Adani Group: యూఎస్ లో అదానీ గ్రూప్ పై అభియోగాలను విచారిస్తున్న భారత సంతతి అధికారులు వీరే..

Gautam Adani: భారత బిలియనీర్ గౌతమ్ అదానీ, ఆయన సమీప బంధువు సాగర్ అదానీ, అదానీ గ్రూప్ నకు చెందిన ఇతర ఎగ్జిక్యూటివ్ లపై లంచం ఇచ్చారనే ఆరోపణలపై అమెరికాలో దర్యాప్తు జరుగుతోంది. ఈ దర్యాప్తులో యూఎస్ సెక్యూరిటీస్ అండ్ ఎక్స్ఛేంజ్ కమిషన్ (SEC) ఎన్ఫోర్స్మెంట్ విభాగం యాక్టింగ్ డైరెక్టర్ సంజయ్ వాధ్వా కీలక పాత్ర పోషిస్తున్నారు.

ఎవరినీ వదలం: సంజయ్ వాధ్వా

సౌర విద్యుత్ ఒప్పందాల్లో తమకు అనుకూలంగా వ్యవహరించడానికిి భారత ప్రభుత్వ ఉన్నతాధికారులకు సుమారు రూ.2,100 కోట్ల మేర లంచం ఇచ్చినట్టు అదానీ (adani Group ) ప్రతినిధులపై హైప్రొఫైల్ లంచం ఆరోపణలు కేంద్రీకృతమయ్యాయి. వైట్ హౌజ్ స్పందించేవరకు వెళ్లిన ఈ అభియోగాలపై దర్యాప్తును సంజయ్ వాధ్వా స్వయంగా పర్యవేక్షిస్తున్నారు. సెక్యూరిటీల ఉల్లంఘనలకు కార్పొరేట్ లీడర్లను బాధ్యులను చేయడంలో వాధ్వాది అందెవేసిన చేయి. సెక్యూరిటీల చట్టాన్ని ఉల్లంఘించినందుకు సీనియర్ కార్పొరేట్ అధికారులు, డైరెక్టర్లతో సహా ఇందులో పాత్ర ఉన్న అందరినీ కమిషన్ విచారిస్తుందని ఇటీవల ఆయన స్పష్టం చేశారు.

అభియోగాలు ఏంటి?

గౌతమ్ అదానీ (Gautam Adani), సాగర్ అదానీ ఒక ఆఫర్ ప్రక్రియ ద్వారా అదానీ గ్రీన్ బాండ్లను కొనుగోలు చేయడానికి యుఎస్ (usa)పెట్టుబడిదారులను ప్రేరేపించారు. అదానీ గ్రీన్ ప్రాజెక్ట్ భారత్ లో విజయవంతం అవుతుందని, అందుకు వీలుగా ప్రభుత్వ పెద్దలకు, అధికారులకు పెద్ద ఎత్తున లంచాలను ఇచ్చామని వారు యుఎస్ పెట్టుబడిదారులకు చెప్పారు. ఇది అమెరికాలో సెక్యూరిటీ నిబంధనల ఉల్లంఘన అని యూఎస్ సెక్యూరిటీస్ అండ్ ఎక్స్ఛేంజ్ కమిషన్ స్పష్టం చేసింది.

సంజయ్ వాధ్వా ఎవరు?

సంజయ్ వాధ్వా ఫ్లోరిడా అట్లాంటిక్ విశ్వవిద్యాలయం నుంచి బ్యాచిలర్ ఆఫ్ బిజినెస్ అడ్మినిస్ట్రేషన్, న్యూయార్క్ యూనివర్సిటీ స్కూల్ ఆఫ్ లా నుంచి టాక్సేషన్ లో మాస్టర్ ఆఫ్ లాస్ (LLM) పట్టా పొందారు. అదనంగా, అతను టెక్సాస్ సౌత్ కాలేజ్ ఆఫ్ లా హ్యూస్టన్ నుండి జ్యూరిస్ డాక్టర్ డిగ్రీని పొందాడు. అతని వృత్తిపరమైన ప్రయాణం 1996 లో కాహిల్ గోర్డాన్ & రీనెల్ ఎల్ఎల్పిలో టాక్స్ అసోసియేట్ గా ప్రారంభమైంది. 2000 లో, అతను స్కాడెన్, ఆర్ప్స్, స్లేట్, మీఘర్ & ఫ్లోమ్ ఎల్ఎల్పి మరియు అఫిలియేట్స్ లో చేరాడు, పన్ను చట్టంలో అతనిది స్పెషలైజేషన్. వాధ్వా 2003లో ఎస్ఈసీ ఎన్ఫోర్స్మెంట్ విభాగంలో స్టాఫ్ అటార్నీగా చేరారు. రెండు దశాబ్దాలకు పైగా బ్రాంచ్ చీఫ్, అసిస్టెంట్ డైరెక్టర్, మార్కెట్ అబ్యూస్ యూనిట్ డిప్యూటీ చీఫ్ వంటి కీలక బాధ్యతలు నిర్వర్తించారు. 2021 లో, వాధ్వా ఎన్ఫోర్స్మెంట్ విభాగానికి డిప్యూటీ డైరెక్టర్ గా నియమితులయ్యారు. అనంతరం, 2024 అక్టోబర్ లో యాక్టింగ్ డైరెక్టర్ గా పదోన్నతి పొందారు. వాధ్వాతో పాటు మరో భారత సంతతికి చెందిన తేజల్ షా కూడా అదానీ గ్రూపులపై దర్యాప్తునకు నేతృత్వం వహించడం గమనార్హం.