Kanguva Sequel: కంగువ సీక్వెల్ కూడా వస్తోంది.. రిలీజ్ ఎప్పుడో కూడా చెప్పిన ప్రొడ్యూసర్

Kanguva Sequel: కంగువ.. ఈ ఏడాది మోస్ట్ అవేటెడ్ సినిమాల్లో ఇదీ ఒకటి. మొత్తానికి పలుసార్లు వాయిదా పడిన తర్వాత ఈరోజు (నవంబర్ 14) ప్రపంచవ్యాప్తంగా 11 వేలకుపైగా స్క్రీన్లలో రిలీజైంది. సూర్య, బాబీ డియోల్, దిశా పటానీ నటించిన ఈ సినిమాకు తొలి షో నుంచే బ్లాక్ బస్టర్ టాక్ వచ్చింది. మరి కంగువ సీక్వెల్ ఎప్పుడు వస్తోంది? షూటింగ్, రిలీజ్ ఎప్పుడు అనే వివరాలను నిర్మాత జ్ఞానవేల్ రాజా వెల్లడించాడు.

కంగువ సీక్వెల్ అప్పుడే

కంగువ సీక్వెల్ పై ఈ మూవీ ప్రొడ్యూసర్ కేఈ జ్ఞానవేల్ రాజా ఈ మధ్యే ఈటైమ్స్ కు ఇచ్చిన ఇంటర్వ్యూలో స్పందించాడు. కంగువకు సీక్వెల్ కూడా ప్లాన్ చేస్తున్నట్లు అతడు స్పష్టం చేశాడు. ఈ సీక్వెల్ షూటింగ్ 2026లో మొదలవుతుందని, 2027లో సినిమా ప్రేక్షకుల ముందుకు వస్తుందని జ్ఞానవేల్ తెలిపాడు. వచ్చే ఏడాదే సినిమా ప్రీప్రొడక్షన్ పనులు మొదలు కానున్నాయి. కంగువ సినిమాకు తొలి రోజు, తొలి షో నుంచే వస్తున్న బ్లాక్ బస్టర్ టాక్ నేపథ్యంలో సీక్వెల్ పై ఆసక్తి పెరిగింది.

కంగువ మూవీని రెండు భాగాలుగా తీయాలనే డైరెక్టర్ శివ ప్లాన్ చేసినట్లు జ్ఞానవేల్ చెప్పాడు. ఓ వెబ్ సిరీస్ మోడల్లో ప్రతి పాత్రకు ఓ ఫ్లాష్ బ్యాక్ స్టోరీని చూపించాలని అనుకుంటున్నట్లు తెలిపాడు. వెయ్యేళ్ల కిందట ఉన్న మన పూర్వీకులు ఎలా ఉండేవారు? ప్రతి విషయంలో వాళ్లు ఎంతటి క్రూరంగా వ్యవహరించేవారు? అప్పటి మనకు తెలియని ప్రపంచాన్ని ఈ సినిమా ద్వారా శివ ప్రేక్షకులు ముందుకు తీసుకు వచ్చాడని అతడు తెలిపాడు.

కంగువ.. బ్లాక్ బస్టర్

కంగువ మూవీ సందడి గురువారం (నవంబర్ 14) తెల్లవారుఝాము నుంచే మొదలైంది. తమిళనాడుతోపాటు ఏపీ, కేరళ, కర్ణాటకల్లోనూ ఉదయం 4 గంటల షోలు వేశారు. దీంతో అప్పటి నుంచే సోషల్ మీడియా ద్వారా ప్రేక్షకులు తమ రివ్యూలు ఇస్తున్నారు.

సూర్య నటన అద్భుతమని, కంగువ బ్లాక్ బస్టర్ అని ట్వీట్లు చేస్తున్నారు. ఇటు తెలుగు ప్రేక్షకుల నుంచి కూడా ఈ సినిమాకు పాజిటివ్ రివ్యూలు వస్తుండటం విశేషం. సూర్య, బాబీ డియోల్ పోటీ పడి నటించారని.. ముఖ్యంగా సూర్య పర్ఫార్మెన్స్ ఆస్కార్ లెవల్లో ఉందని కొందరు ప్రేక్షకులు చెప్పారు.

కంగువ ఓటీటీ రిలీజ్

కంగువ మూవీ గురువారం (నవంబర్ 14) ప్రేక్షకుల ముందుకు వచ్చిన విషయం తెలుసు కదా. దీంతో ఈ సినిమా ఓటీటీ రిలీజ్ ఎప్పుడు అన్నదానిపై ఆసక్తి నెలకొంది. ఈ మూవీ ఆరు వారాల తర్వాతే డిజిటల్ ప్రీమియర్ కానుంది. ఆ లెక్కన డిసెంబర్ చివరి వారంలో మూవీ ఓటీటీలోకి అడుగుపెట్టే అవకాశం ఉంది.

ఈ కంగువ డిజిటల్ హక్కులను ప్రైమ్ వీడియో రూ.100 కోట్లకు దక్కించుకున్నట్లు సమాచారం. తెలుగుతోపాటు మొత్తంగా 8 భాషల్లో ఈ సినిమాను రిలీజ్ చేశారు. అన్ని భాషల వెర్షన్లు ప్రైమ్ వీడియోలోకే రానున్నట్లు సమాచారం.