులో నటించబోయే వారి వివరాలు ఆసక్తి రేపుతున్నాయి. తాజాగా విభీషణుడి పాత్ర కోసం విజయ్ సేతుపతి అనేది కూడా అలాంటి వార్తే.

విలక్షణమైన నటనతో సౌత్ లోనే కాదు హిందీ ప్రేక్షకులకు కూడా విజయ్ దగ్గరయ్యాడు. ఫర్జీ వెబ్ సిరీస్, మెర్రీ క్రిస్మస్ లాంటి సినిమాలతో నార్త్ లోనూ పేరు సంపాదించాడు. దీంతో రామాయణంలో రావణుడి తమ్ముడు అయిన విభీషణుడి పాత్రను విజయ్ కు ఇవ్వాలని డైరెక్టర్ నితేష్ తివారీ భావిస్తున్నాడు. ఈ ప్రతిపాదనతోనే ఈ మధ్యే అతన్ని కలిసినట్లు ఆ రిపోర్ట్ వెల్లడించింది.

మూవీ గురించి నితేష్ వివరించిన తీరు చూసి ఫిదా అయిపోయిన విజయ్ సేతుపతి.. మూవీలో నటించడానికి ఆసక్తి చూపినా ఇంకా అధికారికంగా సంతకం చేయలేదని తెలుస్తోంది. రామాయణంలో విభీషణుడి పాత్రకు ప్రత్యేక స్థానం ఉంది. ఎప్పుడూ ధర్మం వైపే నిలబడాలన్న ఆలోచనతో అన్న రావణుడికి వ్యతిరేకంగా రాముడి వైపు వచ్చిన వ్యక్తి అతడు. అలాంటి పాత్రకు ఇప్పటి వరకూ రామాయణంపై వచ్చిన ప్రతి సినిమా, సిరీస్ లో ప్రత్యేక స్థానం లభించింది.

ఈ రామాయణంలో ఎవరెవరు?

తాజాగా రామాయణంపై వస్తున్న ఈ మూడు భాగాల సినిమాలో రాముడిగా రణ్‌బీర్ కపూర్, సీతగా సాయి పల్లవి దాదాపు ఫైనల్ అయినట్లు తెలిసింది. ఇక రావణుడి పాత్ర కోసం కన్నడ స్టార్ యశ్ ను అనుకుంటున్నట్లు వార్తలు వస్తున్నాయి. హనుమంతుడి పాత్ర కోసం సన్నీ డియోల్, కుంభకర్ణుడి పాత్ర కోసం బాబీ డియోల్, కైకేయి పాత్ర కోసం లారా దత్తాలను తీసుకోవాలని డైరెక్టర్ భావిస్తున్నట్లూ తెలిసింది.

అయితే ఇప్పటి వరకూ వీళ్లలో ఇంకా ఎవరినీ ఫైనల్ చేయలేదు. రామాయణంలో తొలి పార్ట్ 2025, దీపావళికి తీసుకురావాలని మేకర్స్ భావిస్తున్నారు. ముందుగా అన్ని పాత్రలకు నటీనటులను ఎంచుకున్న తర్వాత మూవీ ప్రీప్రొడక్షన్ పనులు ప్రారంభం కానున్నాయి. ప్రస్తుతానికైతే రణ్‌బీర్ కపూర్.. సంజయ్ లీలా భన్సాలీ డైరెక్షన్ లో లవ్ అండ్ వార్ మూవీ చేయబోతున్నాడు.

అటు విజయ్ సేతుపతి కూడా గతేడాది వచ్చిన విడుదల పార్ట్ 1 సీక్వెల్ విడుదల పార్ట్ 2తోపాటు మహారాజ మూవీస్ లో నటిస్తున్నాడు. ఈ మధ్యే కత్రినా కైఫ్ తో మెర్రీ క్రిస్మస్ మూవీ తీసినా..అది బాక్సాఫీస్ దగ్గర పెద్దగా సక్సెస్ కాలేదు.