Allu Arjun Pushpa 2: పుష్ప-2 రిలీజ్ ముంగిట అల్లు అర్జున్ మాస్టర్ ప్లాన్, దేశం మొత్తం చుట్టినా.. ఏపీ మాత్రం స్కిప్

ఐకాన్ స్టార్ అల్లు అర్జున్ పాన్ ఇండియా మూవీ పుష్ప-2 రిలీజ్‌కి ముంగిట చిత్ర యూనిట్ మాస్టర్ ప్లాన్ తయారు చేసింది. డిసెంబరు 5న ప్రపంచవ్యాప్తంగా ‘పుష్ప : ది రూల్’ మూవీ థియేటర్లలోకి రానుంది. రిలీజ్‌కి టైమ్ దగ్గర పడుతుండటంతో దేశ వ్యాప్తంగా ఎక్కడెక్కడ ప్రచారం చేయాలో చిత్ర యూనిట్ రోడ్ మ్యాప్‌ని సిద్ధం చేసుకుంది. ఈ మేరకు ‘మైత్రీ మూవీ మేకర్స్’ ఎక్స్ వేదకగా రోడ్ మ్యాప్ వీడియోను శనివారం విడుదల చేసింది.

ఏడు సిటీల్లో ఈవెంట్స్

ఇండియాలోని ఏడు మేజర్‌ సిటీస్‌లో ప్రమోషనల్‌ ఈవెంట్స్‌ను నిర్వహించబోతున్నట్లు మైత్రీ మూవీ మేకర్స్ తెలిపింది. సుకుమార్‌ దర్శకత్వంలో తెరకెక్కుతున్న పుష్ప-2 మూవీని ప్రపంచవ్యాప్తంగా దాదాపు 12 వేల స్క్రీన్స్‌లో భారీ ఎత్తున విడుదల చేయడానికి ఇప్పటికే సన్నాహకాలు చేస్తున్నారు. మైత్రీ మూవీ మేకర్స్‌పై ఈ సినిమాని నవీన్‌ ఎర్నేని, యలమంచిలి రవిశంకర్‌ నిర్మిస్తున్నారు.

యూఎస్‌లో రిలీజ్‌కి ముందే రికార్డ్

యూఎస్‌లో అడ్వాన్స్‌ బుకింగ్స్‌లో ఇప్పటికే పుష్ప-2 సరికొత్త రికార్డులను నెలకొల్పిన విషయం తెలిసిందే. ఇక ప్రమోషన్ ఈవెంట్స్‌ను వరుసగా పాట్నా, కోల్‌కతా, చెన్నై, కొచ్చి, బెంగళూరు, ముంబయి,‌ హైదరాబాద్‌లో నిర్వహించబోతున్నారు. అయితే.. ఏపీలో మాత్రం ఏ ప్రమోషనల్ ఈవెంట్‌ను నిర్వహించడం లేదని తేలిపోయింది.

పుష్ప-1 దేశంలోని చాలా ప్రాంతాల్లో ఊహించని విధంగా హిట్ అయ్యింది. మరీ ముఖ్యంగా సినిమాలో అల్లు అర్జున్ మేనరిజం అప్పట్లో ట్రెండీగా మారింది. దాంతో పుష్ప-2కి భారీ ఎత్తున ప్రమోషన్ ఈవెంట్స్‌ని చిత్ర యూనిట్ ప్లాన్ చేసింది.

ఏపీకి మాత్రం దూరం?

ఈ ప్రమోషన్ ఈవెంట్స్‌కి అల్లు అర్జున్‌తో పాటు చిత్ర యూనిట్ వెళ్లనుంది. అయితే.. ఏపీలో ఇటీవల జరిగిన సార్వత్రిక ఎన్నికల్లో అల్లు అర్జున్ నంద్యాలకి వెళ్లడం.. అక్కడ వైసీపీ మాజీ ఎమ్మెల్యేకి సపోర్ట్ చేయడం‌తో వివాదం రాజుకుంది. చివరికి అల్లు అర్జున్‌పై కేసు నమోదు అవగా.. హైకోర్టు వరకూ వెళ్లి ఫైట్ చేయాల్సి వచ్చింది.

మూడేళ్ల క్రితం విడుదలైన పుష్ప: ది రైజ్‌కి సీక్వెల్‌గా వస్తున్న పుష్ప-2లో అల్లు అర్జున్‌కి జోడీగా రష్మిక మంధాన కొనసాగగా.. ప‌హాద్ ఫాజిల్‌, సునీల్, అన‌సూయ‌, రావు రమేష్ పాత్రలు కూడా కంటిన్యూ అవుతున్నాయి. అయితే.. పుష్ప-1లో సమంత ఐటెం సాంగ్ చేయగా.. పుష్ప-2లో శ్రీలీల స్పెషల్ సాంగ్ చేస్తోంది.