SS Rajamouli: భారీ ప్రకటన చేయనున్న రాజమౌళి.. మహేశ్ సినిమా గురించి కాదు!
SS Rajamouli: దర్శక ధీరుడు ఎస్ఎస్ రాజమౌళి భారీ ప్రకటన చేసేందుకు సిద్ధమైనట్టు తెలుస్తోంది. అయితే, ఇది తాను డైరెక్ట్ చేయనున్న సినిమా గురించి కాదని సమాచారం. మరి ఆ ప్రకటన దేని గురించి ఉండే అవకాశం ఉందో ఇక్కడ చూడండి.
SS Rajamouli: దర్శక ధీరుడు ఎస్ఎస్ రాజమౌళి ప్రస్తుతం దేశంలోనే టాప్ డైరెక్టర్‌గా ఉన్నారు. ఆయన దర్శకత్వం వహించిన బహుబలి, ఆర్ఆర్ఆర్ సినిమాలు ఇండియాతో పాటు ప్రపంచవ్యాప్తంగా పాపులర్ అయ్యాయి. కలెక్షన్ల సునామీ సృష్టించాయి. ఆర్ఆర్ఆర్ మూవీ గ్లోబల్ హిట్ అయింది. హాలీవుడ్ దిగ్గజ దర్శకులతో పాటు ప్రపంచవ్యాప్తంగా చాలా దేశాల ప్రేక్షకుల నుంచి ప్రశంసలు అందుకుంది. రామ్‍చరణ్, ఎన్టీఆర్ హీరోలుగా నటించిన ఆర్ఆర్ఆర్ ఇండియాతో పాటు అనేక దేశాల్లో కలెక్షన్ల వర్షం కురిపించింది. బెస్ట్ సాంగ్ విభాగంలో ఆస్కార్ అవార్డు కూడా వచ్చింది. రాజమౌళి తదుపరి టాలీవుడ్ సూపర్ స్టార్ మహేశ్ బాబుతో ఓ చిత్రం చేయనున్నారు. అయితే, ఈ క్రమంలో రాజమౌళి ఓ భారీ ప్రకటన చేయనున్నారని తెలుస్తోంది. అయితే, ఇది మహేశ్ బాబు సినిమా గురించి మాత్రం కాదు. వివరాలివే..
దర్శక ధీరుడు ఎస్ఎస్ రాజమౌళి రేపు (సెప్టెంబర్ 19) ఉదయం ఓ భారీ ప్రకటన చేస్తారని తెలుస్తోంది. నిర్మాతగా ఆయన మారనున్నారని సమాచారం. దీనికి సంబంధించిన అనౌన్స్‌మెంట్ చేయనున్నారని తెలుస్తోంది. భారతీయ సినిమా పుట్టుక, ఎదుగుదల గురించి భారీ సినిమాను రాజమౌళి నిర్మించనున్నట్టు ప్రచారం జరుగుతోంది. ఇండియన్ సినిమాపై ఇది బయోపిక్‍గా ఉంటుందని సమాచారం. ఇండియన్ సినిమా బర్త్, రైజ్ అంశంపైనే భారీ స్థాయిలో ఈ చిత్రం ఉండనుందట.
భారతీయ సినిమాపై రాజమౌళి నిర్మించే ఈ బయోపిక్‍లో వివిధ ఇండస్ట్రీలకు చెందిన స్టార్ నటులు ఉంటారని, చిత్ర నిర్మాణంలో మరికొందరు ప్రొడ్యూజర్లు భాగమవుతారని టాక్ వినిపిస్తోంది. అయితే, ఈ సినిమాకు ఆయనే దర్శకత్వం వహిస్తారా.. లేదా అన్న విషయంపై స్పష్టత లేదు. అయితే, భారతీయ సినీ మూలాలు, ఎదుగుదలపై చేసే ఈ మూవీకి రాజమౌళి ప్రధాన నిర్మాతగా ఉండనున్నారని తెలుస్తోంది. ప్రస్తుతం ప్రొడక్షన్ బృందాన్ని ఆయన సిద్ధం చేసుకున్నారని టాక్.
కాగా, మహేశ్ బాబుతో యాక్షన్ అడ్వెంచర్ మూవీని ఎస్ఎస్ రాజమౌళి తెరకెక్కించనున్నారు. ఈ సినిమా కూడా గ్లోబల్ రేంజ్‍లో ఉండనుంది. రాజమౌళి తండ్రి విజయేంద్ర ప్రసాద్ ఇప్పటికే ఈ చిత్రానికి స్క్రిప్ట్ రెడీ చేశారు. రాజమౌళి దీనికి తుది మెరుగులు కూడా దిద్దారని సమాచారం. ఈ చిత్రంలో కొందరు హాలీవుడ్ నటులు కూడా ఉండనున్నారని తెలుస్తోంది.
ప్రస్తుతం మహేశ్ బాబు గుంటూరు కారం షూటింగ్‍లో ఉన్నారు. ఈ మూవీ షూటింగ్ నవంబర్‌లో పూర్తయ్యే అవకాశం ఉంది. దీంతో నవంబర్ నెలాఖరులో లేకపోతే డిసెంబర్ ప్రారంభంలో మహేశ్ - రాజమౌళి సినిమా షూటింగ్ ప్రారంభమయ్యే అవకాశం ఉంది. ఈ చిత్రాన్ని 2025 రిలీజ్ చేయాలని టార్గెట్ పెట్టుకున్నారు రాజమౌళి.
