Aitana AI : నెలకు రూ. 3లక్షలు సంపాదిస్తున్న 'ఏఐ' మోడల్​..!

Aitana AI Spain : ఈ అమ్మాయి ఎవరు- చాలా అందంగా ఉంది! మోడలింగ్​ చేస్తోందా? అని అనుకుంటున్నారా? అయితే మీ డౌట్స్​ నిజమే! తను ఒక మోడల్​. కానీ ఇక్కడే పెద్ద ట్విస్ట్​ ఉంది. ఆ మోడల్​ అమ్మాయి కాదు. ఒక ఏఐ! స్పానిష్​ డిజైనర్​ రుబెన్​ క్రూజ్​, ఆయన కంపెనీ 'ది క్లూలెస్'​ కలిసి ఆర్టిఫీషియల్​ ఇంటెలిజెన్స్​తో సృష్టించిందే ఈ మోడల్​. పేరు ఐటానా! అంతేకాకుండా.. ఈ ఏఐ.. నెలకు రూ. 3లక్షల వరకు సంపాదిస్తుండటం విశేషం!

ఐటానా.. ఒక ఏఐ!

యూరోన్యూస్​కు ఇటీవలే ఇంటర్వ్యూ ఇచ్చారు రుబెన్​ క్రూజ్​. ఐటానా గురించి పలు విషయాలను వెల్లడించారు.

"మా బిజినెస్​లో వస్తున్న సమస్యలను లోతుగా పరిశీలించాము. మా చేతుల్లో లేని అంశాలతో చాలా నష్టపోతున్నామని గ్రహించాము. ఇన్​ఫ్లుయెంజర్స్​, మోడల్స్​తో చాలా ఇబ్బందులు ఎదుర్కొన్నాము. మనుషులు వారి ఈగోను డీల్​ చేసే బదులు.. మాకంటూ ఒక ఏఐ ఉంటే బాగుండు అనిపించింది. సింపుల్​గా పోజ్​లిస్తూ.. మాకు డబ్బులు తెచ్చిపెట్టే విధంగా ఉండాలని భావించాము. అలా.. ఐటానాను సృష్టించాము," అని రుబెన్​ క్రూజ్​ తెలిపారు.

Aitana AI robot : ఇదే విషయంపై ది క్లూలెస్​ సంస్థ సహ-వ్యవస్థాపకురాలు డయానా న్యూనెజ్​ మాట్లాడారు.

"మోడల్స్​, ఇన్​ఫ్లుయెంజర్స్​పై మేము చేస్తున్న ఖర్చు చాలా పెరిగిపోయింది. అప్పుడే మాకు ఒక ఐడియా వచ్చింది. మాకు మేము ఒక మోడల్​ని సృష్టించుకుంటే ఎలా ఉంటుంది? అన్న ఆలోచన వచ్చింది. అందంగా ఉండాలి అని అనుకున్నాము. అంతే! ఈ ఐటానా పుట్టుకొచ్చింది. ప్రయోగాలకు, వివిధ లుక్స్​ని ట్రై చేసేందుకు కాస్త సమయం పట్టింది. ఆ తర్వాత.. జాక్​పాట్​ కొట్టాము," అని డయానా తెలిపారు.

సూపర్​ ఫాలోయింగ్​..!

Aitana AI instagram : యూరోన్యూస్​ రిపోర్ట్​ ప్రకారం.. ఈ ఏఐ మోడల్​ ఐటానా.. సగటున నెలకు 3వేల పౌండ్ల నుంచి 10వేల పౌండ్ల వరకు సంపాదిస్తోంది! అనేక కంపెనీలకు మోడల్​గా వ్యవహరిస్తోంది.

అంతేకాకుండా.. ఐటానాకు ఒక ఇన్​స్టాగ్రామ్​ పేజ్​ కూడా ఉంది. ఇన్​స్టాలో తను చాలా ఫేమస్​. ఇప్పటికే 1.21లక్షల మంది ఫాలోవర్లు ఉన్నారు. చాలా మంది పర్సనల్​గా మెసేజ్​లు కూడా చేస్తూ ఉంటారు.