Pakistan passport : పాపం పాక్.. లామినేషన్ పేపర్ల కొరతతో పాస్పోర్ట్ తయారీ బంద్!
10 November 2023, 11:57 IST
Pakistan passport lamination : పాకిస్థాన్ ప్రజలకు కొత్త సమస్య వచ్చిపడింది. లామినేషన్ పేపర్ల కొరత కారణంగా..ఆ దేశంలో ఇప్పుడు పాస్పోర్ట్ తయారీ కష్టంగా మారింది.
పాపం పాక్.. లామినేషన్ పేపర్ల కొరతతో పాస్పోర్ట్ తయారీ బంద్!
Pakistan passport lamination : ఆర్థిక సంక్షోభంతో కొట్టుమిట్టాడుతున్న పాకిస్థాన్ను మరో సమస్య కుదిపేస్తోంది! ఈ దేశంలో పాస్పోర్ట్ తయారీ నిలిచిపోయినట్టు సమాచారం. పాస్పోర్ట్ల కోసం కావాల్సిన లామినేషన్ పేపర్ల కొరత ఏర్పడటమే ఇందుకు కారణం అని తెలుస్తోంది.
పాస్పోర్ట్ కోసం లామినేషన్ పేపర్లు లేవు..
పాకిస్థాన్ పాస్పోర్ట్ తయారీకి కావాల్సిన లామినేషన్ పేపర్ల కొరత ఏర్పడిందని ఆ దేశ డీజీఐపీ (డైరక్టరేట్ జనరల్ ఆఫ్ ఇమిగ్రేషన్ అండ్ పాస్పోర్ట్స్) చెప్పినట్టు, ఓ ప్రముఖ వార్తా సంస్థ వెల్లడించింది. పాస్పోర్ట్లు అందక చాలా మంది ప్రజలు తీవ్ర ఇబ్బందులు పడుతున్నారని వివరించింది.
జైన్ ఇజాజ్ అనే పాకిస్థానీ.. యూకేలో చదువుకోవాలని కలలు కన్నాడు. అందుకు తగ్గట్టు అన్ని ఏర్పాట్లు చేసుకున్నాడు. యూకేలోని వర్సిటీలో సీటు కూడా వచ్చింది. సరిగ్గా అదే సమయంలో.. పాకిస్థాన్లో పాస్పోర్ట్ తయారీకి ఇబ్బందులు ఎదురయ్యాయి. ఫలితంగా.. అతను ఈసారి యూకేకు వెళ్లలేని పరిస్థితి ఏర్పడే ప్రమాదం పొంచి ఉంది.
Pakistan passport issue : జైన్తో పాటు ప్రస్తుతం.. వేలాది మంది పాకిస్థానీల పరిస్థితి ఇదే! విదేశాల్లో చదువు, ఉద్యోగం, పర్యటనల కోసం కావాల్సిన గ్రీన్ కలర్ బుక్ను పాకిస్థాన్ తయారు చేయలేకపోతోంది. లామినేషన్ పేపర్లు లేకపోవడంతో చాలా పనులు ఆగిపోయాయి.
"పని కోసం నేను త్వరలోనే దుబాయ్కి వెళ్లాల్సి ఉంది. మా జీవితాలు మారిపోబోతున్నాయని.. నేను, నా కుటుంబం చాలా సంతోషిచ్చాము. పేదరికంలో కూరుపోయిన మాకు మంచి జరుగుతోందని ఆనిందించాము. కానీ మా కలలను డీజీఐపీ చిదిమేసింది," అని గౌల్ అనే పాకిస్థానీ, తన ఆవేదన వ్యక్తం చేశాడు. ఇలా ఎందరో ప్రజలు.. వారి కష్టాలను చెప్పుకుని కన్నీరు పెట్టుకుంటున్నారు.
Pakistan passport shortage : అయితే.. పాకిస్థాన్లో పాస్పోర్టుల తయారీ నిలిచిపోవడం ఇది కొత్త విషయమేమీ కాదు. 2013లో కూడా ఇదే జరిగింది. లామినేషన్ పేపరలు లేవని, ప్రింటర్లకు డబ్బులు కట్టలేదన్న కారణాలతో పాస్పోర్టుల తయారీ నిలిచిపోయినట్టు అప్పట్లో చెప్పుకొచ్చింది డీజీఐపీ.
ఈ విషయంపై అక్కడి మీడియా.. ప్రభుత్వాన్ని ప్రశ్నించింది.
"మేము అదే పనిలో ఉన్నాము. త్వరలోనే సమస్యకు పరిష్కారం లభిస్తుంది. అంతేకాకుండా.. బాక్లాగ్ (పాస్పోర్టు ఇవ్వాల్సిన నెంబర్లు) సంఖ్య ఇప్పటికే తగ్గుతోంది," అని ప్రభుత్వ అధికారి ఒకరు చెప్పారు.
'మాకు నమ్మకం లేదు దొర..'
Pakistan passport news : అధికారిక అంచనాల ప్రకారం.. ఒక్క కరాచీ నుంచే రోజుకు 3వేలకుపైగా పాస్పోర్ట్ అప్లికేషన్లు వెలతాయి. పరిస్థితిని కంట్రోల్ చేస్తామని చెబుతున్న ప్రభుత్వం మాటలను నమ్మే స్థితిలో అక్కడి ప్రజలు లేనట్టు కనిపిస్తోంది!
"ప్రభుత్వం మాటలను నేను నమ్మను. రెండు నెలల క్రితం నేను పాస్పోర్ట్కు అప్లై చేశాను. ఇంకా రాలేదు," అని కరాచీకి చెందిన ఓ వ్యక్తి తెలిపాడు.