KCR Maharashtra tour : రుక్మిణీ దేవీ ఆలయంలో కేసీఆర్​ పూజలు..

KCR Maharashtra tour : మహారాష్ట్ర పర్యటనలో ఉన్న తెలంగాణ ముఖ్యమంత్రి, బీఆర్​ఎస్​ అధినేత కేసీఆర్​.. సోలాపూర్​ పండరిపూర్​లోని శ్రీ విట్టల్​ రుక్మిణీ దేవీ ఆలయాన్ని మంగళవారం ఉదయం సందర్శించారు. ఆలయంలో ప్రత్యేక పూజలు నిర్వహించి, అర్చకుల ఆశీర్వాదాలు పొందారు. పలువురు మంత్రులు కూడా కేసీఆర్​ వెంట ఆలయానికి వెళ్లారు.

అనంతరం పండరిపూర్​ నుంచి సర్కోలికి కేసీఆర్​ బృందం బయలుదేరింది. భగీరత్​ బాల్కే ఆహ్వానం మేరకు.. ఆయన నివాసంలో మధ్యాహ్న భోజనం చేయనున్నారు బీఆర్​ఎస్​ అధినేత. అనంతరం ఏర్పాటు చేసిన పలు కార్యక్రమాల్లో.. మంత్రులతో సహా కేసీఆర్​ పాల్గొనున్నారు.

ఇదీ చూడండి:- CM KCR : 600 వాహనాలతో భారీ కాన్వాయ్, మహారాష్ట్రలో సీఎం కేసీఆర్ సినిమా స్టైల్‌ ఎంట్రీ!

రెండు రోజుల పర్యటనలో భాగంగా.. సోమవారం సాయంత్రం మహారాష్ట్ర సోలాపూర్​కు చేరుకున్నారు కేసీఆర్​. ఈవాళ సాయంత్రం హైదరాబాద్​కు తిరుగుప్రయాణం అవుతారు.

కేసీఆర్​ ప్రభావం ఉండదు..

కేసీఆర్​ మహారాష్ట్ర పర్యటన నేపథ్యంలో.. ఆయనపై తీవ్ర విమర్శలు గుప్పించారు ఉద్ధవ్​ ఠాక్రే శివసేనకు చెందిన ఎంపీ సంజయ్​ రౌత్​.

"మహారాష్ట్ర రాజకీయాల్లో తెలంగాణ సీఎం కేసీఆర్​ ప్రభావం ఏం ఉండదు. ఇలాంటి డ్రామాలు చేస్తే.. కేసీఆర్​ తెలంగాణలోనూ ఓడిపోతారు. వాస్తవానికి.. ఓటమి భయంతోనే ఆయన మహారాష్ట్రకు వచ్చారు. ఆయన పార్టీకి చెందిన 12-13మంది సోమవారమే కాంగ్రెస్​లో చేరారు. కాంగ్రెస్​, కేసీఆర్​ మధ్య జరుగుతున్న యుద్ధంలో మాకు సంబంధం లేదు. మహారాష్ట్రలో మహా వికాస్​ అఘాడీ చాలా శక్తివంతంగా ఉంది," అని సంజయ్​ రౌత్​ వ్యాఖ్యానించారు.