IPL 2022 | ముత్త‌య్య ముర‌ళీధ‌ర‌న్ ఆగ్ర‌హించిన వేళ‌

క్రికెట్‌లో రాహుల్ ద్రావిడ్‌తో పాటు శ్రీలంక మాజీ స్పిన్న‌ర్ ముత్త‌య్య ముర‌ళీధ‌ర‌న్‌ వివాదాల‌కు దూరంగా ఎప్పుడూ కూల్‌గా కనిపిస్తారు. సుదీర్ఘ కెరీర్ లో ఎన్నో అప‌జ‌యాలు,విమ‌ర్శ‌లు ఎదురైన త‌మ వ్య‌క్తిత్వాన్ని మాత్రం కోల్పోలేదు. ఏరోజు వారిలో ఆగ్ర‌హం క‌నిపించ‌లేదు. ఎప్పుడూ ప్ర‌శాంతంగానే క‌నిపిస్తూ అభిమానుల మ‌న‌సుల్ని గెలుచుకున్నారు. అలాంటిది ముత్త‌య్య ముర‌ళీధ‌ర‌న్ త‌న శాంతాన్ని కోల్పోయి కోపంతో క‌నిపించిన వీడియోలు,ఫొటోలు సోష‌ల్ మీడియాలో చ‌క్క‌ర్లు కొడుతున్నాయి.

ప్ర‌స్తుతం ముత్త‌య్య ముర‌ళీధ‌ర‌న్ స‌న్‌రైజ‌ర్స్ హైద‌రాబాద్‌కు బౌలింగ్ కోచ్‌గా ప‌నిచేస్తున్నాడు. బుధ‌వారం గుజ‌రాత్ టైటాన్స్ తో జ‌రిగిన మ్యాచ్‌లో స‌న్‌రైజ‌ర్స్ గెలుస్తుంద‌ని అంద‌రూ అనుకున్నారు. కానీ జాన్స‌న్ బౌలింగ్‌లో ర‌షీద్‌ఖాన్ మూడు సిక్స‌ర్లు కొట్టి గుజ‌రాత్‌ను గెలిపించాడు. ఒకే ఓవ‌ర్‌లో 22 ప‌రుగులు స‌మ‌ర్పించిన జాన్స‌న్‌పై ముత్త‌య్య ముర‌ళీధ‌ర‌న్ ఆగ్ర‌హాన్ని వ్య‌క్తం చేశారు. డ‌గౌట్‌లో త‌న కుర్చీ నుంచి లేచి తీవ్ర అస‌హ‌నానికి గురవుతూ ముత్త‌య్య ముర‌ళీధ‌ర‌న్ క‌నిపించిన వీడియోలు సోష‌ల్ మీడియాలో చక్కర్లు కొడుతున్నాయి.

ఈ వీడియోలను ఉద్దేశిస్తూ ఐపీఎల్ అద్భుత‌మైన మ్యాచ్‌ల‌లో ఇది ఒక‌ట‌ని,ముత్త‌య్య ముర‌ళీధ‌ర‌న్ కూడా త‌న ఉద్వేగాల్ని కంట్రోల్ చేసుకోలేనంత‌గా థ్రిల్‌ను పంచింద‌ని అభిమానులు కామెంట్స్ చేస్తున్నారు. ముర‌ళీధ‌ర‌న్‌లో కోపాన్ని చూడాల‌నే క‌ల తీరింద‌ని ఫ‌న్నీగా వ్యాఖ్యానిస్తున్నారు. మ్యాచ్‌లో ర‌షీద్‌ఖాన్‌,తెవాతియా మెరుపుల‌తో చివ‌రి బాట్‌కు గుజ‌రాత్ విజ‌యాన్ని సాధించింది.