Bigg Boss 8 Telugu: బిగ్‌బాస్ తెలుగు సీజ‌న్ 8 లాంఛింగ్ డేట్ ఇదేనా? - కంటెస్టెంట్స్ ఎవ‌రంటే?

Bigg Boss 8 Telugu: బిగ్‌బాస్ సంద‌డి తెలుగులో మ‌ళ్లీ మొద‌లుకాబోతోంది. బిగ్‌బాస్ సీజ‌న్ 8ను ప్రారంభించేందుకు స్టార్ మా స‌న్నాహాలు చేస్తోంది. బిగ్‌బాస్ 8 తెలుగు సెప్టెంబ‌ర్ నుంచి మొద‌లుకానున్న‌ట్లు స‌మాచారం. సెప్టెంబ‌ర్ 1 లేదా 8వ తేదీ నుంచి ఈ రియాలిటీ షోను ఆఫీషియ‌ల్‌గా లాంఛ్ చేయాల‌ని స్టార్ మా భావిస్తోన్న‌ట్లు వార్త‌లు వినిపిస్తోన్నాయి.

ఆగ‌స్ట్ నెలాఖ‌రున బిగ్‌బాస్ లాంఛింగ్ డేట్‌పై క్లారిటీ రానున్న‌ట్లు స‌మాచారం. బిగ్‌బాస్ సీజ‌న్ 8కు సంబంధించి కంటెస్టెంట్స్‌ను ఎంపిక‌చేసే ప‌నిలో స్టార్ మా బిజీగా ఉన్న‌ట్లు స‌మాచారం. ఇప్ప‌టివ‌ర‌కు కొంత‌మంది ఫైన‌ల్ అయిన‌ట్లు తెలిసింది. మిగిలిన వారిని ఎంపిక‌చేసిన త‌ర్వాత కంటెస్టెంట్స్ పుల్ లిస్ట్ ను రివీల్ చేయ‌నున్న‌ట్లు తెలుస్తోంది.

సోష‌ల్ మీడియా...టీవీ స్టార్స్‌...

ఈ సారి బిగ్‌బాస్ హౌజ్‌లోకి సోష‌ల్ మీడియా, టీవీ స్టార్స్‌తో పాటు కొంద‌రు సినిమా న‌టీన‌టులు కూడా కంటెంస్టెంట్స్‌గా ఎంట్రీ ఇచ్చే అవ‌కాశం ఉన్న‌ట్లు స‌మాచారం. ఇటీవ‌లే శ‌శిమ‌ధ‌నం తెలుగు వెబ్‌సిరీస్‌తో ప్రేక్ష‌కుల ముందుకొచ్చిన సోనియా సింగ్ బిగ్‌బాస్‌లోకి కంటెస్టెంట్‌గా అడుగుపెట్ట‌నున్న‌ట్లు ప్ర‌చారం జ‌రుగుతోంది. విడాకులు తీసుకొని వార్త‌ల్లో నిలిచిన యూట్యూబ‌ర్ నేత్ర‌తో పాటు ఆమె మాజీ భ‌ర్త వంశీ కూడా బిగ్‌బాస్ 8లో పాల్గొనే అవ‌కాశం ఉంద‌ని అంటున్నారు.

జ‌బ‌ర్ధ‌స్థ్ నుంచి ఇద్ద‌రు...

జ‌బ‌ర్ధ‌స్త్ కామెడీ షో నుంచి ప్ర‌తి సీజ‌న్‌లో ఒకరు లేదంటే ఇద్ద‌రు ఆర్టిస్టులు బిగ్‌బాస్‌లో కంటెస్టెంట్స్‌గా క‌నిపిస్తూ వ‌చ్చారు. బిగ్‌బాస్ సీజ‌న్ 7లో మాత్రం జ‌బ‌ర్ధ‌స్థ్ నుంచి ఎవ‌రికి అవ‌కాశం ఇవ్వ‌లేదు. ఈ సీజ‌న్‌లో ఒక‌రు ఖ‌చ్చితంగా బిగ్‌బాస్‌లో పాల్గొన‌నున్న‌ట్లు స‌మాచారం. బిగ్‌బాస్ కంటెస్టెంట్స్‌గా ఈ సీజ‌న్‌లో జ‌బ‌ర్ధ‌స్థ్ నుంచి పొట్టి న‌రేష్, రియాజ్, కిరాక్ ఆర్‌పీ, బుల్లెట్ భాస్క‌ర్‌ల పేర్లు వినిపిస్తున్నాయి.

