Netflix Web Series: నెట్‌ఫ్లిక్స్‌లోకి వస్తున్న మరో భారీ బడ్జెట్ వెబ్ సిరీస్.. టీజర్ రిలీజ్.. స్ట్రీమింగ్ ఎప్పుడంటే?

Netflix Web Series: నెట్‌ఫ్లిక్స్ భారీ బడ్జెట్ వెబ్ సిరీస్ లకు పెట్టింది పేరు. ఇంగ్లిష్ లో అయినా హిందీలో అయినా ఇప్పటి వరకూ అలాంటివి ఎన్నో. ఈ మధ్యే ఈ ఓటీటీలో వచ్చిన హీరామండి.. ఇండియాలోనే అత్యంత భారీ బడ్జెట్ వెబ్ సిరీస్ గా నిలిచింది. ఇప్పుడలాందిటే మరో భారీ బడ్జెట్ సిరీస్ ను తీసుకురాబోతోంది. ఈ సిరీస్ పేరు ది రాయల్స్.

నెట్‌ఫ్లిక్స్ కొత్త వెబ్ సిరీస్

ఇండియాలోనే కాదు ప్రపంచంలోని ప్రముఖ ఓటీటీల్లో ఒకటి నెట్‌ఫ్లిక్స్. ఈ ఓటీటీలో ఇప్పుడు ఎంతో మంది బాలీవుడ్ నటీనటులు నటిస్తున్న వెబ్ సిరీస్ ది రాయల్స్ రాబోతోంది. బుధవారం (ఆగస్ట్ 14) ఈ సిరీస్ నటీనటులను పరిచయం చేస్తూ సదరు డిజిటల్ ప్లాట్‌ఫామ్ ఓ టీజర్ రిలీజ్ చేసింది. ఇది అచ్చూ ఇంగ్లిష్ లో వచ్చిన ది బ్రిడ్జర్టన్ సిరీస్ లాగే ఉందంటూ అప్పుడే ఫ్యాన్స్ కామెంట్స్ చేస్తున్నారు.

ఈ భారీ బడ్జెట్ వెబ్ సిరీస్ లో బాలీవుడ్ నటీనటులు భూమి పడ్నేకర్, ఇషాన్ ఖట్టర్, జీనత్ అమన్, నోరా ఫతేహి, చుంకీ పాండే, సాక్షి తన్వర్, డీనో మోరియా, మిలింద్ సోమన్ లాంటి వాళ్లు నటిస్తున్నారు. ఈ రీగల్ రొమాన్స్ డ్రామా ఎంత రిచ్ గా ఉండబోతోందో ఈ పాత్రల పరిచయం, టీజర్ ద్వారానే నెట్‌ఫ్లిక్స్ చెప్పేసింది. ప్రియాంకా ఘోష్, నుపురు ఆస్థానా ఈ 8 ఎపిసోడ్ల రొమాంటిక్ కామెడీ సిరీస్ ను డైరెక్ట్ చేశారు.

ది రాయల్స్.. అచ్చూ అలాగే..

ఇషాన్ ఖట్టర్, భూమి ఫడ్నేకర్ లీడ్ రోల్స్ లో నటిస్తున్న ఈ సిరీస్ రాజవంశీకుల గ్లామర్, రొమాన్స్ ను తెరపై ఆవిష్కరించనుంది. అయితే ఈ టీజర్ రిలీజ్ కాగానే ఫ్యాన్స్ ఈ సిరీస్ ను ఇంగ్లిష్ లో వచ్చిన ది బ్రిడ్జర్టన్ సిరీస్ తో పోలుస్తున్నారు. దేశీ బ్రిడ్జర్టన్ ను చేస్తున్నారా అని ఓ అభిమాని కామెంట్ చేశారు. ఈ రెండు సిరీస్ లలో చాలా పోలికలు ఉన్నాయంటూ మరికొందరు కూడా కామెంట్స్ చేయడం విశేషం.

ముఖ్యంగా మ్యూజిక్, కాస్ట్యూమ్స్ అయితే అచ్చూ అలాగే ఉన్నట్లు చెబుతున్నారు. ఆ సిరీస్ లాగే ఇది కూడా రొమాంటిక్ పీరియడ్ డ్రామాస్ లో ప్రత్యేకంగా నిలిచిపోతుందన్న ఆశతో ఫ్యాన్స్ ఉన్నారు. ఇక భూమి, ఇషాన్ మధ్య కెమెస్ట్రీ ఎలా ఉండబోతుందో అన్న ఆసక్తి కూడా నెలకొంది. ఈ సిరీస్ స్ట్రీమింగ్ వివరాలను మాత్రం నెట్‌ఫ్లిక్స్ ఇంకా వెల్లడించలేదు.