Thalapathy Vijay: దళపతి విజయ్ ఫిట్‍నెస్ సీక్రెట్ ఇదే: వెల్లడించిన డైరెక్టర్ లోకేశ్ కనగరాజ్
Thalapathy Vijay: దళపతి విజయ్ ఫిట్‍నెస్ సీక్రెట్‍ను డైరెక్టర్ లోకేశ్ కనగరాజ్ వెల్లడించారు. వీరి కాంబినేషన్‍లో లియో మూవీ వస్తోంది. ప్రమోషన్లలో ఈ విషయాన్ని చెప్పారు లోకేశ్.
Thalapathy Vijay: తమిళ స్టార్ హీరో దళపతి విజయ్ నటించిన లియో సినిమాపై మంచి క్రేజ్ ఉంది. బ్లాక్‍బాస్టర్లతో ఫుల్ ఫామ్‍లో ఉన్న స్టార్ డైరెక్టర్ లోకేశ్ కనగరాజ్ ఈ మూవీకి దర్శకత్వం వహిస్తున్నారు. ఇటీవలే వచ్చిన లియో ట్రైలర్ అంచనాలను మరింత పెంచేసింది. విజయ్ - లోకేశ్ కాంబినేషన్‍లో వచ్చిన మాస్టర్ బ్లాక్‍బాస్టర్ అయింది. ఇప్పుడు ఈ కాంబోలోనే లియో వస్తుండటంతో మరింత ఆసక్తి నెలకొంది. అక్టోబర్ 19వ తేదీన లియో రిలీజ్ కానుంది. ఈ తరుణంలో ప్రమోషన్లను జోరుగా చేస్తోంది మూవీ యూనిట్.
భారీ స్థాయిలో నిర్వహిద్దామనుకున్న లియో ఆడియో లాంచ్‍ను మూవీ యూనిట్ ఆఖరి నిమిషంలో క్యాన్సల్ చేసింది. అయితే, ప్రీ-రిలీజ్ ఈవెంట్‍ను దుబాయ్ వేదికగా నిర్వహించాలని ఆలోచిస్తున్నట్టు తెలుస్తోంది. ఈ విషయంపై అధికారిక ప్రకటన రావాల్సి ఉంది. కాగా, ప్రస్తుతం అయితే ప్రమోషన్లను బాగానే చేస్తోంది లియో సినిమా యూనిట్. ఈ క్రమంలో ఓ కార్యక్రమంలో మాట్లాడారు డైరెక్టర్ లోకేశ్ కనగరాజ్.
లియో చిత్రంలో భారీ యాక్షన్ సీక్వెన్సులను విజయ్ ఫుల్ ఎనర్జీతో చేశారని, ఆయన ఫిట్‍నెస్ సీక్రెట్ ఏంటో కూడా లోకేశ్ కనగరాజ్ చెప్పారు. విజయ్ ఎక్కువగా ఆహారం తినరని ఆయన వెల్లడించారు. ప్రతీ రోజు తప్పకుండా విజయ్ 30 నుంచి 40 నిమిషాల పాటు కార్డియో ఎక్సర్‌సైజ్‍లు చేస్తారని లోకేశ్ తెలిపారు. చాలా సంవత్సరాలుగా విజయ్ ఒకే రేంజ్‍లో శరీర బరువును మెయింటెన్ చేస్తున్నారని, ఆయన ఫిట్‍నెస్ మెరుగ్గా ఉండేందుకు ఇది కూడా కారణమని లోకేశ్ కనగరాజ్ స్పష్టం చేశారు.
లియో సినిమా కూడా లోకేశ్ సినిమాటిక్ యూనివర్స్ (LUC)లోనే ఉంటుందా అనే విషయాన్ని ఇంకా సీక్రెట్‍గానే ఉంచుతోంది మూవీ యూనిట్. అయితే, లోకేశ్ గత చిత్రాలకు లియోకు లింక్ ఉంటుందనే అంచనాలు చాలాకాలంగా వినిపిస్తున్నాయి. అయితే, ఎల్‍సీయూలో లియో ఉంటుందా లేదా అని తాను ఇప్పుడే చెప్పబోనని లోకేశ్ అన్నారు. ఎలాంటి ఆలోచనలు లేకుండా ప్రేక్షకులు లియోను ఎంజాయ్ చేయాలని, అందుకే ఎలాంటి హింట్‍లు ఇవ్వడం లేదని స్పష్టం చేశారు.
హాలీవుడ్ సినిమా ఏ హిస్టరీ ఆఫ్ వైలెన్స్ సినిమాను లియో కోసం స్ఫూర్తిగా తీసుకున్నారా అనే ప్రశ్నలకు కూడా లోకేశ్ కనగరాజ్ స్పష్టంగా జవాబివ్వలేదు.
లియో సినిమా అక్టోబర్ 19న తమిళంతో పాటు తెలుగు, మలయాళం, కన్నడ, హిందీ భాషల్లోనూ రిలీజ్ కానుంది. ఈ సినిమాకు అనిరుధ్ రవిచందర్ సంగీతం అందించారు. విజయ్ సరసన హీరోయిన్‍గా చేశారు త్రిష. సంజయ్ దత్, అర్జున్, గౌతమ్ వాసుదేవ్ మీనన్, మన్సూర్ అలీ ఖాన్, మిస్కిన్ కీలకపాత్రలు పోషించారు.
