Raayan Box Office: మండే టెస్ట్ పాసైన ధనుష్ ‘రాయన్’ సినిమా.. నాలుగు రోజుల కలెక్షన్లు ఇవే
Raayan 4 Days Collections: రాయన్ సినిమాకు కలెక్షన్ల వర్షం కురుస్తోంది. నాలుగో రోజైన సోమవారం కూడా ఈ సినిమా మంచి వసూళ్లను సాధించింది. దీంతో వసూళ్లు స్టడీగా ఉండే అవకాశం ఉంది.
రాయన్ సినిమా భారీ హిట్ దశగా ముందుకు సాగుతోంది. ధనుష్ దర్శకత్వం వహించి హీరోగా నటించిన సినిమా జూలై 26వ తేదీన రిలీజైంది. ముందుగా కాస్త మిక్స్డ్ టాక్ వచ్చినా.. బాక్సాఫీస్ వద్ద భారీ ఓపెనింగ్ అందుకుంది. తొలి వీకెండ్‍లో భారీ వసూళ్లను దక్కించుకుంది. సోమవారం కూడా మంచి వసూళ్లే దక్కించుకుంది. రాయన్ చిత్రం నాలుగు రోజుల్లో ఎంత కలెక్షన్లను సాధించిందంటే..
కలెక్షన్లు ఇలా..
యాక్షన్ థ్రిల్లర్ చిత్రం రాయన్ నాలుగు రోజుల్లో ప్రపంచవ్యాప్తంగా రూ.87.65 కోట్ల గ్రాస్ కలెక్షన్లను దక్కించుకుంది. ఈ విషయాన్ని మూవీ టీమ్ అధికారికంగా ప్రకటించింది. కలెక్షన్ల లెక్కతో ఓ పోస్టర్‌ను సోషల్ మీడియాలో నేడు (జూలై 30) పోస్ట్ చేసింది.
మండే టెస్ట్ పాస్!
సాధారణంగా సినిమాలకు రిలీజ్ తర్వాత వచ్చే మొదటి సోమవారం చాలా కీలకంగా ఉంటుంది. చాలా వరకు క్రేజ్ ఉన్న సినిమాలకు ఫస్ట్ వీకెండ్ మంచి కలెక్షన్లే వస్తాయి. అయితే, ఆ తర్వాత మండే వచ్చే వసూళ్లను బట్టే ట్రెండ్ అర్థమవుతోంది. ఈ విషయంలో రాయన్ చిత్రం దాదాపు మండే టెస్ట్ పాసైనట్టే చెప్పొచ్చు. నాలుగో రోజైన సోమవారం ఈ మూవీకి రూ.12కోట్లకు పైగా కలెక్షన్లు వచ్చాయి.
రాయన్ మూవీకి తొలి మూడు రోజుల్లో దాదాపు రూ.75కోట్ల వసూళ్లు వచ్చాయి. ధనుష్‍కు ఇదే బిగ్గెస్ట్ వీకెండ్ ఓపెనింగ్‍గా నిలిచింది. సోమవారం కూడా బాక్సాఫీస్ వద్ద నిలదొక్కుకోవటంతో ఈ చిత్రానికి కలెక్షన్లు స్టడీగా ఉండే అవకాశం ఉంది. త్వరగానే ఈ చిత్రం రూ.100 కోట్ల కలెక్షన్లు దాడటం ఖాయంగా కనిపిస్తోంది. ధనుష్‍కు హీరోగా ఇది 50వ సినిమా కావడం, ఆయనే దర్శకత్వం వహించడం మరింత ప్రత్యేకంగా ఉంది. డైరక్టర్‌గా ఆయనకు ఇది రెండో చిత్రం.
రాయన్ సినిమా తమిళంతో పాటు తెలుగులోనూ థియేటర్లలో రిలీజ్ అయింది. ఈ మూవీకి తమిళనాడులోనే ఇప్పటి వరకు సుమారు రూ.40 కోట్ల వసూళ్లు వచ్చాయి. తెలుగు రాష్ట్రాల్లో రూ.9కోట్ల కలెక్షన్లను దాటింది. దక్షిణాదిలోని ఇతర రాష్ట్రాల్లోనూ మంచి కలెక్షన్లు వస్తున్నాయి ఓవర్సీస్‍లో రూ.25 కోట్ల వరకు వసూళ్లు రాబట్టింది.
రాయన్ చిత్రంలో ధనుష్ సోదరులుగా తెలుగు హీరో సందీప్ కిషన్, సందీప్ కిషన్, కాళి దాసు జయరాం నటించారు. దుషరా విజయన్ సోదరి పాత్ర పోషించారు. రివేంజ్ యాక్షన్ థ్రిల్లర్‌గా ఈ చిత్రాన్ని ధనుష్ తెరకెక్కించారు. ఈ మూవీకి నటీనటుల పర్ఫార్మెన్స్ హైలైట్‍గా నిలిచింది. యాక్షన్ సీక్వెన్సులు ప్రేక్షకులను బాగా ఆకట్టుకుంటున్నాయి. కథలో కొత్తదనం లేకపోయినా ధనుష్ తెరకెక్కించిన తీరు మెప్పిస్తోంది. ఈ చిత్రంలో అపర్ణా బాలమురళి, ఎస్‍జే సూర్య, శరవణన్, సెల్వ రాఘవన్, ప్రకాశ్ రాజ్ కూడా కీరోల్స్ చేశారు. ఈ చిత్రానికి ఆస్కార్ విన్నర్ ఆర్ రహమాన్ సంగీతం అందించారు. సన్ పిక్చర్స్ బ్యానర్ నిర్మించింది.
మహేశ్ బాబు ప్రశంసలు
రాయన్ చిత్రంపై టాలీవుడ్ సూపర్ స్టార్ మహేశ్ బాబు ప్రశంసలు కురిపించారు. ధనుష్ నటన, దర్శకత్వం అద్భుతంగా ఉన్నాయని ట్వీట్ చేశారు. ఎస్‍జే సూర్య, సందీప్ కిషన్, ప్రకాశ్ రాజ్ సహా నటీనటులందరూ సూపర్ పర్ఫార్మెన్స్ ఇచ్చారని పేర్కొన్నారు. ఏఆర్ రహమాన్ కూడా ఎలక్ట్రిఫయింగ్ మ్యూజిక్ ఇచ్చారని మహేశ్ రాసుకొచ్చారు. తప్పకుండా చూడాల్సిన ఈ చిత్రం అంటూ పోస్ట్ చేశారు.
