PKSDT First Look: పవన్-సాయి ధరమ్ తేజ్ మూవీ టైటిల్ ఖరారు.. ఫస్ట్ లుక్ పోస్టర్ అదుర్స్

PKSDT First Look: మెగా ఫ్యాన్స్ ఆత్రుతగా ఎదురుచూస్తున్న సమయం వచ్చేసింది. పవర్ స్టార్ పవన్ కల్యాణ్, మెగా మేనల్లుడు సాయి ధరమ్ తేజ్ కలిసి నటిస్తున్న సినిమా టైటిల్‌తో పాటు, ఫస్ట్ లుక్ పోస్టర్‌ను విడుదల చేసింది చిత్రబృందం. ప్రముఖ నటుడు, దర్శకుడు సముద్ర ఖని దర్శకత్వంలో తెరకెక్కిన ఈ సినిమాకు 'బ్రో'(BRO) అనే టైటిల్‌ను ఖరారు చేశారు మేకర్స్. ఫాంటసీ కామెడీగా తెరకెక్కుతోన్న ఈ సినిమా విడుదల తేదీని కూడా ప్రకటించారు.

పవన్ కల్యాణ్-సాయి ధరమ్ తేజ్ కాంబినేషన్‌లో తెరకెక్కుతోన్న ఈ సినిమా ఈ ఏడాది ఫిబ్రవరిలోనే ప్రారంభమైంది. అయితే అంతలోనే సినిమా వేగవంతంగా పూర్తి చేసి విడుదల చేసేందుకు సన్నాహామవుతోంది. ఈ చిత్రాన్ని జులై 28న ప్రపంచ వ్యాప్తంగా ప్రేక్షకుల ముందుకు తీసుకురావాలని చిత్రబృందం నిర్ణయించింది. ఈ విషయాన్ని మేకర్స్ ట్విటర్ వేదికగా తెలియజేశారు.

బ్రో అనే టైటిల్‌తో రానున్న ఈ సినిమా మోషన్ పోస్టర్‌లో పవన్ కల్యాణ్ పవర్‌ఫుల్‌గా కనిపించారు. దేవుడి పాత్రను పోషిస్తున్నప్పటికీ మోడర్న్ గాడ్‌గా స్టైలిష్‌గా కనిపించారు పవర్ స్టార్. అంతకంటే మెరుగ్గా బ్యాక్ గ్రౌండ్ మ్యూజిక్‌తో మోషన్ పోస్టర్ టీజర్‌ను వేరే లెవల్‌కు తీసుకెళ్లారు. పవర్ ఫుల్ లిరిక్స్‌తో పవన్ కల్యాణ్ క్యారెక్టర్‌ను తెలియజేశారు. ఈ మోషన్ పోస్టర్ గూస్‌బంప్స్ ఇస్తోంది.

బ్రో సినిమాలో ప్రియా ప్రకాష్ వారియర్, కేతిక శర్మ హీరోయిన్లుగా నటిస్తున్నారు. బ్రహ్మానందం, రోహిణి మోలేటి, సుబ్బరాజు, తనికెళ్ల భరణి, రాజా చెంబోలు తదితరులు కీలక పాత్రలు పోషిస్తున్నారు. జీ స్టూడియోస్, పీపుల్స్ మీడియా ఫ్యాక్టరీ పతాకంపై టీజీ విశ్వ ప్రసాద్ ఈ సినిమాను నిర్మిస్తున్నారు. త్రివిక్రమ్ స్క్రీన్ ప్లేతో పాటు డైలాగ్స్ రాశారు. జులై 28న ప్రపంచ వ్యాప్తంగా ప్రేక్షకుల ముందుకు రానుందీ చిత్రం.