Bobby Deol in Ramayana: కుంభకర్ణుడిగా యానిమల్ విలన్.. కైకేయిగా లారా దత్తా.. నితీష్ తివారీ రామాయణం ఇది

Bobby Deol in Ramayana: యానిమల్‌లో అబ్రార్ అనే విలన్ పాత్ర పోషించిన సౌత్‌లోనూ పాపులర్ అయిన బాలీవుడ్ నటుడు బాబీ డియోల్.. ఇప్పుడు రామాయణంలో కుంభకర్ణుడిగా కనిపించనున్నట్లు తెలుస్తోంది. పాన్ ఇండియా లెవల్లో ఇప్పటికే ఆదిపురుష్, హనుమాన్ సినిమాలు రాగా.. తాజాగా దంగల్ ఫేమ్ నితీష్ తివారీ కూడా మరో రామాయణాన్ని తెరకెక్కిస్తున్నాడు.

ఈ రామాయణం మూవీలో కుంభకర్ణుడిగా బాబీ డియోల్, కైకేయిగా లారా దత్తాను అనుకుంటున్నట్లు సమాచారం. ఇక హనుమంతుడి పాత్ర కోసం బాబీ డియోల్ అన్న సన్నీ డియోల్ ను అనుకుంటున్నారు. ఈ పాత్రల కోసం ఇప్పటికే మేకర్స్ వాళ్లను సంప్రదించినట్లు పింక్‌విల్లాలో వచ్చిన రిపోర్ట్ వెల్లడించింది. అబ్రార్ పాత్రతో దేశవ్యాప్తంగా బాబీకి వచ్చిన పాపులారిటీని ఇలా వాడుకోవాలని మేకర్స్ భావిస్తున్నారు.

రణ్‌బీర్ కపూర్, సాయి పల్లవి రామాయణం

అదే యానిమల్ మూవీలో లీడ్ రోల్లో కనిపించిన బాలీవుడ్ నటుడు రణ్‌బీర్ కపూర్ రాముడిగా, సాయి పల్లవి సీతగా ఈ రామాయణాన్ని తెరకెక్కిస్తున్న విషయం తెలిసిందే. ఇందులో కేజీఎఫ్ స్టార్ యశ్.. రావణుడిగా కనిపించబోతున్నాడనీ వార్తలు వచ్చాయి. ఎంత విన్నా, ఎంత చూపించినా తరగని ఈ ఇతిహాసాన్ని భారీ స్థాయిలో తెరకెక్కించడానికి నితీష్ తివారీ సిద్ధమవుతున్నాడు. దీనికోసం పాత్రల ఎంపికలో అతడు చాలా జాగ్రత్తలు వహిస్తున్నాడు.

దశరథుడి మూడో భార్య, మొత్తం రామాయణానికి కారణమైన ప్రధాన వ్యక్తి కైకేయి పాత్ర కోసం లారా దత్తా అయితే సరిగ్గా సరిపోతుందని నితీష్ తివారీ భావిస్తున్నట్లు పింక్‌విల్లా రిపోర్ట్ వెల్లడించింది. ఈ రామాయణాన్ని మూడు భాగాలుగా తెరకెక్కించబోతున్నారు. మార్చిలో మొదటి పార్ట్ తొలి షెడ్యూల్ ప్రారంభం కానుంది. ఇందులోనే లారా దత్తా.. రణ్‌బీర్ కపూర్ తో కలిసి సెట్స్ లో చేరనున్నట్లు సమాచారం.

ఇక భారీ కాయంతో ఈ మధ్య విలన్ పాత్రలకు అతికినట్లు సరిపోతున్న బాబీ డియోల్ కు.. కుంభకర్ణుడి పాత్ర ఇస్తే ఎలా ఉంటుందన్నది డైరెక్టర్ ఆలోచనగా కనిపిస్తోంది. ఈ పాత్ర కోసం ఇప్పటికే బాబీని సంప్రదించినా.. అతడి నుంచి ఇంకా ఎలాంటి రెస్పాన్స్ రాలేదట. యానిమల్ సక్సెస్ తో ఇండస్ట్రీలో బాబీకి డిమాండ్ బాగా పెరిగింది.

అతనికి వరుస ఆఫర్లు క్యూ కడుతున్నాయి. ఈ నేపథ్యంలో ఈ కుంభకర్ణుడి పాత్రకు అతడు ఓకే చెబుతాడా లేదా అన్నది చూడాలి. అటు అతని అన్న సన్నీ డియోల్ ను.. హనుమంతుడి పాత్ర కోసం పరిశీలిస్తున్నారు. అయితే ఈ పాత్రలకు నటులు ఇంకా ఫైనల్ కాలేదు. ఇవే కాదు మిగిలిన పాత్రల కోసం కూడా నితీష్ తివారీ నటీనటుల వేటలో ఉన్నాడు.

ఈ రామయాణాన్ని రూ.700 కోట్లకుపైగా బడ్జెట్ తో తెరకెక్కించనున్నారు. ఇది ఇండియాలోనే అత్యధిక బడ్జెట్ కలిగిన సినిమాగా నిలవనుంది. పాన్ ఇండియా లెవల్లో స్టార్లతో నిండిపోనున్న ఈ మూవీలో రెమ్యునరేషన్ల రూపంలోనే భారీ మొత్తం ఖర్చయిపోనుంది. రాముడి పాత్ర పోషించనున్న రణ్‌బీర్ కపూర్ ఈ సినిమా కోసం రూ.75 కోట్ల రెమ్యునరేషన్ తీసుకుంటున్నట్లు సమాచారం.