Upcoming Telugu Movies and Series in OTTs: ఓటీటీల్లో ఫిబ్రవరిలో రాబోతున్న తెలుగు సినిమాలు, వెబ్ సిరీస్ ఇవే

Upcoming Telugu Movies and Series in OTTs: ఓటీటీ ప్రేక్షకుల సంఖ్య క్రమంగా పెరుగుతున్న నేపథ్యంలో డిజిటల్ ప్లాట్‌ఫామ్ పై రిలీజ్ కాబోతున్న తెలుగు సినిమాలు, వెబ్ సిరీస్ ల గురించి తెలుసుకోవడానికి చాలా మంది ఆసక్తి చూపిస్తున్నారు.

గురువారం (ఫిబ్రవరి 1) నుంచి ప్రారంభం కానున్న కొత్త నెలలో ఏమేం సినిమాలు, సిరీస్ వస్తున్నాయో ఒకసారి చూద్దాం. నెట్‌ఫ్లిక్స్, ప్రైమ్ వీడియో, హాట్‌స్టార్ లాంటి ప్రముఖ ఓటీటీల్లో ఈ మూవీస్, సిరీస్ రిలీజ్ కానున్నాయి.

ఫిబ్రవరిలో తెలుగు ఓటీటీ రిలీజెస్ ఇవే

ఫిబ్రవరి నెలలో ఈ మధ్యే థియేటర్లలో రిలీజైన టాప్ మూవీస్ తోపాటు కొన్ని ఒరిజినల్ సినిమాలు, వెబ్ సిరీస్ రాబోతున్నాయి. ఈ జాబితాలో గుంటూరు కారం, సైంధవ్, నా సామిరంగలాంటి సంక్రాంతి సినిమాలు కూడా ఉన్నాయి.

వీటికితోడు మెగా ఇంటి కోడలు లావణ్య త్రిపాఠీ నటించిన వెబ్ సిరీస్ కూడా రానుంది. మరి ఈ మూవీస్, సిరీస్ ఎప్పుడు, ఏ ఓటీటీలోకి వస్తున్నాయో చూడండి.

మిస్ పర్ఫెక్ట్ (వెబ్ సిరీస్) - డిస్నీ ప్లస్ హాట్‌స్టార్

పులిమేక వెబ్ సిరీస్ తో గతంలో ఓటీటీలోకి అడుగుపెట్టిన మెగా ఇంటి కోడలు లావణ్య త్రిపాఠీ ఇప్పుడు మిస్ పర్ఫెక్ట్ అనే మరో వెబ్ సిరీస్ తో ప్రేక్షకుల ముందుకు రాబోతోంది. ఓసీడీతో బాధపడే లక్ష్మి అనే పాత్రలో ఆమె కనిపించింది. అన్నపూర్ణ స్టూడియోస్ తెరకెక్కించిన ఈ వెబ్ సిరీస్ ఫిబ్రవరి 2 నుంచి డిస్నీ ప్లస్ హాట్ స్టార్ ఓటీటీలో స్ట్రీమింగ్ కానుంది.

భామా కలాపం 2 (ఒరిజినల్ ఫిల్మ్) - ఆహా ఓటీటీ

ప్రియమణి నటించిన మూవీ భామా కలాపం 2. గతంలో మొదటి భాగం థియేటర్లలో రిలీజ్ కాగా.. ఈ సీక్వెల్ నేరుగా ఓటీటీలోకి వస్తోంది. అభిమన్యు తడిమేటి డైరెక్ట్ చేసిన ఈ సినిమా ఫిబ్రవరి 16 నుంచి ఆహా ఓటీటీలో స్ట్రీమింగ్ కానుంది.

మిక్స్ అప్ (ఒరిజినల్ ఫిల్మ్) - ఆహా ఓటీటీ

ఆహా ఓటీటీలోనే రాబోతున్న మరో థ్రిల్లర్ మూవీ మిక్స్ అప్. ఈ మూవీ పోస్టర్ ను కొన్నాళ్ల కిందట ఆహా రివీల్ చేసింది. అయితే రిలీజ్ డేట్ ఇంకా అనౌన్స్ చేయకపోయినా.. ఫిబ్రవరిలోనే వస్తున్నట్లు సమాచారం.

పిండం - ఆహా ఓటీటీ

కొన్నాళ్ల కిందట థియేటర్లలో రిలీజై భయపెట్టిన మూవీ పిండం. శ్రీరామ్ నటించిన ఈ సినిమా ఇప్పుడు ఓటీటీలోకి వస్తోంది. ఆహా ఓటీటీ ఫిబ్రవరి 2వ తేదీ నుంచి పిండం మూవీని స్ట్రీమింగ్ చేయనుంది.

బబుల్ గమ్ - డిస్నీ ప్లస్ హాట్ స్టార్

ప్రముఖ టీవీ యాంకర్ సుమ, రాజీవ్ కనకాల తనయుడు రోషన్ నటించిన మూవీ బబుల్ గమ్. బూతు కంటెంట్ ఎక్కువగా ఉన్న ఈ సినిమాకు థియేటర్లలో పెద్దగా ఆదరణ లభించలేదు. ఈ సినిమా ఫిబ్రవరి తొలి వారంలోనే హాట్‌స్టార్ ఓటీటీలోకి వచ్చే అవకాశం ఉంది.

సైంధవ్ - ప్రైమ్ వీడియో

సంక్రాంతి సినిమాగా రిలీజై డిజాస్టర్ గా నిలిచిపోయిన వెంకటేశ్ మూవీ సైంధవ్ కేవలం 20 రోజుల్లోనే ఓటీటీలోకి వచ్చేస్తోంది. జనవరి 13న రిలీజైన ఈ సినిమాను ఫిబ్రవరి 3 నుంచి తమ ఓటీటీలో స్ట్రీమింగ్ చేయనున్నట్లు ప్రైమ్ వీడియో అధికారికంగా వెల్లడించింది.

నా సామిరంగ - డిస్నీ ప్లస్ హాట్ స్టార్

అక్కినేని నాగార్జున సంక్రాంతి హిట్ కొట్టిన సినిమా నా సామిరంగ. జనవరి 14న థియేటర్లలో రిలీజైన ఈ మూవీ మంచి టాక్ సంపాదించింది. ఈ సినిమా ఫిబ్రవరి రెండో వారం నుంచి డిస్నీ ప్లస్ హాట్‌స్టార్ లో స్ట్రీమింగ్ అయ్యే అవకాశాలు ఉన్నాయి.

గుంటూరు కారం - నెట్‌ఫ్లిక్స్

సూపర్ స్టార్ మహేష్ బాబు నటించిన గుంటూరు కారం మూవీ జనవరి 12న థియేటర్లలో రిలీజైంది. భారీ అంచనాల మధ్య వచ్చినా.. నెగటివ్ టాక్ తో బ్రేక్ ఈవెన్ కూడా సాధించలేకపోయింది. దీంతో ఊహించినదాని కంటే ముందే అంటే ఫిబ్రవరి 9 నుంచి ఈ సినిమాను నెట్‌ఫ్లిక్స్ స్ట్రీమింగ్ చేయనున్నట్లు తెలుస్తోంది.