రూ. 69 స్టాక్​లో వాటా పెంచుకున్న బిగ్​ బుల్​.. మీరు కొనుగోలు చేయాలా?

బిగ్​ బుల్​ రాకేష్​ ఝున్‌ఝున్‌వాలా ఒక స్టాక్​లో పెట్టుబడి పెడుతున్నా, ఉపసంహరించుకుంటున్నా.. లేదా వాటాను పెంచుకుంటున్నా వార్తే. ఆయన్ని అనుసరించి స్టాక్​ మార్కెట్​లో లాభాలు పొందాలని చాలా మంది చూస్తూ ఉంటారు. అంతేకాకుండా.. ఆయన పెట్టుబడులు పెట్టే కంపెనీలపై అధ్యయనం చేస్తూ ఉంటారు. తాజాగా.. ఓ కంపెనీలో ఆయన వాటా పెంచుకున్నారు. అది కూడా రూ. 69 స్టాక్​లో!

రాకేశ్‌ ఝున్‌ఝున్‌వాలా.. తన పేరు మీదే కాకుండా.. తన సతీమణి రేఖ పేరు మీద కూడా పెట్టుబడులు పెడుతూ ఉంటారు. కాగా.. రేఖ పోర్ట్​ఫోలియోలోని నిర్మాణం- ఇంజినీరింగ్​ కంపెనీ అయిన ఎన్​సీసీలో.. క్యూ4లో వాటా పెంచుకున్నారు బిగ్​ బుల్​.

ఎన్​సీసీలో వీరికి 2015 డిసెంబర్​ నుంచి పెట్టుబడులు ఉన్నాయి. కాగా.. ప్రస్తుతం రేఖ వాటాను 0.72శాతం మేర పెంచారు రాకేశ్‌ ఝున్‌ఝున్‌వాలా. ఇది ఆ సంస్థ షేర్​హోల్డింగ్​ డేటాలో దర్శనమిచ్చింది. ఫలితంగా.. 2022 మార్చ్​ నాటికి సంస్థలో రేఖ వాటా.. 1.6కోట్ల ఈక్విటీ షేర్లకు చేరింది(2.62శాతం). 2021 డిసెంబర్​ నాటికి అది 1.90శాతంగా మాత్రమే ఉండేది.

మరోవైపు రాకేశ్‌ ఝున్‌ఝున్‌వాలాకు ఎన్​సీసీలో ఉన్న వాటా(10.94శాతం)లో ఎలాంటి మార్పులు లేవు.

బుధవారం మార్కెట్​ ముగిసే సమయానికి ఎన్​సీసీ షేరు రూ. 69.60కు పడింది. సంస్థ మార్కెట్​ వాల్యుయేషన్​ రూ. 4,244.53కోట్లుగా ఉంది. ఏడాదిగా స్టాక్​లో కరెక్షన్​ కనిపిస్తున్నా.. సంస్థలో రాకేశ్‌ ఝున్‌ఝున్‌వాలా వాటాను పెంచుకోవడం విశేషం.

కాగా.. మార్కెట్​లో ప్రస్తుతం త్రైమాసిక ఫలితాల సీజన్​ నడుస్తోంది. అందువల్ల ఎన్​సీసీ షేర్ల కదలికలకు కూడా ఫలితాలపైనే ఆధారపడి ఉంటుందని మార్కెట్​ విశ్లేషకులు అభిప్రాయపడుతున్నారు. ఎన్​సీసీ.. మంచి ఫలితాలనే డెలివరీ చేస్తుందని భావిస్తున్నారు. అదే సమయంలో అప్పులను కూడా సంస్థ తగ్గించుకునే అవకాశం ఉందని ఆశాభావం వ్యక్తం చేస్తున్నారు.

గమనిక: ఇది కేవలం సమాచారం కోసం రాసిన వార్త మాత్రమే. ఎలాంటి పెట్టుబడులైనా పెట్టే ముందు.. మీ ఫైనాన్షియల్​ ఎడ్వైజర్​ను సంప్రదించడం శ్రేయస్కరం.