Game Changer Teaser: రామ్ చరణ్ ఫ్యాన్స్‌కు దీపావళి ధమాకా.. గేమ్ ఛేంజర్ టీజర్ వచ్చేది ఆ రోజే

Game Changer Teaser: రామ్ చరణ్ అభిమానులకు ఇది నిజంగా పండగలాంటి వార్త. మోస్ట్ అవేటెడ్ మూవీ ఆఫ్ ద ఇయర్ గేమ్ ఛేంజర్ టీజర్ రానుంది. వచ్చే ఏడాది సంక్రాంతికి ప్రేక్షకుల ముందుకు ఈ మూవీ రానుండగా.. రెండు నెలల ముందే టీజర్ ను రిలీజ్ చేయడానికి మూవీ టీమ్ సిద్ధమైంది. తాజాగా దీపావళి పండగ రోజే తమ ఎక్స్ అకౌంట్ ద్వారా మేకర్స్ ఈ విషయాన్ని వెల్లడించారు.

గేమ్ ఛేంజర్ టీజర్ డేట్

ప్రముఖ తమిళ డైరెక్టర్ శంకర్ షణ్ముగం డైరెక్షన్ లో రామ్ చరణ్ నటిస్తున్న మూవీ గేమ్ ఛేంజర్. ఈ సినిమా టీజర్ ను నవంబర్ 9న రిలీజ్ చేయనున్నట్లు ఈ సినిమా మేకర్స్ తెలిపారు. చరణ్ మాస్ లుక్ లో ఉన్న ఓ ఫొటోను షేర్ చేస్తూ ఈ అప్డేట్ ఇచ్చారు. "హ్యాపీ దివాలీ అందరికీ.. నవంబర్ 9 నుంచి గేమ్ ఛేంజర్ టీజర్ సెలబ్రేట్ చేసుకోండి. గేమ్ ఛేంజర్ జనవరి 10, 2025లో థియేటర్లలో రిలీజ్ కానుంది" అనే క్యాప్షన్ తో టీజర్ రిలీజ్ డేట్ అనౌన్స్ చేశారు.

ఈ సందర్భంగా ఓ కొత్త పోస్టర్ ను కూడా ప్రేక్షకుల ముందుకు తీసుకొచ్చారు. ఇందులో రామ్ చరణ్ ఓ మాస్ లుక్ లో కనిపిస్తున్నాడు. ఓ లుంగీ, బ్లాక్ బనియన్, కళ్లకు సన్ గ్లాసెస్ తో స్టైల్ గా రైలు పట్టాల మధ్యలో కూర్చొని ఉండగా.. అతని ముందు కొందరు గూండాలు పట్టాలపై పడి ఉండటం చూడొచ్చు. ఈ పోస్టర్ చరణ్ ఫ్యాన్స్ లో మూవీపై అంచనాలను మరో లెవల్ కు తీసుకెళ్లింది.

గేమ్ ఛేంజర్ మూవీ గురించి..

గేమ్ ఛేంజర్ మూవీని శంకర్ మొదలు పెట్టి చాలా ఏళ్లే అవుతోంది. నిజానికి ఆర్ఆర్ఆర్ తర్వాత చరణ్ నటించిన సోలో మూవీ ఇప్పటి వరకూ రిలీజ్ కాలేదు. దీంతో ఈ గేమ్ ఛేంజర్ కోసం అతని ఫ్యాన్స్ ఎంతోకాలంగా ఎదురుచూస్తున్నారు. ఈ మూవీలో చెర్రీ ఓ ఐఏఎస్ అధికారిగా నటించనున్నాడు.

ఇప్పటికే సినిమా నుంచి వచ్చిన పోస్టర్లు, పాటలకు పాజిటివ్ రెస్పాన్స్ వచ్చింది. అయితే రిలీజే వాయిదా పడుతూ వెళ్లడం అభిమానులను తీవ్ర నిరాశకు గురి చేస్తోంది. మొత్తానికి వచ్చే ఏడాది సంక్రాంతి సందర్భంగా జనవరి 10న గేమ్ ఛేంజర్ మూవీ ప్రేక్షకుల ముందుకు రాబోతోంది. ఈ సినిమాలో చరణ్ సరసన కియారా అద్వానీ నటిస్తోంది.

వీళ్లే కాకుండా ఎస్‌జే సూర్య, శ్రీకాంత్, అంజలి, సముద్రఖని, నవీన్ చంద్రలాంటి ఎంతో మంది టాలెంటెడ్ నటీనటులు కూడా గేమ్ ఛేంజర్ లో ఉన్నారు. ఈ సినిమాపై భారీ అంచనాలే ఉన్నాయి. ముఖ్యంగా ఈ ఏడాది ఇండియన్ 2తో ఓ డిజాస్టర్ ఇచ్చిన శంకర్.. చరణ్ అభిమానులను ఎంతమేర ఆకట్టుకుంటాన్నది పెద్ద ప్రశ్నగా మిగిలింది. ఈ సినిమాకు తమన్ మ్యూజిక్ అందిస్తున్నాడు.