FIFA World Cup 2022 Arg vs KSA: మాజీ ఛాంపియన్‌ అర్జెంటీనాకు షాక్‌.. సౌదీ అరేబియా చేతిలో చిత్తు

FIFA World Cup 2022 Arg vs KSA: ఫిఫా వరల్డ్‌కప్‌ మూడో రోజు పెను సంచలనం నమోదైంది. మాజీ ఛాంపియన్‌, 2022లో ఫేవరెట్లలో ఒకటిగా భావిస్తున్న అర్జెంటీనాకు గట్టి షాక్‌ తగిలింది. తొలి మ్యాచ్‌లోనే ఆ టీమ్‌ సౌదీ అరేబియా చేతుల్లో 1-2 తేడాతో ఓటమి పాలైంది. ఫస్ట్‌ హాఫ్‌ 10వ నిమిషంలోనే వచ్చిన పెనాల్టీ అవకాశాన్ని మెస్సీ గోల్‌గా మలచి 1-0 లీడ్‌లోకి దూసుకెళ్లినా.. సెకండాఫ్‌లో అర్జెంటీనా ప్లేయర్స్‌ చేతులెత్తేశారు.

అద్భుతంగా పుంజుకున్న సౌదీ ప్లేయర్స్‌ ఐదు నిమిషాల వ్యవధిలో రెండు గోల్స్‌ చేసి.. చివరి వరకూ ఆ ఆధిక్యాన్ని నిలబెట్టుకున్నారు. సెకండాఫ్‌ ప్రారంభమైన మూడు నిమిషాలకే అంటే 48వ నిమిషంలో సౌదీ తొలి గోల్‌ చేసింది. ఆ టీమ్‌ ప్లేయర్‌ సలే అల్‌ హెహ్రీ గోల్‌ చేశాడు. తర్వాత ఐదు నిమిషాల్లోనే అంటే 53వ నిమిషంలో సలేమ్‌ అల్‌ దౌసారి మరో గోల్‌ చేయడంతో సౌదీ 2-1 లీడ్‌లోకి దూసుకెళ్లింది.

ఇక అక్కడి నుంచి స్కోరును సమం చేయడానికి అర్జెంటీనా ఎంతో ప్రయత్నించింది. అయినా ఫలితం లేకపోయింది. ఆ టీమ్‌ను సౌదీ ప్లేయర్స్‌తోపాటు గోల్‌కీపర్‌ కూడా అద్భుతంగా నిలువరించారు. గ్రూప్‌ సిలో మెక్సికో, పోలాండ్‌ టీమ్స్‌తో అర్జెంటీనా మ్యాచ్‌లు ఆడాల్సి ఉంది. దీంతో ఆ టీమ్‌ నాకౌట్‌ స్టేజ్‌కు చేరుకోవడం ఇప్పుడు కత్తి మీద సాముగా మారనుంది.

ఈసారైనా తన వరల్డ్‌కప్‌ కల నెరవేర్చుకుందామనుకుంటున్న మెస్సీకి ఇది మింగుడు పడనిదే. గతంలో తొలి మ్యాచ్‌లోనే ఓడి వరల్డ్‌కప్‌ గెలిచిన సందర్భం ఒకే ఒక్కసారి మాత్రమే ఉంది. ఆ లెక్కన అర్జెంటీనా ముందడుగు వేయాలంటే అద్భుతమే జరగాలి. ఈ మ్యాచ్‌లోనే గోల్‌తో నాలుగు వరల్డ్‌కప్‌లలో గోల్స్‌ చేసిన తొలి అర్జెంటీనా ప్లేయర్‌గా రికార్డు సృష్టించిన మెస్సీకి ఈ ఓటమి మాత్రం చేదు గుళిక కానుంది.