Allu Arjun - Mangalavaaram: ‘మంగళవారం’ మూవీ ప్రీ-రిలీజ్ ఈవెంట్‍కు అల్లు అర్జున్! ఎప్పుడంటే..

Allu Arjun - Mangalavaaram: ఆర్ఎక్స్100 మూవీతో డైరెక్టర్ అజయ్ భూపతి బంపర్ హిట్ కొట్టారు. అదిరిపోయే ఆరంభాన్ని అందుకున్నారు. ఆ తర్వాత ఆయన డైరెక్ట్ చేసిన మహాసముద్రం సినిమా నిరాశపరిచింది. తదుపరి అజయ్ భూపతి దర్శకత్వంలో ‘మంగళవారం’ సినిమా రూపొందింది. ఇటీవలే వచ్చిన ఈ సినిమా ట్రైలర్ ఆద్యంత్యం ఉత్కంఠగా సాగింది. సైకలాజికల్ యాక్షన్ థ్రిల్లర్‌గా ఈ మూవీని అజయ్ తెరకెక్కించారు. మంగళవారం సినిమా నవంబర్ 17న థియేటర్లలో రిలీజ్ కానుంది. కాగా, మంగళవారం సినిమా ప్రీ-రిలీజ్ ఈవెంట్‍కు ఐకాన్ స్టార్ అల్లు అర్జున్ హాజరువుతారని సమాచారం బయటికి వచ్చింది.

మంగళవారం ప్రీ-రిలీజ్ ఈవెంట్‍కు అల్లు అర్జున్ ముఖ్యఅతిథిగా వెళ్లడం దాదాపు ఖరారైంది. అధికారిక ప్రకటన రావాల్సి ఉంది. మంగళవారం ప్రీ-రిలీజ్ ఈవెంట్ నవంబర్ 11వ తేదీన హైదరాబాద్‍లో జరగనుంది.

మంగళవారం సినిమాలో ఆర్ఎక్స్100 భామ పాయల్ రాజ్‍పుత్ ప్రధాన పాత్ర పోషిస్తోంది. ఈ చిత్రంలో పాయల్ బోల్డ్ క్యారెక్టర్ చేసినట్టు ట్రైలర్ చూస్తే అర్థమవుతోంది. ఈ చిత్రంలో నందితా శ్వేత, దివ్య పిళ్లై, అజ్మల్ అమీర్, రవీంద్ర విజయ్, కృష్ణ చైతన్య, అజయ్ ఘోష్, శ్రవణ్ రెడ్డి కీలకపాత్రలు పోషించారు.

ఓ గ్రామంలో ప్రతీ మంగళవారం మరణాలు సంభవించే మిస్టరీ చుట్టూ ఈ సినిమా రూపొందింది. అజయ్ భూపతి దర్శకత్వం వహించిన మంగళవారం మూవీకి అజ్నీశ్ లోకనాథ్ సంగీతం అందించారు. ముద్రా మీడియా వర్క్స్, ఏ క్రియేటివ్ వర్క్స్ బ్యానర్లపై స్వాతి రెడ్డి గునుపాటి, సురేశ్ వర్మ ఈ చిత్రాన్ని నిర్మించారు. శివేంద్ర దాశరధి సినిమాటోగ్రఫీ చేయగా.. మాధవ్ కుమార్ ఎడిటింగ్ చేశారు.

మంగళవారం సినిమా నవంబర్ 17న తెలుగుతో పాటు హిందీ, తమిళం, కన్నడ భాషల్లోనూ రిలీజ్ కానుంది. ఈ మూవీ ట్రైలర్‌ను మెగాస్టార్ చిరంజీవి లాంచ్ చేశారు. ఇప్పుడు ఐకాన్ అల్లు అర్జున్ ఈ సినిమా ప్రీ-రిలీజ్ ఈవెంట్‍కు ముఖ్యఅతిథిగా హాజరుకానున్నారు. దీంతో ఈ చిత్రానికి హైప్ మరింత పెరిగింది.