Sai Pallavi: కొత్త సంవత్సరం వేళ సత్యసాయి సన్నిధిలో సాయి పల్లవి: వీడియో

Sai Pallavi: స్టార్ హీరోయిన్, లేడీ పవర్ స్టార్ సాయి పల్లవికి ఉన్న క్రేజ్ గురించి ప్రత్యేకంగా చెప్పాల్సిన అవసరం లేదు. బలమైన పాత్ర, ప్రాధాన్యత ఉంటే తప్ప ఆమె సినిమా చేయరు. సాయి పల్లవి నటిస్తున్నారంటే ఆ సినిమాలో ఏదో ప్రత్యేకత ఉంటుందని అనుకునేలా ఆమె పేరు తెచ్చుకున్నారు. సాయి పల్లవి అందం, అభినయంతో పాటు ఆమె సింప్లిసిటీని కూడా చాలా మంది తెగ ఇష్టపడతారు. సాయి పల్లవికి ఆధ్యాత్మిక కూడా చాలా ఎక్కువగా ఉంటుంది. అందుకే కొత్త సంవత్సర వేడుకలను కూడా ఆమె అదే రీతిలో జరుపుకున్నారు.

కొత్త సంవత్సరం 2024లోకి అడుగుపెడుతున్న వేళ (జనవరి 1) పుట్టపర్తి శ్రీ సత్యసాయి బాబా ఆలయం ‘ప్రశాంతి నిలయం’లో జరిగిన ఆధ్యాత్మిక వేడుకల్లో సాయి పల్లవి పాల్గొన్నారు. చక్కనైన చీర కట్టు, నిదుటన బొట్టుతో సంప్రదాయబద్ధంగా ఆమె భజనలో పాల్గొన్నారు. కొత్త సంవత్సర సందర్భాన్ని దేవుడి సన్నిధిలో ఆధ్యాత్మికతతో జరుపుకున్నారు.

సత్యసాయి సన్నిధిలో పాటలకు సాయి పల్లవి లీనమయ్యారు. కళ్లు మూసుకొని ఆధ్యాత్మికతలో మునిగిపోయారు. ఇందుకు సంబంధించిన వీడియోలు సోషల్ మీడియాలో వైరల్‍గా మారాయి. సాయి పల్లవిని చాలా మంది ప్రశంసిస్తున్నారు.

ఇతర సినీ సెలెబ్రిటీలతో పోలిస్తే భిన్నంగా ఆధ్యాత్మికతతో కొత్త సంవత్సర వేడుకలను జరుపుకున్న సాయి పల్లవిని పొగుడుతున్నారు నెటిజన్లు. సాయి పల్లవి అంటే ఇదీ అంటూ కొందరు కామెంట్స్ చేస్తున్నారు. అందుకే ఆమె ప్రత్యేకం అని కొందరు అభిప్రాయపడుతున్నారు. మొత్తంగా సాయి పల్లవి ఆధ్యాత్మికతను ప్రశంసిస్తున్నారు.

సినిమాల విషయానికొస్తే..

ప్రస్తుతం నాగ చైతన్య హీరోగా నటిస్తున్న తండేల్ సినిమాలో సాయి పల్లవి హీరోయిన్‍గా చేస్తున్నారు. చైతన్యతో రెండో జత కడుతున్నారు. గతంలో వీరద్దరూ కలిసి శేఖర్ కమ్ముల డైరెక్షన్‍లో లవ్ స్టోరీ చిత్రంలో నటించారు. ఇప్పుడు తండేల్‍లో మరోసారి వీరి కాంబినేషన్ రిపీట్ అవుతోంది. చందూ మొండేటీ దర్శకత్వం వహిస్తున్న తండేల్ షూటింగ్ కూడా మొదలైంది. ఈ మూవీలో శ్రీకాకుళం మత్స్యకారుడి పాత్రను నాగ చైతన్య పోషిస్తున్నారు.

బాలీవుడ్ దర్శకుడు నితేశ్ తివారీ తెరకెక్కించనున్న రామాయణం చిత్రంలో సాయి పల్లవి.. సీతాదేవిగా నటించనున్నారు. ఈ మూవీలో శ్రీరాముడిగా బాలీవుడ్ స్టార్ రణ్‍బీర్ కపూర్ నటించనున్నారు. ఈ చిత్రం షూటింగ్ ఈ ఏడాది మార్చిలోనే మొదలయ్యే అవకాశాలు ఉన్నాయి. ఈ సినిమా భారీ బడ్జెట్‍తో రూపొందనుంది. మూడు భాగాలుగా రామాయణాన్ని వెండితెరపై ఆవిష్కరించాలని నితేశ్ తివారీ ప్లాన్ చేసుకున్నారు.