Australia Accident: స్నేహితుడిని కాపాడే యత్నంలో ఆస్ట్రేలియాలో ఇద్దరు ఏపీ యువకుల మృతి

Australia Accident: ఆస్ట్రేలియాలోని జ‌ల‌పాతంలో కొట్టుకుపోయి ఇద్ద‌రు ఆంధ్ర యువకులు మృతి చెందారు. జ‌ల‌పాతంలోకి జారిప‌డిన తోటి స్నేహితుడిని కాపాడేందుకు ప్ర‌య‌త్నించే క్ర‌మంలో ఇద్ద‌రూ జ‌ల‌పాతంలో ప‌డి చ‌నిపోయారు. ఇద్ద‌రిలో ఒక‌రు బాప‌ట్ల జిల్లాల‌కు చెందిన వారు కాగా, మ‌రొక‌రు నెల్లూరు జిల్లాకు చెందిన యువకుడు. ఈ వార్త తెలిసి కుటుంబ స‌భ్యులు క‌న్నీరు మున్నీరు అయ్యారు. ఆయా ప్రాంతాల్లో విషాద ఛాయ‌లు అలుముకున్నాయి.

ఈ ఘ‌ట‌న మంగ‌ళ‌వారం ఆస్ట్రేలియాలోని ఉత్త‌ర క్వీన్స్‌లాండ్‌లోని మిల్లా మిల్లా వాట‌ర్ ఫాల్స్ వ‌ద్ద చోటు చేసుకుంది. నెల్లూరు జిల్లా కందుకూరి మండ‌లం వ‌రప‌ర్ల‌వారిపాలెం గ్రామానికి చెందిన ముప్ప‌రాజు చైత‌న్య (29) ఎంఎస్ కోసం ఆస్ట్రేలియా వెళ్లారు. చ‌దువు పూర్తి అయిన త‌రువాత అక్క‌డే ఉండి ఉద్యోగం చేస్తున్నారు. బాప‌ట్ల‌కు చెందిన చెందిన బొబ్బ సూర్య‌తేజ కూడా ఆస్ట్రేలియాలో ఎంఎస్ చేశారు. ఇద్ద‌రూ స్నేహితులు.

నెల్లూరుకు చెందిన ముప్ప‌రాజు రామారావు, ర‌మాదేవికి కుమారుడు చైతన్య‌, కుమార్తె ఉన్నారు. చైత‌న్య ఆస్ట్రేలియాలో ఉండ‌గా, కుమార్తె అమెరికాలో ఉంటుంది. గుంటురూలో బీటెక్ పూర్తి చేసుకున్న చైతన్య, ఎంఎస్ చేయ‌డానికి ఆస్ట్రేలియా వెళ్లారు. 2023లో ఆయ‌న‌కు గుంటూరు జిల్లాల‌కు చెందిన యువతితో వివాహం జ‌రిగింది. భార్య‌తో క‌లిసి చైత‌న్య ఆస్ట్రేలియాలోనే నివాసం ఉంటున్నాడు. భార్య ఇటీవ‌ల స్వ‌గ్రామానికి వ‌చ్చింది.

దీంతో చైతన్య మరో ఇద్ద‌రు స్నేహితుల‌తో క‌లిసి మంగ‌వారం ఆస్ట్రేలియాలోని ఉత్త‌ర క్వీన్స్‌లాండ్‌లోని మిల్లా మిల్లా వాట‌ర్ ఫాల్స్ వ‌ద్ద‌కు విహార‌యాత్ర‌కు వెళ్లారు. స్నేహితుడు సూర్య‌తేజ జ‌ల‌పాతంలోకి జారిప‌డ‌టంతో ఆయ‌న‌ను కాపాడేందుకు చైతన్య‌ ప్ర‌య‌త్నించాడు. ఈ క్ర‌మంలో చైత‌న్య కూడా జ‌ల‌పాతంలోకి ప‌డిపోయాడు. ప్ర‌మాద‌వ‌శాత్తు ఇద్ద‌రు జ‌ల‌పాతంలో ప‌డి మునిగిపోయారు. ఉధృతంగా ప్ర‌వ‌హిస్తున్న జ‌ల‌పాతంలో ఇద్ద‌రూ కొట్టుకెళ్లిపోయారు.

దీంతో ఊపిరాడ‌క చైతన్య‌, సూర్య‌తేజ మ‌ర‌ణించారు. స్థానిక పోలీసులకు స‌మాచారం ఇవ్వ‌డంతో పోలీసులు ఘ‌ట‌న స్థలానికి చేరుకుని గాలింపు చ‌ర్య‌లు చేప‌ట్టారు. హెలికాప్ట‌ర్‌ను ఉప‌యోగించి రెస్య్కూ చేప‌ట్ట‌గా కొంత స‌మ‌యానికి ఇద్ద‌రి మృత దేహాలు ల‌భ్యం అయ్యాయి. ఈ మృత‌దేహాల‌కు పోలీసులు ఫార్మ‌ల్టీస్ పూర్తి ఇండియాకు పంపేందుకు ఏర్ప‌ట్లు చేస్తున్నారు.

చైత‌న్య తండ్రి రామారావు 10 ఏళ్ల క్రితం జిల్లాలోని సింగ‌రాయ‌కొండ మండ‌లం పాక‌ల స‌ముద్ర తీరంలో పురుగుల మందు తాగి ఆత్మ‌హ‌త్య చేసుకున్నారు. చైతన్య మ‌ర‌ణ వార్త తెలుసుకున్న త‌ల్లి, బంధువులు క‌న్నీరుమున్నీరు అయ్యారు. అలాగే సూర్య‌తేజ మ‌ర‌ణ వార్త తెలుసుకున్న కుటుంబ స‌భ్యులు రోద‌న‌లు మిన్నంటాయి.

(జ‌గ‌దీశ్వ‌ర‌రావు జ‌ర‌జాపు, హిందుస్తాన్ టైమ్స్ తెలుగు)