Pushpa 2: పుష్ప 2 షూటింగ్ వీడియో లీక్.. నదిలో ఎర్ర చందనం లారీలతో..

Pushpa 2: ఐకాన్ స్టార్ అల్లు అర్జున్ నటిస్తున్న పుష్ప 2 సినిమాపై భారీ అంచనాలు నెలకొని ఉన్నాయి. పుష్ప ఫస్ట్ పార్ట్ ది రైజ్ మూవీ పాన్ ఇండియా రేంజ్‍లో సూపర్ హిట్ అవటంతో ఈ పుష్ప రెండో పార్ట్ ది రూల్ కోసం అందరూ ఆసక్తిగా ఎదురుచూస్తున్నారు. పుష్ప సినిమా తెలుగుతో పాటు హిందీలోనూ ఘన విజయం సాధించి, అల్లు అర్జున్‍ను పాన్ ఇండియా స్టార్‌ను చేసింది. ‘పుష్ప 2 ది రూల్’ మూవీ షూటింగ్ ప్రస్తుతం జోరుగా సాగుతోంది. దర్శకుడు సుకుమార్ ఈ మూవీని మరింత భారీగా తెరకెక్కిస్తున్నారు. కాగా, తాజాగా పుష్ప 2 షూటింగ్‍కు సంబంధించిన ఓ వీడియో లీక్ అయింది.

ప్రస్తుతం పుష్ప 2 మూవీ చిత్రీకరణ హైదరాబాద్ పరిసరాల్లో సాగుతోంది. ఈ క్రమంలో షూటింగ్‍కు సంబంధించిన ఓ వీడియో లీకైంది. ఎర్ర చందనం దుంగలు ఉన్న లారీలు నదిలో వేగంగా వెళుతున్నట్టు వీడియోలో ఉంది. ఆ లారీలను వెంబడిస్తూ జీపులు వెనకాలే వస్తున్నాయి. ఈ షూటింగ్ ను కొందరు మొబైళ్లలో చిత్రీకరించి సోషల్ మీడియాలో పోస్ట్ చేశారు. ఈ విజువల్స్ చూస్తుంటే.. సినిమాలో ఇది కీలకమైన సీన్‍గా ఉండేలా కనిపిస్తోంది. నదిలో లారీలు, జీప్‍లతో చేజింగ్ ఆసక్తికరంగా ఉంది.

కాగా, పుష్ప-2 నుంచి లీకైన ఈ షూటింగ్ వీడియో.. సోషల్ మీడియాలో వైరల్‍గా మారింది.

పుష్ప ది రైజ్ పేరుతో ఈ రెండో పార్ట్ వస్తోంది. ఇప్పటికే పుష్ప మూవీలో అల్లు అర్జున్ స్టైల్, మ్యానరిజమ్‍లకు ప్రపంచమంతా ఫిదా అయింది. ఇప్పుడు రెండో పార్ట్ లోనూ ఇవి ఉండనున్నాయి. ఇది మరింత ఎక్కువ బడ్జెట్‍తో తెరకెక్కుతోంది.

పుష్ప 2 సినిమాను మైత్రీ మూవీ మేకర్స్ ప్రొడక్షన్ హౌజ్ నిర్మిస్తోంది. దేవీ శ్రీ ప్రసాద్ మ్యూజిక్ అందిసున్నాడు. రష్మిక మందన్నా హీరోయిన్‍గా ఉండగా.. మలయాళ స్టార్ ఫాహద్ ఫాజిల్ నెగెటివ్ రోల్‍లో పోలీస్‍గా ఈ మూవీలో చేస్తున్నాడు. ఏప్రిల్‍లో పుష్ప 2 టీజర్‌ను చిత్ర బృందం విడుదల చేసింది. సినిమాపై ఇది మరింత ఆసక్తిని పెంచేసింది. పుష్ప 2 వచ్చే ఏడాది విడుదలయ్యే అవకాశం ఉంది.