Telangana Rains : అప్రమత్తంగా ఉండండి.. ప్రాణ నష్టం జరగకుండా చూడాలి

తెలంగాణలో పలు ప్రాంతాల్లో విపరీతంగా వర్షాలు పడుతున్నాయి. మరో మూడు రోజులు వర్షాలు కురవనున్నట్టుగా వాతావరణ శాఖ హెచ్చరించింది. ఈ నేపథ్యంలో రాష్ట్ర ప్రభుత్వం అప్రమత్తమైంది. దీల్లీలో ఉన్న సీఎం కేసీఆర్ రాష్ట్రంలో కురుస్తున్న భారీ వర్షాల పరిస్థితిపై ఆరా తీశారు. అన్ని జిల్లాల కలెక్టర్లు, ఉన్నతాధికారులతో ప్రభుత్వ ప్రధాన కార్యదర్శి సోమేశ్ కుమార్ వీడియో కాన్ఫరెన్స్ నిర్వహించారు.

హైదరాబాద్ శివార్లలోని జంట జలాశయాలైన హిమాయత్ సాగర్, ఉస్మాన్ సాగర్‌లలోకి భారీగా నీరు వచ్చి చేరడంపై, మూసీ నది ప్రవాహంపై అధికారులతో సోమేష్ కుమార్ మాట్లాడారు. గ్రేటర్ హైదరాబాద్ మునిసిపల్ కార్పొరేషన్ (జీహెచ్‌ఎంసీ)తో సమన్వయంతో పని చేయాలన్నారు. ఈ రిజర్వాయర్‌లలో నీటి ప్రవాహాన్ని క్రమం తప్పకుండా పర్యవేక్షించాలని హైదరాబాద్ మెట్రో వాటర్ సప్లై అండ్ సీవరేజ్ బోర్డు (హెచ్‌ఎండబ్ల్యుఎస్ & ఎస్‌బి) మేనేజింగ్ డైరెక్టర్‌కు చెప్పారు.

రిలీఫ్ క్యాంపులను ఇప్పటికే జీహెచ్‌ఎంసీ గుర్తించిందని, అవసరమైతే ఈ రిజర్వాయర్ల నుంచి వరద నీటి విడుదల వల్ల నష్టపోయే ప్రజలను ఈ శిబిరాలకు తరలించాల్సి ఉంటుందని తెలిపారు. కాగా, ఉస్మాన్ సాగర్ నుంచి మూసీలోకి నీటిని విడుదల చేయడంతో నగరంలోని నార్సింగి-మంచిరేవుల మధ్య రోడ్డు మార్గం తెగిపోయింది. నగరం గుండా ప్రవహించే మూసీ నదిలోకి నీటిని విడుదల చేసేందుకు ఉస్మాన్ సాగర్ కుడి గేట్లను ఎత్తివేశారు.

సోమవారం అర్థరాత్రి కురిసిన భారీ వర్షం, మూసీలో ప్రవాహం పెరగడంతో ఇప్పటికే మూసారాంబాగ్ వంతెనపై వరద నీరు వచ్చి వాహనాల రాకపోకలకు అంతరాయం ఏర్పడింది. కాజ్‌వేలు, లోతట్టు ప్రాంతాలు, రోడ్లు, ట్యాంకుల ఉల్లంఘనల విషయంలో అన్ని జిల్లాల కలెక్టర్లు అప్రమత్తంగా ఉండాలని ప్రభుత్వ ప్రధాన కార్యదర్శి కోరారు. అధికారులందరూ తమ ప్రధాన కార్యాలయంలోనే ఉండాలని, ఎలాంటి అవాంఛనీయ సంఘటనలు జరిగితే వెంటనే అవసరమైన చర్యలు తీసుకోవాలన్నారు. అన్ని శాఖలు సమన్వయంతో పని చేయాలని అన్నారు.

కలెక్టర్లు అప్రమత్తంగా ఉండి ప్రాణనష్టం జరగకుండా చర్యలు చేపట్టాలని సీఎస్ సోమేశ్ కుమార్ అన్నారు. అన్ని శాఖల అధికారులు సహాయ, పునరావాస కార్యక్రమాల్లో పాల్గొనాలన్నారు. జలాశయాలు, చెరువులకు గండ్లు పడకుండా చర్యలు చేపట్టాలని కోరారు. విద్యుత్ సరఫరాకు అంతరాయం కలగకుండా చూసుకోవాలని, రోడ్లు, వంతెనలు తెగిన మార్గాల్లో ప్రమాదాలు జరగకుండా చూడాలన్నారు.