Tesla layoffs 2022 : టెస్లాలో ఉద్యోగాలు 'కట్'- ఏకంగా ఆఫీసునే మూసేశారు!​

Tesla layoffs 2022 : అమెరికాలో రెసెషన్​ భయాలు రోజురోజుకు పెరిగిపోతున్నాయి. పరిస్థితులను ఎదుర్కొనేందుకు సంస్థలు సన్నద్ధమవుతున్నాయి. ఇప్పటికే.. అనేక సంస్థలు తమ ఉద్యోగులను తీసేస్తున్నాయి. తాజాగా.. ఈ జాబితాలోని అపరకుబేరుడు ఎలాన్​ మస్క్​ సీఈఓగా ఉన్న 'టెస్లా' కూడా చేరింది. 'కాస్ట్​ కట్టింగ్​' పేరుతో జోరుగా ఉద్యోగులను తొలగిస్తోంది టెస్లా. ఈ క్రమంలోనే పనిచేసేవాళ్లు లేక.. కాలిఫోర్నియా శాన్​ మాటియోలోని టెస్లా కార్యాలయం మూతపడిపోయింది!

టెస్లాలో ఉద్యోగాల తొలగింపు విషయంపై ఎలాన్​ మస్క్​ ముందే సంకేతాలిచ్చారు.

"ఆర్థిక వ్యవస్థపై నాకు భయంగా ఉంది. ఎలక్ట్రిక్​ వాహనాల తయారీలోని 10శాతం సిబ్బందిని కట్​ చేయాల్సి ఉంటుంది," అని కొన్ని నెలల క్రితమే ఎలాన్​ మస్క్​ చెప్పారు. అందుకు తగ్గట్టుగానే టెస్లా చర్యలు తీసుకుంటోంది.

అయితే.. శాలరీ వర్కర్లపైనే ఈ ప్రభావం ఉంటుందని, గంటల చొప్పున పనిచేసే వారికి ఇది వర్తించదని మస్క్​ అన్నారు. కానీ ఇప్పుడు మూకుమ్మడిగా ఉద్యోగాలను తొలగిస్తున్నారని తెలుస్తోంది.

"శాన్​ మాటియోలో సంస్థ కార్యాలయం లీజు పూర్తికావస్తోంది. వేరే చోటికి తరలిస్తారని తొలుత మాకు చెప్పారు. కానీ ఇప్పుడు ఉద్యోగాలనే తీసేసి, కార్యాలయాన్ని మూసివేశారు. మేము షాక్​లో ఉన్నాము," అని ఓ ఉద్యోగి చెప్పారు.

కొవిడ్​ వల్ల వాహన తయారీ సంస్థలపై పెద్ద ప్రభావమే పడింది. ఆ తర్వాత కూడా.. చైనాలో లాక్​డౌన్​ల కారణంగా షాంఘైలోని టెస్లా కార్యాలయం సరిగ్గా పనిచేయలేదు. ఫలితంగా టెస్లాకు నష్టాలు వాటిల్లాయి. అదే సమయంలో ముడిసరకు ధరలు పెరిగాయి. సప్లై చెయిన్​ వ్యవస్థ దెబ్బతింది. ఫలితంగా టెస్లా నష్టాలు మరింత పెరిగాయి.

నెట్​ఫ్లిక్స్​ కూడా..

Netflix layoffs 2022 : 10ఏళ్లల్లో తొలిసారిగా సబ్​స్క్రైబర్లను కోల్పోయిన స్ట్రీమింగ్​ దిగ్గజం నెట్​ఫ్లిక్స్​.. ఖర్చులను తగ్గించుకునే పనిలో పడింది. ఇందుకోసం ఉద్యోగాల్లో కోత విధిస్తోంది. ఇప్పటికే 300మంది ఉద్యోగులను ఇళ్లకి పంపేసింది. అంటే కంపెనీలోని ఉద్యోగుల్లో ఇది 4శాతం!

ఒక్క అమెరికాలోనే.. నేల రోజుల వ్యవధిలో 150 ఉద్యోగులను తొలగించింది నెట్​ఫ్లిక్స్​.

"వ్యాపారంలో మెరుగుపడటానికి మేము నిత్యం ప్రయత్నిస్తూనే ఉంటాము. కానీ ఉద్యోగులను తొలగించక తప్పడం లేదు. రెవెన్యూ వృద్ధి తగ్గిపోవడంతో ఖర్చులను మేనేజ్​ చేయాల్సి వస్తోంది," అని గురువారం ఓ ప్రకటనను విడుదల చేసింది నెట్​ఫ్లిక్స్​.

ద్రవ్యోల్బణం, ఇతర స్ట్రీమింగ్​ సంస్థల కారణంగా పెరుగుతున్న పోటీ వల్ల నెట్​ఫ్లిక్స్​ తీవ్ర ఒత్తిడిలో ఉంది. ఈ ఆర్థిక ఏడాది తొలి త్రైమాసికంలో ఎన్నడూ లేని విధంగా.. ఆ సంస్థ సబ్​స్క్రైబర్లను కోల్పోయింది. ఈ త్రైమాసికంలోనూ ఇదే కొనసాగుతుందని అంచనా వేసింది. అందుకు తగ్గట్టుగానే సంస్థ సన్నద్ధమవుతోంది.

మరోవైపు సబ్​స్క్రైబర్లను ఆకట్టుకునేందుకు తక్కువ ధరలతో ఆకర్షణీయమైన ప్లాన్స్​ను తీసుకొచ్చే యోచనలో ఉంది నెట్​ఫ్లిక్స్​. ఇందుకోసం అనేక దేశాలతో చర్చలు జరుపుతోంది.

Recession 2022 : ద్రవ్యోల్బణాన్ని కట్టడి చేసేందుకు వడ్డీ రేట్లను పెంచుతోంది ఫెడ్​. ఫలితంగా అమెరికాలో మాంద్యం వస్తుందని అంచనాలు, భయాలు రోజురోజుకు పెరిగిపోతున్నాయి. ఈ క్రమంలో.. ఉద్యోగులను నెట్​ఫ్లిక్స్​ తొలగిస్తోందన్న వార్తలు.. మాంద్యం భయాలను మరింత పెంచుతున్నాయి.