ఇందులో ఎవ‌రూ హౌజ్‌లోకి ఎంట్రీ ఇస్తార‌న్న‌ది సెప్టెంబ‌ర్‌లోనే క్లారిటీ రానుంది. అలాగే బంచిక్ బ‌బ్లూ, రీతూ చౌద‌రి, సురేఖ వాణి కూతురు సుప్రిత‌, యూట్యూబ‌ర్ నిఖిల్ విజ‌యేంద్ర‌సింహా , బ‌ర్రెల‌క్క‌, కుమారి ఆంటీ, ఖుషిత క‌ల్ల‌పు పేర్లు కూడా బిగ్‌బాస్ కంటెస్టెంట్స్‌గా ప్ర‌చారం జ‌రుగుతోన్నాయి.

వేణు స్వామి కూడా...

కొన్ని సీజ‌న్‌లో రియ‌ల్ లైఫ్ భార్యాభ‌ర్త‌లు బిగ్‌బాస్‌లో కంటెస్టెంట్స్‌గా క‌నిపించారు. ఈ సారి ఎక్‌నాథ్‌, హారిక జోడి బిగ్‌బాస్‌లో సంద‌డి చేయ‌బోతున్న‌ట్లు చెబుతోన్నారు. బిగ్‌బాస్ ద్వారానే పాపుల‌ర్‌గా అయినా కొంద‌రు ఓల్డ్ కంటెస్టెంట్స్ కూడా బిగ్‌బాస్‌లోకి ఎంట్రీ ఇచ్చే అవ‌కాశం ఉంద‌ని అంటున్నారు. వారిలో యాంక‌ర్ శివ, స్ర‌వంతి చొక్కార‌పు పేర్లు ఎక్కువ‌గా వినిపిస్తున్నాయి.

వీరే కాకుండా సెలిబ్రిటీ ఆస్ట్రాల‌జ‌ర్ వేణుస్వామి, యాంక‌ర్స్ వ‌ర్ణిణి, విష్ణుప్రియ తో పాటు హేమ‌, రాజ్‌త‌రుణ్ కంటెస్టెంట్స్‌గా ఇచ్చే ఛాన్స్ ఉంద‌ని అంటున్నారు. వీరిలో కొంద‌రికి భారీగానే బిగ్‌బాస్ మేక‌ర్స్ రెమ్యున‌రేష‌న్ ఆఫ‌ర్ చేసిన‌ట్లు స‌మాచారం. బిగ్‌బాస్ యాజ‌మాన్యం ఆఫ‌ర్‌ను ఎంత‌మంది అంగీక‌రిస్తారు? ఎవ‌రూ హౌజ్‌లోకి ఎంట్రీ ఇస్తార‌న్న‌ది త్వరలోనే కన్ఫామ్ కానుంది.

నాగార్జున‌నే హోస్ట్‌...

బిగ్‌బాస్ సీజ‌న్ 8కు హోస్ట్ మార‌నున్న‌ట్లు ప్ర‌చారం జ‌రిగింది. నాగార్జున స్థానంలో మ‌రో స్టార్ హీరో బిగ్ హోస్ట్ బాధ్య‌త‌లు స్వీక‌రించే అవ‌కాశం ఉన్న‌ట్లు వార్త‌లొచ్చాయి. ఆ పుకార్ల‌లో నిజం లేద‌ని తెలుస్తోంది. బిగ్‌బాస్ సీజ‌న్ 7 స‌క్సెస్ కావ‌డంతో హోస్ట్‌ను మార్చాల‌నే నిర్ణ‌యాన్ని స్టార్ మా యాజ‌మాన్యం వాయిదావేసుకున్న‌ట్లు స‌మాచారం.

మ‌రోసారి హోస్ట్‌గా బిగ్‌బాస్ సీజ‌న్ 8లో కూడా నాగార్జున‌నే క‌నిపించ‌బోతున్న‌ట్లు స‌మాచారం. బిగ్‌బాస్ ఫ‌స్ట్ సీజ‌న్‌కు ఎన్టీఆర్‌, సెకండ్ సీజ‌న్‌కు నాని హోస్ట్‌గా వ్య‌వ‌హ‌రించారు. ఆ త‌ర్వాత మూడు నుంచి ఏడు వ‌ర‌కు మొత్తం ఐదు సీజ‌న్స్‌కు నాగార్జున హోస్ట్‌గా ఉన్నాడు. బిగ్‌బాస్ సీజ‌న్ 8 హోస్ట్‌గా నాగార్జున‌కు ఆరో సీజ‌న్‌.