Shine Tom Chacko Engagement: ఎంగేజ్‍మెంట్ చేసుకున్న దసరా నటుడు.. అమ్మాయి ఎవరంటే..

Shine Tom Chacko Engagement: మలయాళ ప్రముఖ నటుడు, దసరా చిత్రంతో తెలుగులోనూ ఫేమస్ అయిన షైన్ టామ్ చాకో ఎంగేజ్‍మెంట్ జరిగింది. తన గర్ల్ ఫ్రెండ్, పాపులర్ మోడల్ అయిన తనూజాను ఆయన నిశ్చితార్థం చేసుకున్నారు. కొత్త సంవత్సరం రోజున (జనవరి 1) వారు తమ బంధంలో కీలకమైన అడుగువేశారు. చాలాకాలం నుంచి చాకో, తనూజా లవ్‍లో ఉన్నారని రూమర్స్ వచ్చాయి. వాటిని నిజం చేస్తూ కొద్ది రోజుల క్రితం తమ రిలేషన్‍ను చాకో వెల్లడించారు. ఇప్పుడు ఎంగేజ్‍మెంట్ చేసుకున్నారు.

తనూజాతో తన ఎంగేజ్‍మెంట్ విషయాన్ని నేడు (జనవరి 2) వెల్లడించారు షైన్ టామ్ చాకో. ఈ వేడుక ఫొటోలను సోషల్ మీడియాలో పోస్ట్ చేశారు. ఎంగేజ్‍మెంట్ ఫొటో షూట్‍లో ఇద్దరూ ఎంతో సంతోషంగా కనిపించారు. లైట్ పింక్, వైట్ ఔట్‍ఫిట్‍లో మెరిశారు. కుటుంబ సభ్యులు, స్నేహితుల మధ్య ఈ ఎంగేజ్‍మెంట్ వేడుక జరిగింది. త్వరలోనే షైన్ టామ్ చాకో, తనూజా వివాహం జరగనుంది.

సోషల్ మీడియాతో తన ఎంగేజ్‍మెంట్ ఫొటోలను షైన్ టామ్ చాకో పోస్ట్ చేయగా.. చాలా మంది సినీ సెలెబ్రెటీలు శుభాకాంక్షలు చెబుతున్నారు. నెటిజన్లు సైతం ఈ జంటకు విషెస్ చెబుతూ కామెంట్స్ చేస్తున్నారు.

తొలుత మలయాళం సినీ ఇండస్ట్రీలో అసిస్టెంట్ డైరెక్టర్‌గా కెరీర్ ఆరంభించారు షైన్ టామ్ చాకో. ఆ తర్వాత 2011లో గడ్డమ చిత్రంతో నటుడిగా తెరంగేట్రం చేశారు. ఆ తర్వాత వరుసగా మలయాళ సినిమాల్లో నటించారు. తమిళంలోనూ కొన్ని చిత్రాలు చేశారు. విలక్షణ నటుడిగా మంచి పేరు తెచ్చుకున్నారు.

ఈ ఏడాది నాని హీరోగా నటించిన దసరా చిత్రంతోనే తెలుగు ఇండస్ట్రీలో అడుగుపెట్టారు షైన్ టామ్ చాకో. ఆ చిత్రంలో విలన్‍గా మెప్పించారు. ఇటీవల తమిళ మూవీ జిగర్తాండ డబుల్ ఎక్స్ మూవీలోనూ కీరోల్ చేశారు. ప్రస్తుతం టాలీవుడ్ యంగ్ టైగర్ ఎన్టీఆర్ హీరోగా నటిస్తున్న దేవర మూవీలో కీలకపాత్ర చేస్తున్నారు చాకో. ప్రస్తుతం మలయాళంలోనూ మరో రెండు చిత్రాలు ఆయన చేతిలో ఉన్నాయి.