Katrina Kaif: ఏకంగా 7 గెటప్పుల్లో కత్రీనా కైఫ్.. ఆ ఒక్కదానికోసమే అంత చేశారా?

Tiger 3 Leke Prabhu Ka Naam: బాలీవుడ్ ఇండస్ట్రీలో హాట్ బ్యూటిగా పేరు తెచ్చుకుంది కత్రీనా కైఫ్. నేటి తరం కుర్రకారు హృద‌యాల‌ను గిలిగింత‌లు పెట్టే హీరోయిన్స్‌లో కత్రీనా కైఫ్ గ్లామర్, అభినయానికి ప్రేక్షకులు ఫిదా అవుతుంటారు. అయితే కత్రీనా బాలీవుడ్ భారీ బ‌డ్జెట్ యాక్ష‌న్ థ్రిల్ల‌ర్ ‘టైగర్ 3’లో జోయా అనే పాత్ర‌లో న‌టిస్తోన్న సంగ‌తి తెలిసిందే. ఓ వైపు అద‌రిపొయే యాక్ష‌న్ స‌న్నివేశాల్లో న‌టించి మెప్పించ‌ట‌మే కాకుండా.. క‌ను రెప్ప వేయ‌కుండా వావ్ అనిపించేంత అందంతో ఆక‌ట్టుకునేంత ఆక‌ర్ష‌ణీయంగా కత్రీనా క‌నిపించ‌నుంది.

అందుకు టైగర్ 3 సినిమా నుంచి అక్టోబ‌ర్ 23న విడుదల కానున్న ‘లేకే ప్రభు కా నామ్’ సాంగ్ ఉదాహరణ కానుంది. ‘టైగర్ 3’ చిత్రంలో ‘లేకే ప్రభు కా నామ్..’ పాట‌లో క‌త్రినా కైఫ్ ఒక‌ట్రెండు కాదు.. ఏకంగా 7 అద్భుత‌మైన లుక్స్‌తో అలరించనుంది. ఆమె ఎంటైర్ కెరీర్‌లో ఈ సాంగ్ వ‌న్ ఆఫ్ ది మోస్ట్ ఫేవ‌రేట్ సాంగ్‌గా లేకే ప్ర‌భు కా నామ్‌ నిలవనుంది. ఈ సంద‌ర్భంగా క‌త్రినా మాట్లాడుతూ "లేకే ప్రభు కా నామ్’ విజువ‌ల్‌గా ప్రేక్ష‌కుల‌ను అలా క‌ట్టిప‌డేస్తుంది. అందుక‌నే నా ఫేవ‌రేట్ సాంగ్స్‌లో ఇదొక‌టి" అని చెప్పింది.

"ట‌ర్కీలోని కాప్ప‌డోసియా ప్రాంతంలో ఈ పాట‌ను చిత్రీక‌రించారు. మాషాల్లా, స్వాగ్ సే స్వాగ‌త్ పాట‌ల త‌ర్వాత‌ నా ఫేవ‌రేట్ కొరియోగ్రాఫ‌ర్ వైభ‌వి మ‌ర్చంట్‌తో క‌లిసి ప‌ని చేయ‌టం ఎంతో ఆనందంగా ఉంది. అనితా ష్రాఫ్ అజానియా ఈ పాట‌లో న‌న్ను ఎంతో అద్భుతంగా చూపించారు. ఈ పాట‌లో న‌న్ను ఆమె ఏకంగా ఏడు మెస్మ‌రైజింగ్ లుక్స్‌లో చూపించారు. దేనిక‌దే ప్ర‌త్యేకంగా నిలుస్తుంది. టైగ‌ర్ ఫ్రాంచైజీ నుంచి వ‌చ్చే పాట ఎప్పుడూ చార్ట్ బ‌స్ట‌ర్‌గా నిలుస్తుంది. అదే కోవలో లేకే ప్ర‌భు కా నామ్ పాట‌ను కూడా ప్రేక్ష‌కులు ఆద‌రిస్తార‌ని న‌మ్ముతున్నాను" అని కత్రీనా తెలిపింది.

"వైభ‌వి పాట‌ను చిత్రీక‌రించిన తీరు.. టైగ‌ర్‌, జోయా మ‌ధ్య ఉండే కెమిస్ట్రీ స‌రికొత్త‌గా అల‌రించ‌నుంది. స‌ల్మాన్ ఖాన్‌ గారితో క‌లిసి డాన్స్ చేయ‌టాన్ని ఎప్పుడు ఎంజాయ్ చేస్తాను. లేకే ప్ర‌భు కా నామ్ పాట చిత్రీక‌ర‌ణ‌లో మ‌ర‌చిపోలేని అనుభూతులెన్నో ఉన్నాయి" అని కత్రీనా చెప్పుకొచ్చింది. లేకే ప్ర‌భు కా నామ్ పాట‌ టీజర్ శుక్రవారం విడుదలై వైరల్ అవుతోంది. కాగా మనీష్ శర్మ దర్శకత్వంలో వస్తున్న టైగర్ 3 మూవీ నవంబర్ 12న విడుదల కానుంది.