Supreme court on divorce issue : దంపతులు కోరుకుంటే.. వెంటనే విడాకులు- సుప్రీం సంచలన తీర్పు!

Supreme court on divorce issue : దంపతుల విడాకులకు సంబంధించి సుప్రీంకోర్టు సోమవారం సంచలన తీర్పును వెలువరించింది. భార్యాభర్తలిద్దరు విడాకులు తీసుకోవాలని కోరుకుంటే.. ప్రస్తుతం ఉన్న 6 నెలల నిరీక్షణ నిబంధన అవసరం లేదని స్పష్టం చేసింది. వివాహ బంధంలో ఉండలేమని భావించే దంపతులకు తక్షణమే విడాకులు ఇవ్వొచ్చని జస్టిస్​ సంజయ్​ కిషన్​ కౌల్​తో కూడిన ఐదుగురు సభ్యుల ధర్మాసనం వెల్లడించింది. ఈ విధమైన తీర్పును ఇచ్చేందుకు తమకు రాజ్యాంగం ఇచ్చిన విశిష్టాధికారులు ఉన్నట్టు సర్వోన్నత న్యాయస్థానం గుర్తుచేసింది.

Supreme court latest news : ఆర్టికల్​ 142ను ఉపయోగించి.. దంపతుల విడాకులకు సంబంధించి హిందూ వివాహ చట్టంలోని సెక్షన్​ 13లో ఉన్న 6 నెలల వెయిటింగ్​ పీరియడ్​ను ఎత్తివేసే అధికారం తమకు ఉందా? అన్న అంశంపై విచారణ చేపట్టింది కోర్టు. ఫ్యామిలీ కోర్టులకు రిఫర్​ చేయకుండా.. నేరుగా సుప్రీంకోర్టే విడాకులు మంజురు చేసే అంశంపై పలు వ్యాజ్యాలు దాఖలయ్యాయి. పరస్పర అంగీకారం ఉండి, ఆ వివాహ బంధం.. కోలుకోలేని స్థితి, విచ్ఛిన్నమైపోయి, సమస్యలు పరిష్కారం కానీ పరిస్థితిలో ఉంటే.. 6 నెలల నిరీక్షణ నిబంధన అవసరం లేదని తీర్పునిచ్చింది. అదే సమయంలో భరణం, ఇల్లు, పిల్లల హక్కుతో పాటు ఇతర నిర్వహణలకు సంబంధించి ఈక్విటీలను ఎలా బ్యాలెన్స్​ చేయాలి? అన్న విషయాన్ని కూడా వివరించింది ధర్మాసనం.

వాస్తవానికి ఈ విడాకుల వ్యవహారం ఇప్పటిది కాదు. జస్టిస్​ కీర్తి సింగ్​, జస్టిస్​ ఆర్​ భానుమతి (ఇద్దరు ఇప్పుడు రిటైర్​ అయ్యారు)తో కూడిన డివిజన్​ బెంచీ.. ఏడేళ్ల క్రితం ఐదుగురు సభ్యుల ధర్మాసనానికి దీనిని సిఫార్సు చేసింది. ఇంత కాలం ఈ అంశంపై విచారణ జరిగింది. 2022 సెప్టెంబర్​ 29న తుది తీర్పును రిజర్వ్​లో పెట్టింది సుప్రీంకోర్టు ధర్మాసనం. తాజాగా తీర్పును వెలువరించింది.