CM Jagan : సమాజాన్ని ప్రభావితం చేసిన అసామాన్యులకు వైఎస్ఆర్ అవార్డులు ప్రదానం- సీఎం జగన్

CM Jagan : విజయవాడలో వైఎస్ఆర్ అవార్డుల ప్రదానోత్సవం కార్యక్రమంలో సీఎం వైఎస్ జగన్ పాల్గొన్నారు. ఈ కార్యక్రమంలో సీఎం జగన్ మాట్లాడుతూ...రాష్ట్ర ప్రజలందరికీ రాష్ట్ర అవతరణ దినోత్సవ శుభాకాంక్షలు తెలిపారు. ఆంధ్రప్రదేశ్ అవతరించి నేటికి 67 సంవత్సరాలైందన్నారు. మన రాష్ట్రాన్ని వివిధ రంగాల్లో దశాబ్దాలుగా సుసంపన్నం చేసిన మహనీయులను గౌరవిస్తూ వైఎస్ఆర్ అవార్డులతో సత్కరించే సంప్రదాయం మూడు సంవత్సరాలుగా పాటిస్తున్నామన్నారు. సమాజాన్ని ఎంతగానో ప్రభావితం చేస్తూ వివిధ రంగాల్లో ఎదిగిన అసామాన్యులకు ఇస్తున్న అవార్డులు ఇవి అన్నారు. ఈ సంవత్సరం 27 మందికి వైఎస్ఆర్ అవార్డులతో సత్కరిస్తున్నామన్నారు. ఈ ఏడాది నలుగురికి అచీవ్‌మెంట్, 23 మందికి లైఫ్ టైమ్ అచీవ్‌మెంట్ అవార్డులు ప్రదానం చేయబోతున్నామన్నారు.

వైఎస్ఆర్ పేరిట అత్యున్నత అవార్డులు

"తెలుగుతనానికి, తెలుగు మాటకు, తెలుగు వాడి గుండె ధైర్యానికి మన పల్లెలు, మన పేదలు, మన రైతుల మీద మమకారానికి, మన సంస్కృతి, సంప్రదాయాలకు నిలువెత్తు రూపం డాక్టర్ వైయస్సార్ పేరిట రాష్ట్ర ప్రభుత్వం అత్యున్నత అవార్డులు ప్రదానం చేస్తున్నాం. వైఎస్ఆర్ హయాంలో వ్యవసాయం, విద్య, వైద్యం, గృహ నిర్మాణం ఇలా ఏ రంగాన్ని తీసుకున్నా అంతకు ముందున్న చరిత్ర గతిని మారుస్తూ ఎన్నో ముందడుగులు పడిన పరిస్థితులు మనమంతా చూశాం. ఇలాంటి రంగాల్లోనే మన వ్యవసాయానికి, చేనేతకు, తప్పెటగూళ్లకు, మన జానపదానికి, మన రంగస్థలానికి, మన అభ్యుదయవాదానికి, హేతువాదానికి సాటి మనుషులకు చేస్తున్న సేవలకు, ఇలా పలు రంగాల్లో విశిష్ట సేవలందిస్తున్న గొప్ప వ్యక్తులకు ఈ ఏడాది అవార్డుల్లో చోటుదక్కింది."- సీఎం జగన్

మీరే మన జాతి సంపద

మన హెరిటేజ్‌ను తమ భుజాల మీద మోసిన వారు, వీరంతా మన జాతి సంపద అని సీఎం జగన్ అన్నారు. సమాజం ఇచ్చిన గుర్తింపు ఆధారంగా ప్రదానం చేస్తున్న ఈ అత్యున్నత అవార్డుల్లో చరిత్రలో కనీవినీ ఎరుగని విధంగా ఈ మూడు సంవత్సరాల్లో సామాజిక న్యాయం వర్ధిల్లిందన్నారు. ఈ అవార్డులు అందుకుంటున్న ప్రతి ఒక్కరికీ హృదయపూర్వకంగా అభినందనలు తెలిపారు.