Kaithi 2 Rolex: ఖైదీ 2 మూవీలో సూర్య రోలెక్స్ పాత్ర ఉంటుందా? కార్తి ఏం చెప్పారంటే..

తమిళ స్టార్ కార్తి హీరోగా నటించిన ఖైదీ సినిమా భారీ బ్లాక్‍బస్టర్ అయింది. డైరెక్టర్ లోకేశ్ కనగరాజ్ ఈ యాక్షన్ థ్రిల్లర్ మూవీని తెరకెక్కించారు. 2019లో వచ్చిన ఈ చిత్రం సూపర్ హిట్ కొట్టేసింది. లోకేశ్ సినిమాటిక్ యూనివర్స్‌(ఎల్‍సీయూ)లో తొలి మూవీగా ఖైదీ వచ్చింది. ఎల్‍సీయూలో భాగంగా 2022లో లోకనాయకుడు కమల్ హాసన్ హీరోగా విక్రమ్ సినిమా వచ్చి హిట్ అయింది. ఈ చిత్రంలో రోలెక్స్ అనే వైలెంట్ క్యామియో రోల్‍లో సూర్య కనిపించారు. కొన్ని నిమిషాలే కనిపించినా రోలెక్స్ పాత్రకు ఫుల్ క్రేజ్ వచ్చింది. దీంతో మళ్లీ ఆ క్యారెక్టర్‌ను ఎప్పుడెప్పుడు చూస్తామా అని ఎల్‍సీయూ ఫ్యాన్స్ ఎదురుచూస్తున్నారు.

ఎస్‍సీయూలో తదుపరి చిత్రంగా ‘ఖైదీ 2’ను లోకేశ్ కనగరాజ్ తెరకెక్కించనున్నారు. ఈ సినిమాలో రోలెక్స్ పాత్ర ఉంటుందనే రూమర్లు బలంగా వినిపిస్తున్నాయి. దీంతో ఎగ్జైట్‍మెంట్ చాలా ఉంది. ఈ విషయంపై కంగువ సినిమా ఆడియో లాంచ్ ఈవెంట్‍లో కార్తి హింట్ ఇచ్చారు.

రోలెక్స్‌ను కలుస్తా

స్టార్ హీరో సూర్య హీరోగా నటించిన కంగువ సినిమా ఆడియో లాంచ్ ఈవెంట్ చెన్నైలోని నెహ్రూ ఇండోర్ స్టేడియంలో శనివారం జరిగింది. తన సోదరుడి మూవీ ఈవెంట్‍కు హాజరైన కార్తి స్పీచ్ ఇచ్చారు. సినిమాల పట్ల తన అన్న సూర్యకు ఉన్న ప్యాషన్‍, ఆయన పడే కష్టం గురించి వివరించారు. నటుడిగా ఎప్పటికప్పుడు పరిధిని పెంచుకుంటూ పోతున్నారని అన్నారు. ఈ క్రమంలో రోలెక్స్ పాత్ర గురించి చెప్పారు.

ఖైదీ 2లో ఢిల్లీ పాత్రతో వచ్చే ఏడాది ముందుకు వస్తానని కార్తి స్పష్టం చేశారు. వచ్చే ఏడాది ఈ సీక్వెల్ మూవీ ఉంటుందని కన్ఫమ్ చేశారు. అలాగే, రోలెక్స్‌ను నేరుగా కలవాల్సి ఉందని కార్తి చెప్పారు. అంటే ఖైదీ 2లో రోలెక్స్ పాత్ర ఉంటుందని కార్తి పరోక్షంగా చెప్పేశారు.

ఖైదీ 2లో సూర్య రోలెక్స్ పాత్ర ఉంటుందని, తనతో కాంబినేషన్ సీన్లు ఉంటాయని కార్తి పరోక్షంగా చెప్పేయడంతో అభిమానుల్లో ఎగ్జైట్‍మెంట్ విపరీతంగా పెరిగిపోయింది. ఖైదీ 2 ఎల్‍సీయూలో పీక్‍గా ఉంటుందని గతంలోనే లోకేశ్ కనగరాజ్ చెప్పారు. ఎల్‍సీయూలోని మెయిన్ క్యారెక్టర్లన్నీ ఈ చిత్రం ఉంటాయన్నారు. ఢిల్లీ త్వరలో మళ్లీ వస్తారని కూడా తెలిపారు.

తమిళ సూపర్ స్టార్ రజినీకాంత్‍తో ప్రస్తుతం కూలి చిత్రం చేస్తున్నారు లోకేశ్ కనగరాజ్. ఈ మూవీ స్టాండలోన్ చిత్రంగా ఉంది. ఎల్‍సీయూలో తదుపరి ఖైదీ 2 మూవీనే లోకేశ్ చేయనున్నారు. వచ్చే ఏడాది ఈ చిత్రం షూటింగ్ మొదలుకానుంది.

కంగువ గురించి..

ఫ్యాంటసీ యాక్షన్ థ్రిల్లర్ మూవీ కంగువ నవంబర్ 14వ తేదీన విడుదల కానుంది. ఈ చిత్రంలో సూర్య డ్యుయల్ రోల్ చేశారు. దిశా పటానీ, బాబీ డియోల్, జగపతి బాబు, యోగిబాబు, నటరాజన్ సుబ్రమణియం, రెడిన్ కింగ్‍స్లే కీలకపాత్రలు పోషించారు. ఈ చిత్రానికి శివ దర్శకత్వం వహించారు. కంగువ భారీ బ్లాక్‍బస్టర్ సాధిస్తుందనే పూర్తి నమ్మకంతో ఉంది టీమ్. ఈ చిత్రాన్ని స్టూడియో గ్రీన్, యూవీ క్రియేషన్స్ బ్యానర్లు ప్రొడ్యూజ్ చేశాయి.