Gunde ninda Gudi gantalu Balu: గుండెనిండా గుడిగంట‌లు బాలు కొత్త సీరియ‌ల్‌కు జీరో టీఆర్‌పీ రేటింగ్ - ఏదో అనుకుంటే...

Gundeninda Gudigantalu Balu: గుండెనిండా గుడిగంట‌లు సీరియ‌ల్‌తో తెలుగు ప్రేక్ష‌కుల‌కు చేరువ‌య్యాడు విష్ణుకాంత్‌. ప్ర‌స్తుతం స్టార్ మా ఛానెల్‌లో టెలికాస్ట్ అవుతోన్న ఈ సీరియ‌ల్ టీఆర్‌పీ రేటింగ్‌లో టాప్ త్రీలో ఒక‌టిగా కొన‌సాగుతోంది. బ్ర‌హ్మ‌ముడి, కార్తీక దీపం 2 త‌ర్వాత స్టార్ మా ఛానెల్‌లో హ‌య్యెస్ట్ వ్యూయ‌ర్‌షిప్ ఉన్న సీరియ‌ల్‌గా నిలిచింది. గుండెనిండా గుడిగంట‌లు సీరియ‌ల్‌లో కుటుంబ బాధ్య‌త‌ల్ని మోస్తూ తండ్రిపై అమిత ప్రేమ ఉన్న కొడుకుగా బాలు పాత్ర‌లో సీరియ‌ల్ ఫ్యాన్స్‌ను ఆక‌ట్టుకుంటోన్నాడు విష్ణుకాంత్‌.

మా ఇంటి దేవ‌త‌...

గుండెనిండా గుడిగంట‌లుతో పాటు తెలుగులో విష్ణుకాంత్ మా ఇంటి దేవ‌త పేరుతో మ‌రో సీరియ‌ల్ చేస్తోన్నాడు. ఇటీవ‌లే జెమిని టీవీలో ఈ కొత్త సీరియ‌ల్ ప్రారంభ‌మైంది.మా ఇంటి దేవ‌త సీరియ‌ల్‌కు ఫ‌స్ట్ వీక్ 0.57 టీఆర్‌పీ రేటింగ్ మాత్ర‌మే వ‌చ్చింది. అర్బ‌న్ ఏరియాలో మ‌రింత త‌క్కువగా 0.46 టీఆర్‌పీ మాత్ర‌మే ద‌క్కించుకున్న‌ది. విష్ణుకాంత్‌కు తెలుగులో ఉన్న పాపులారిటీ కార‌ణంగా లాంఛింగ్ వీక్ మంచి టీఆర్‌పీ రేటింగ్ వ‌స్తుంద‌ని మేక‌ర్స్ భావించారు. కానీ ఈ సీరియ‌ల్ తొలివార‌మే అంచ‌నాల‌ను అందుకోలేక చ‌తికిలా ప‌డింది.

మ‌ధ్యాహ్నం టెలికాస్ట్‌...

మ‌ధ్యాహ్నం ఒక‌టిన్న‌ర నుంచి రెండు గంట‌ల వ‌ర‌కు ఈ మా ఇంటి దేవ‌త సీరియ‌ల్ జెమిని టీవీలో టెలికాస్ట్ అవుతోంది. ప్రైమ్ టైమ్‌లో కాకుండా మ‌ధ్యాహ్నం టెలికాస్ట్ కావ‌డ‌మే టీఆర్‌పీ రేటింగ్‌లో మా ఇంటి దేవ‌త వెనుక‌బ‌డ‌టానికి కార‌ణ‌మ‌ని స‌మాచారం. మా ఇంటి దేవ‌త సీరియ‌ల్‌లో విష్ణుకాంత్‌తో సాటు శిరీష, ఉష‌శ్రీ, హ‌రికృష్ణ కీల‌క పాత్ర‌లో క‌నిపించ‌బోతున్నారు.

బెస్ట్ హ‌జ్బెండ్‌గా అవార్డ్‌...

గుండెనిండా గుడిగంట‌లు సీరియ‌ల్‌కు గాను బెస్ట్ హ‌జ్బెండ్‌గా ఇటీవ‌లే స్టార్ మా ప‌రివార్ అవార్డు అందుకున్నాడు విష్ణుకాంత్‌. అత‌డికి డీజే టిల్లు హీరోయిన్ నేహా శెట్టి అవార్డును అంద‌జేశారు. అవార్డు అందుకుంటోన్న స‌మ‌యంలో విష్ణుకాంత్ ఎమోష‌న‌ల్ అయ్యాడు.

జూనియ‌ర్ ఆర్టిస్ట్‌గా త‌న కెరీర్ ప్రారంభ‌మైంద‌ని, త‌మిళంలో ఓ అవార్డు వేడుక‌ను చూడ‌టానికి వెళితే పాస్ లేద‌ని పంపించార‌ని, ఆ స్టేజ్ నుంచి ఇప్పుడు అవార్డు స్వీక‌రించే స్థాయికి రావ‌డం ఆనందంగా ఉంద‌ని విష్ణుకాంత్ అన్నాడు.

త‌మిళ న‌టితో పెళ్లి...విడాకులు...

గుండెనిండా గుడిగంట‌లు కంటే ముందు త‌మిళంలో ప‌లు టీవీ సీరియ‌ల్స్ చేశాడు విష్ణుకాంత్‌. సిప్పైకుల్ ముత్తు సీరియ‌ల్ న‌టుడిగా అత‌డికి మంచి పేరు తెచ్చిపెట్టింది. ఒరు ఊర్ల ఒరు రాజ‌కుమారి, ఎండేండ్రుమ్ పున్నాగైతో పాటు మ‌రికొన్ని సీరియ‌ల్స్‌లో హీరోగా క‌నిపించాడు. సిప్పైకుల్ ముత్తు న‌టిస్తోన్న స‌మ‌యంలోనే సీరియ‌ల్ హీరోయిన్ సంయుక్త‌తో ప్రేమ‌లో ప‌డ్డ విష్ణుకాంత్ ఆమెను పెళ్లి చేసుకున్నారు. కానీ మ‌న‌స్ప‌ర్థ‌ల‌తో కొన్ని ఏళ్ల‌లోనే విష్ణుకాంత్‌, సంయుక్త విడాకులు తీసుకున్నారు.