మహిళ తలకు గాయం.. ‘కండోమ్​ ప్యాక్​’తో కట్టు కట్టిన వైద్యులు!

Madhya Pradesh viral news : సాధారణంగా.. శరీరానికి గాయమైతే.. కాటెన్​, బ్యాండేజ్​తో కట్టు కడతారు డాక్టర్లు. కానీ ఓ మహిళ తలకు గాయమైతే.. బ్యాండేజ్​ బదులు కండోమ్​ ప్యాక్​తో కట్టు కట్టారు!

మధ్యప్రదేశ్​ మోరేనాలో జరిగింది ఈ ఘటన. ధర్మ్​గఢ్​లో నివాసముండే ఓ మహిళ తలకు గాయమైంది. రక్తం పోతుండటంతో ఆమె సమీపంలోని ఆరోగ్య కేంద్రానికి వెళ్లింది. ఆ సమయంలో అక్కడ డా. ధర్మేంద్ర రాజ్​పూట్​ ఉన్నారు. మహిళ తలకు కట్టు కట్టాలని, రక్తస్రావాన్ని ఆపేందుకు ఏదైనా తలకు పెట్టాలని వార్డ్​ బాయ్​కి సూచించారు ఆ వైద్యుడు. ఆ తర్వాత అక్కడి నుంచి వెళ్లిపోయారు.

ఆ వార్డ్​ బాయ్​.. అతి తెలివి ప్రదర్శించాడు! తలకు కట్టు కడుతున్న సమయంలో.. బ్యాండేజ్​లాగా పనికొస్తుందని.. కండోమ్​ ప్యాక్​ను దెబ్బ తగిలిన చోట పెట్టాడు. పూర్తిగా కట్టుకట్టేశాడు.

ఆ మహిళ గాయం తీవ్రంగా మారడంతో.. ఆరోగ్య కేంద్రం నుంచి జిల్లా ఆసుపత్రికి వెళ్లింది. అక్కడే అసలు విషయం బయటపడింది. కట్టును తొలగించి.. గాయాన్ని పరిశీలించాలని అనుకున్న వైద్యులు ఒక్కసారిగా షాక్​ అయ్యారు.

Morena health care centre : కట్టును తొలగిస్తుండగా.. మహిళ తల నుంచి కండోమ్​ ప్యాక్​ జారిపడింది.

ఈ ఘటనకు సంబంధించిన ఫొటోలు సామాజిక మాధ్యమాల్లో వైరల్​గా మారాయి.

మరోవైపు ఈ ఘటనను అధికారులు అత్యంత తీవ్రంగా పరిగణిస్తున్నారు. కండోమ్​ ప్యాక్​ను తలకు కట్టిన వ్యక్తిని అధికారులు సస్పెండ్​ చేసినట్టు తెలుస్తోంది.

ఆ మహిళ పేరు రేష్మ బాయి అని సమాచారం.