NNS April 1st Episode: పిల్లల కోసం రక్తం చిందించిన మిస్సమ్మ.. అరుంధతికి వచ్చేసిన శక్తులు.. రివర్స్ అయిన కారు​

Nindu Noorella Saavasam April 1st Episode: నిండు నూరేళ్ల సావాసం నేటి ఎపిసోడ్‌లో (NNS 1st April Episode) పిల్లల్ని సమ్మర్​ క్యాంప్​కి తీసుకుని వెళ్లడానికి స్కూల్​ ప్రిన్సిపాల్​ అమర్​ ఇంటికి వస్తుంది. మనోహరి పిల్లలను తొందరపెట్టి కిందికి తీసుకువస్తుంది. ఒక్కసారి అమ్మ ఫొటోకి దండం పెట్టుకుంటామని పిల్లలు అమర్​ రూమ్​కి వెళ్తారు. మిస్సమ్మ కూడా మేడమ్​ ఫొటో చూద్దామని అమర్​ రూమ్​లోకి వెళ్లబోతుంది. కానీ, మిస్సమ్మను నానామాటలు అని లోపలకి వెళ్లకుండా ఆపుతుంది మనోహరి.

కిందపడిన భాగమతి

చేసేదేంలేక బాధపడుతూ కిందకి వస్తుంది మిస్సమ్మ. ప్రిన్సిపాల్​ మీ కోసమే వెయిట్​ చేస్తున్నారని పిల్లలని తొందర పెడుతుంది మనోహరి. పిల్లలు బాధపడుతూ బయలుదేరతారు. వాళ్లని ఎలాగైనా ఆపాలని స్నాక్స్​ మరిచిపోయారంటూ కిందపడి దెబ్బ తగిలించుకుంటుంది మిస్సమ్మ. భాగమతి కిందపడటంతో పిల్లలు, అమర్​, అమర్​ తల్లిదండ్రులు, రాథోడ్​.. అందరూ పరిగెత్తుకుంటూ వచ్చి ఏమైందని కంగారు పడతారు. కాలికి దెబ్బతగిలి రక్తం రావడం చూసి మిస్సమ్మ కాలికి అమర్​ కట్టుకడతాడు.

మనోహరిని కోప్పడిన అమర్ తల్లి

పిల్లలు శుభమా.. అని క్యాంప్​కి బయలుదేరుతుంటే తనకి ఇలా జరిగిందంటూ బాధపడుతుంది మిస్సమ్మ. తనవల్ల పిల్లలు క్యాంప్​కి వెళ్లలేకపోతున్నారంటుంది. దానికి మనోహరి మండిపడుతూ.. నీకు దెబ్బతగిలితే పిల్లల క్యాంప్​‌కు వెళ్లడం ఎందుకు క్యాన్సల్​ అవుతుంది. నువ్వేం ఇంట్లో మనిషివి కాదు అంటుంది మనోహరి. దానికి అమర్​ తల్లి మనోహరిని కోప్పడుతుంది. పిల్లలు బయలుదేరుతుంటే ఇలా జరగడమేంటని బాధపడుతుంది.

వెనక్కి వెళ్లిన కారు

కానీ, మనోహరి ఆ మాటలు పట్టించుకోకుండా పిల్లలను బలవంతంగా తీసుకెళ్లి కారులో కూర్చోబెడుతుంది. పిల్లలు ఏడుస్తూ ఉంటే అరుంధతి కోపంతో.. దేవుడా.. నా పిల్లలు ఏం పాపం చేశారని ఈ శిక్ష. నువ్వు నిజంగా ఉంటే వాళ్లు ఆ గేట్​ కూడా దాటొద్దు అంటుంది. పౌర్ణమి ఘడియలు ప్రారంభమవడంతో అరుంధతి మాట నిజమై కారు వెనక్కి వస్తుంది. అందరూ ఆశ్చర్యంగా చూస్తూ ఉండగానే ప్రిన్సిపాల్​ స్వయంగా పిల్లల్ని కిందకి దించి సమ్మర్​ క్యాంప్​ క్యాన్సిల్​ అయ్యిందని చెబుతుంది.

నీ రక్తం చిందించావా

మనోహరి మాట్లాడుతున్నా వినకుండా ప్రిన్సిపాల్​ వెళ్లిపోతుంది. పిల్లలు సంతోషంతో గంతులు వేస్తారు. మిస్సమ్మ, రాథోడ్​ రామ్మూర్తి దగ్గరకు వస్తారు. పిల్లలకోసం దెబ్బ తగిలించుకున్నావా మిస్సమ్మ అంటాడు రాథోడ్​. ఆ ఇంటి కన్నీళ్లు తుడవడం కోసం నీ రక్తం చిందించావా అంటాడు రామ్మూర్తి. ఆ మనోహరిని ఆపడం కోసం ఏమైనా చేస్తాను అనుకున్నా గానీ, పిల్లల కోసం ఇలా చేస్తానని అనుకోలేదు నాన్న అంటుంది భాగమతి.

ఎలాంటి శక్తులు

మనోహరిని ఇంకొక్క రోజు ఆపితే చాలని ఓ ప్లాన్​ చెబుతుంది. ఆ ప్లాన్​ని అమలు చేయడానికి తండ్రిని ఉదయాన్నే అమర్​ ఇంటికి రమ్మని చెప్పి వెళ్తుంది భాగమతి. పౌర్ణమి రోజు తనకు వచ్చే శక్తులు ఎలాంటివో తెలుసుకోవాలనుకుంటుంది అరుంధతి. చిత్రగుప్తుడిని ఎంత అడిగినా చెప్పకపోవడంతో ఆలోచిస్తూ కూర్చుంటుంది. అసలు పౌర్ణమి రోజు అరుంధతికి ఏ శక్తులు రానున్నాయి? మనోహరిని ఎదుర్కోడానికి మిస్సమ్మ వేసిన ప్లాన్​ ఏంటి? అనే విషయాలు తెలియాలంటే ఏప్రిల్ 2న ప్రసారం కానున్న నిండు నూరేళ్ల సావాసం సీరియల్​ తర్వాతి ఎపిసోడ్ తప్పకుండా చూడాల్సిందే!