Amul fresh milk in US: ఇక అమెరికాలో అమూల్ తాజా పాలు.. నాలుగు రకాల బ్రాండ్లతో అందుబాటులోకి

న్యూఢిల్లీ, మార్చి 25: గుజరాత్ కోఆపరేటివ్ మిల్క్ మార్కెటింగ్ ఫెడరేషన్ (జీసీఎంఎంఎఫ్) భారత ప్రవాసులు, ఆసియా జనాభాను దృష్టిలో ఉంచుకుని వారం రోజుల్లో నాలుగు రకాల పాలను అమెరికా మార్కెట్లోకి విడుదల చేయనుంది.

''దశాబ్దాలుగా పాల ఉత్పత్తులను ఎగుమతి చేస్తున్నాం. భారతదేశం వెలుపల తాజా పాలను విడుదల చేయడం ఇదే మొదటిసారి" అని జిసిఎంఎంఎఫ్ ఎండి జయేన్ మెహతా పిటిఐకి తెలిపారు.

అమెరికా మార్కెట్లో తాజా పాలను విడుదల చేయడానికి జిసిఎంఎంఎఫ్ 108 సంవత్సరాల పురాతన సహకార సంస్థ మిచిగాన్ మిల్క్ ప్రొడ్యూసర్స్ అసోసియేషన్ (ఎంఎంపిఎ) తో ఒప్పందం కుదుర్చుకుందని, పాల సేకరణ మరియు ప్రాసెసింగ్ ఎంఎంపిఎ చేస్తుందని, జిసిఎంఎంఎఫ్ అమూల్ తాజా పాల మార్కెటింగ్, బ్రాండింగ్ చేస్తుందని ఆయన చెప్పారు.

"వారం రోజుల్లో అమూల్ తాజా, అమూల్ గోల్డ్, అమూల్ శక్తి, అమూల్ స్లిమ్ ఎన్ ట్రిమ్ యూఎస్ మార్కెట్లో అందుబాటులోకి వస్తాయి. న్యూయార్క్, న్యూజెర్సీ, చికాగో, వాషింగ్టన్, డల్లాస్, టెక్సాస్ తదితర ప్రాంతాల్లో తాజా పాలు లభిస్తాయి..’ అని మెహతా తెలిపారు.

జీసీఎంఎంఎఫ్ ప్రవాస భారతీయులు (ఎన్ఆర్ఐలు), ఆసియా జనాభాను లక్ష్యంగా చేసుకుంటుంది. అమ్మకాల లక్ష్యం గురించి అడిగినప్పుడు, వచ్చే 3-4 నెలల వరకు జిసిఎంఎంఎఫ్ బ్రాండింగ్, మార్కెటింగ్ పై దృష్టి పెడుతుందని ఆయన చెప్పారు. కస్టమర్ల నుంచి మంచి స్పందన వస్తుందని ఆశిస్తున్నామని చెప్పారు.

జిసిఎంఎంఎఫ్ సమీప భవిష్యత్తులో పనీర్, పెరుగు, వెన్న, వంటి తాజా పాల ఉత్పత్తులను కూడా విడుదల చేస్తుందని మెహతా చెప్పారు. 2022-23 ఆర్థిక సంవత్సరంలో జీసీఎంఎంఎఫ్ టర్నోవర్ గత ఏడాదితో పోలిస్తే 18.5 శాతం పెరిగి రూ. 55,000 కోట్లకు చేరుకుంది. జీసీఎంఎంఎఫ్ ఇప్పటికే 50 దేశాలకు పాల ఉత్పత్తులను ఎగుమతి చేస్తోంది.