APPSC Group 2 Mains Date : ఏపీపీఎస్సీ గ్రూప్-2 మెయిన్స్ పై బిగ్ అప్డేట్, జనవరి 5న రాత పరీక్ష

ఏపీ గ్రూప్-2 మెయిన్స్ పై ఏపీపీఎస్సీ బిగ్ అప్డేట్ ఇచ్చింది. వచ్చే ఏడాది జనవరి 5న గ్రూప్-2 సర్వీసెస్ మెయిన్స్ రాత పరీక్ష నిర్వహించనున్నట్లు ప్రకటించింది. ఈ మేరకు బుధవారం ఓ ప్రకటన చేసింది. మొత్తం 13 జిల్లాల్లో జనవరి 05, 2025 గ్రూప్-2 మెయిన్స్ నిర్వహించనున్నట్లు తెలిపింది. ఈ పరీక్షను రెండు సెషన్లలో నిర్వహిస్తారు. దాదాపు లక్ష మంది అభ్యర్థులు ఈ పరీక్షకు హాజరు కానున్నారు. డీఎస్సీ, ఎస్ఎస్సీ, ఇంటర్ పరీక్షలను పరిగణనలోకి తీసుకుని తేదీని ఖరారు చేసినట్లు ఏపీపీఎస్సీ తెలిపింది. మరిన్న వివరాలకు కమిషన్ వెబ్‌సైట్ https://portal-psc.ap.gov.in/ సందర్శించాలని సూచించింది.

గత ఏడాది డిసెంబర్‌లో 899 పోస్టులతో ఏపీపీఎస్సీ గ్రూప్-2 నోటిఫికేషన్‌ జారీ చేసింది. ఈ ఏడాది ఫిబ్రవరిలో గ్రూప్-2 ప్రిలిమినరీ పరీక్షలు నిర్వహించారు. జులై నాటికి గ్రూప్ -2 మెయిన్స్ పూర్తి చేయాల్సి ఉండగా, పలు కారణాలతో వాయిదా పడింది. ఇటీవల ఏపీపీఎస్సీ ఛైర్మన్‌గా బాధ్యతలు చేపట్టిన అనూరాధ... గ్రూప్-2 మెయిన్స్‌ నిర్వహణపై నిర్ణయం తీసుకున్నారు. ఈ మేరకు ఏపీపీఎస్సీ షెడ్యూల్ ప్రకటించింది. గ్రూప్ -2 ప్రిలిమినరీ పరీక్షలో 92,250 మంది అభ్యర్థులు మెయిన్స్ కు క్వాలిఫై అయ్యారు.

899 పోస్టులకు నోటిఫికేషన్

ఏపీపీఎస్సీ గ్రూప్-2 ప్రిలిమ్స్ పరీక్షను ఈ ఏడాది ఫిబ్రవరి 25న నిర్వహించారు. ఈ ఫలితాలను ఏప్రిల్ 10న ప్రకటించారు. గ్రూప్-2 మెయిన్స్ పరీక్షకు మొత్తం 92,250 మంది అభ్యర్థులు ఎంపికయ్యారు. వివిధ కారణాలతో 2557 మంది అభ్యర్థులను రిజెక్ట్ చేశారు. ఆంధ్రప్రదేశ్ పబ్లిక్ సర్వీస్ కమిషన్ 899 గ్రూప్-2 పోస్టులకు ఫిబ్రవరి 25న ప్రిలిమినరీ పరీక్షను నిర్వహించింది. గ్రూప్-2 స్క్రీనింగ్ టెస్ట్ కు రాష్ట్ర వ్యాప్తంగా 4,83,525 మంది అభ్యర్థులు నమోదు చేసుకోగా, 4,63,517 మంది హాల్ టిక్కెట్లను డౌన్‌లోడ్ చేసుకున్నారు. 4,04,037 మంది పరీక్షకు హాజరయ్యారు. ప్రిలిమినరీ పరీక్షకు 87.17% శాతం మంది హాజరయ్యారని ఏపీపీఎస్సీ తెలిపింది. ఏపీలోని 24 జిల్లాల్లోని 1327 కేంద్రాల్లో ఈ పరీక్ష నిర్వహించారు.

గ్రూప్-2 మెయిన్స్ పరీక్ష విధానం

ఏపీపీఎస్సీ గ్రూప్ 2 మెయిన్స్ పరీక్షలను వచ్చే ఏడాది జనవరి 5న నిర్వహించనున్నట్లు కమిషన్ ప్రకటించింది. గ్రూప్ 2 మెయిన్స్ లో రెండు పేపర్లు ఉంటాయి. మొత్తం 300 మార్కులకు పరీక్షలను నిర్వహిస్తారు. ఒక్కొక్కటి 150 మార్కులు కేటాయించారు. పేపర్-1లో చూస్తే ఏపీ సామాజిక, సాంస్కృతిక చరిత్ర, భారత రాజ్యాంగం అంశాలు ఉన్నాయి. ఇక పేపర్-2లో చూస్తే భారతదేశ, ఏపీ ఆర్థిక వ్యవస్థ, సైన్స్‌ అండ్‌ టెక్నాలజీ అంశాల నుంచి ప్రశ్నలు ఉంటాయి. ప్రతి సెక్షన్ కు 75 మార్కులు కేటాయిస్తారు.